منظومۃ الفائض فی علم الفرائض

ذوی الفرائض

اسمِ اعظم سے میں لکھتا ہوں فرائض کا بیاں
پھر درودِ مصطفی سے ہو نظم یہ دُر فشاں
ترکۂ میت میں ہیں یوں چار حق تو جان لے
اولاً تجہیز و تکفیں منصفی سے مان لے
ثانیاً پھر قرضِ میت کر ادا ہر حال میں
ثالثاً نافذ وصیّت اک تہائی مال میں
رابعاً تقسیم ان وارث میں ہو جن کی سبیل
ہو عیاں قرآن و سنت اور اجماعی دلیل
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وارثانِ شرع دس ہیں ان کو طالب یاد رکھ
رقم کر قرطاس پر اور دل کو اپنے شاد رکھ
پہلے اصحابِ فرائض جن کا ہو ذکر و نعوت
در کلام اللہ و سنت اور اجماعاً ثبوت
پھر ملے گا ترکہ جو ہوں وارثانِ ذی عصب
پہلے پہلے ذی نسب کو گر نہ ہوں تو ذی سبب
ذی سبب ہی گر نہ ہوں تو ذی سبب کے ذی نسب
یہ نہیں تو ذی نسب پر رد کروں اے با ادب
ذی نسب اور ذی سبب کوئی نہیں اقدام کو
اے برادر ڈھونڈ میت کے ذوی الارحام کو
گر ذوی الارحام میں کوئی نہیں کیا  کیجئے
دیجئے مولیٰ المولاتی کو ترکہ دیجئے
گر نہیں مولیٰ تو جس کے واسطے اقرار ہے
غیر پر اپنے نسب کا، بس وہی حقدار ہے
گر مقر کوئی نہیں موصیٰ لہ کا کر خیال
گر کوئی موصیٰ نہیں تو جمع کر در بیتِ مال
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چار چیزیں ہیں وراثت سے رکاوٹ محترم
کامل و ناقص  غلامی سے ارث ہے کالعدم
قتل ایسا آے جس پر کوئی کفارہ ، قصاص
اختلافِ دین بھی ہے ایک مانع وجہِ خاص
اختلافِ دار حکمی یا حقیقی آخراً
ہے تعلق اس کا بس کفار سے ہی مطلقاً
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہے مقرر حصے قرآں میں عدد سے چھے شمار
دو گُنا ہے دائیں جانب نصف ہوگا از یسار
نوعِ اول، نصف پہلے، ربع ثانی پھر ثمن
نوعِ ثانی دو ثُلُثْ پھر ثُلْثِ واحد سُدْسَ گن
لینے والے کل ہیں بارہ چار مرد و آٹھ زن
یاد کر ان کو برابر اے برادر جانِ من
مرد میں ہیں باپ اور جدِّ صحیح اوپر تلک
پھر ہے اخیافی برادر اور پھر شوہر تلک
عورتوں میں بیوی، بیٹی، پوتی نیچے تک،بہن
اور اخیافی و علاتی بہن کا ہے جتن
بعدہ ہے عورتوں میں تو یقیناً ماں سگی
آخراً یوں ترتیب سے ہوگی صحیحہ جدہ بھی
!۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حالتیں ہیں تین اب کی یہ ہے ترکیب محض
فرض مطلق اور مع التعصیب، تعصیبِ محض
بیٹا یا پوتا اگر ہو فرض مطلق دیجئے
بیٹی یا پوتی کے ہوتے فرض و تعصیبِ لیجئے
کوئی بھی اولادِ میت میں نہ ہو گر وارثان
ہے فقط تعصیب والد کے لئے ہی شادمان
جد کے ہیں احوال اربع تین مثلِ اب وہی
اب کے ہوتے چوتھی صورت ہے فقط محروم کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حالتیں ہیں تین جو بھائی بہن ہوں ماں شریک
ایک کو چھٹا ملے گا اک ثلث دو چند کو ٹھیک
اصلِ میت میں ہو کوئی یا کوئی اس کا فروع
اس طرح محروم یعنی حجب کا ہوگا وقوع
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زوج کی ہیں حالتیں دو،نصف یا ربعِ تمام
ہے مع الاولاد ربع و نصف ہے ورنہ پیام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زوجہ کے احوال دو ہیں ربع یا پھر ہے ثمن
ہے ثمن اولاد ہوں گر ربع ورنہ خوب سن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تین ہیں احوال بیٹی کے اے پیارے با خرد
نصف یا پھر دو تہائی، عصبہ جب ہو با ولد
نصف جب وہ ایک ہو اور دو ثلث جب ہوں کثیر
ہو اگر میت کا بیٹا تو عصوبت ہے اخیر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پوتیوں کی حالتیں ہیں چھے اے طالب ذی وقار
نصف یا پھر دو تہائی یا وہ عصبہ ہے شمار
یا سدس ملتا ہے اس کو یا حجب دو حال میں
خوب سن لے غور کر ان سب کے سب احوال میں
نصف اک پوتی کو دے دو مثلِ بیٹی اے جگر
دو ثلت ہے پوتیوں کا اک سے زائد ہوں اگر
پوتیوں کو دو سدس کہ دو ثلث پورا کرو
پر یہ جب ہے ایک بیٹی ساتھ ہو تو دم بھرو
بیٹیاں ہوں دو تو پھر یہ پوتیاں محجوب ہیں
ہاں مگر پوتے عصوبت کے لیے مطلوب ہیں
پوتیوں کے ہو برابر کوئی پوتا تو صحیح
یا ہو ان سے نیچے اصغر کوئی پوتا تو صحیح
پوتیوں کے واسطے پھر باعثِ حرمان ہے
ایک بھی بیٹا ہو میت کا تو یہ فرمان ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اور حقیقی بہنوں کی احوالِ خمسہ بھی سنو
نصف اک کو، دو ثلث زائد کہ خاطر تم چنو
عصبۂ بالغیر ہوں گی کوئی بھائی ہو اگر
ہیں مع الغیرِ عصب وہ بیٹی پوتی ہو مگر
بیٹا یا پوتا ہو میت کا بہن محروم ہے
بس سراجی میں عبارت سے یہی مفہوم ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سات ہیں احوال علی بہنوں کی میرے حبیب
نصف للواحد ہے حصہ دو ثلث دو کا نصیب
اک بہن بھی ہو حقیقی تو سدس کا ہے حساب
دو حقیقی بہنوں سے آتی ہے محرومی حجاب
عصبۂ بالغیر ہوں گی علّی بھائی ہو اگر
بیٹی، پوتی ہو مع الغیرِ عصب ہے معتبر
بیٹا، پوتا ، باپ، دادا، عصبہ ہو عینی بہن
ان ہمہ احوال میں محرومی ہے قولِ حسن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حالتیں ہیں تین ماں کی اے مرے عالی وقار
یاد کر لے خوب ان کو اور پڑھئے بار بار
ہو اگر اولادِ میت یا مذکر کے فروع
دو یا زائد بھائی، بہنوں کا اگر ہوے وقوع
ماں کا حصہ ہے سدس پر ان صور میں مشتمل
ان میں کوئی بھی نہ ہو تو ماں کو دیجے ثلث ِ کل
ان میں کوئی تو نہیں ، زوجین میں ہے کوئی ایک
ما بقیہ کا ثلث ہے ماں کا حصہ نیک نیک
ایسے ہیں دو مسئلے، ماں باپ اور شوہر حیات
بیوی یا ماں باپ ہوں اور کر گیا شوہر وفات
باپ کے بدلے ہو دادا اور کوئی زوجین میں
مختلف ہے مسئلہ یہ قاضی و طرفین میں
ماں کو دو کل کا ثلث یہ نزدِ طرفینِ عظام
نزدِ قاضی ما بقیہ غیر راجح ہے پیام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہیں صحیحہ جدہ کے احوال یوں تو دو شمار
ایک جیسی جتنی بھی ہوں حجب نا ہو روبکار
ایسی صورت میں سدس ملتا ہے ان جدات کو
ثانی صورت حجب کی ہے، پڑھئے تفصیلات کو
ماں کے ہوتے ارث سب جدات سے معدوم ہے
باپ ہو تو باپ کی جدات ہی محروم ہے
دادا ہو تو اس سے اوپر جدہ سے حرمان ہے
پر برابر والی کو دینے کا پھر فرمان ہے
دادی ہو ابعد تو پھر اقرب سے وہ محجوب ہے
خود بنے یا نا بنے وارث قریبی دادی جان
دور والی پر وہ محرومی سے ہوے مہربان
ایک دادی کی قرابت کی فقط ہو اک سبیل
دوسری کی دو یا زائد ہو قرابت میں مثیل
نزدِ قاضی دو وراثت دونوں کو مثلِ رؤوس
ہاں محمد نے کہا قربت سے کیجے خوش نفوس
قولِ قاضی پر ہے فتویٰ ہے سروں کا اعتبار
ہاں محمد کے یہاں ہے بس قرابت پر مدار

باب العصبات

عصبات کی ہیں یوں قسمیں دو، دل و جان سے انہیں یاد کر

نسبی ہوں یا سببی عصب انہیں ارث دے کے تو شاد کر

نہ کلامِ پاک و حدیث میں ہو کوئی بیاں عصبات ہیں

جو بچے گا بعدِ ذوی الفروضَ انہیں کو دو جو حیات ہیں

نسبی عصب ہے کہ مرنے والے کے ساتھ ہوۓ قرابتیں

سببی عصب ہے عتاق کی، تھی غلامیت کی رفاقتیں

نسبی عصب کی ہیں سہ صور ہو بنفسہ جو کوئی سبب

یا بوجہ غیرَ ہو فضل کچھ یا کسی کے ساتھ بنیں عصب 

۔ ۔ ۔ ۔ ۔ ۔ ۔۔ ۔ ۔ ۔ ۔ ۔ ۔ ۔ ۔۔ ۔ ۔ ۔ ۔ ۔ ۔ ۔ ۔ ۔ ۔ 

سببی عصب سے مراد ہے وہی یعنی معتِقِ مہربان

یہ نہیں تو اس کے وہی عصب اسی طرز پر جو ہوا بیاں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ہے ولاء کی زن وہی مستحق کرے خود عتاق کی جو مجال

یا وہ عتق دے جسے، اس کا ہی کرے کوئی معتَقِ جاں وصال

یا وہ جاں مرے جو غلام تھا یہی ٹھہری اسکی مکاتبہ

یا مکاتبہ تھی یہ اس کا ہی ہے مرا مکاتب بے نوا

یا مکاتبہ تھی یہ جس کی اسکا مرا مکاتبِ بے نوا

یا مدبّرہ یا تھیں پھر مدبّرِ جاں بحق کی مدبّرہ

یا مدبّرہ تھی یا پھر مدبّرِ جاں بحق کی مدبّرہ

یا وہ بخشے عتق غلام کو اورکھینچے اس کا یہ پھر ولاء

یا ہو اس غلام کی معتقہ وہ ولاء کا بنتا ہو مستحق

یوں اناث کے لیے کچھ نہیں یہی بات ٹھہری ہے متفق

یوں اناث کے لئے کچھ نہیں سوا ان صور کے ہیں متفق

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یا اگر مرتا ہے معتَق اور چھوڑے وارثان

یعنی معتِق کے پسر کو اور پیارے بابا جان

نزدِ قاضی ہے سدس للوالد و بیٹے کا سب

نزدِ اعظم اور محمد ٹھہرا ہے محروم اب

چھوڑے گر معتِق کا بیٹا اور دادا محترم

اتفاقاً دادا صاحب ارث میں ہے کالعدم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ذی رحم محرم کے مالک عتق کا باعث ہیں سب

گر برابر دیں رقم یکساں ولاء ملتی ہے تب

دے اگر کوئی زیادہ ، دو بقدرِ حق ولاء

بیٹیاں ہو تین جیسے صغریٰ، کبریٰ اور ذکا

جیسے دیوے تیس ذکریٰ بیس درہم دے کنول

اور خریدیں باپ کو پچاس درہم کے بدل

دو ثلث ہے تینوں کا یہ جب مرا ہو بابا جان

باقی اخماسا ولاء ہے پھر یہ دو کے درمیان

سہ خمس کبریٰ کی خاطر دو خمس صغریٰ کا حق

اور تصحیح ہوگی پنتالیس سے ہے یہ ادق

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

حجب کے یوں لغوی معنیٰ روکنا، دربان ہے

اصطلاحاً کلّی و جزوی کرے نقصان ہے

حجب کی ہیں دو صور نقصان یا حرمان کی

کم کرے وارث کا حصہ ہے یہ حد نقصان کی

کم ہو جن کا حصہ گاہے پانچ ہیں ایسے بدن

بیوی، شوہر، ماں و پوتی یا ہو پھر علّی بہن

کل وراثت سے کر ےمحروم تو حرمان ہے

دو طرح وارث ہیں ایسے جن کی یہ پہچان ہے

ایک طبقہ جو کبھی نا ارث سے محروم ہو

ثانی طبقہ جو گہِ وارث، گہِ معدوم ہو

دو اصولوں پر ہے مبنی حجب حرماں یاد رکھ

طبقۂ ثانی کی خاطر ہے یہ فرماں یاد رکھ

واسطہ کی واسطے ذو واسطہ محروم ہے

اقربِ میت سے ابعد بھی سدا محروم ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

فرقِ لغوی تو نہیں محروم اور محجوب میں

اصطلاحاً فرق لیکن ہے ذرا مطلوب میں

جب موانع پیش ہو محروم ہے وہ کالعدم

ہے ولے محجوب حاجب ہو اگر اے محترم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

نزدِ جمہورِ صحابہؓ ہے یہی قولِ صواب

ہو اگر محروم کوئی وہ نہیں حاجب جناب

نزد عبداللہ اس میں کوئی ہجراں تو نہیں

حجب نقصاں ہے یقیناً حجبِ حرماں تو نہیں

اتفاقاً ہے وہ حاجب جو کوئی محجوب ہے

جیسے چھوڑے بھائی دو، ماں، باپ یہ مکتوب ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ایک اصحابِ فرائض ہی اگر ہوے شمار

جو مقرر حصہ ہوگا ہے اسی کا اعتبار

یعنی ہم نامِ عدد سے ہی بنے گا مسئلہ

جیسے دو سے نصف ہو گر، ربع ہو تو اربعہ

اک سے زائد نوعِ اوّل کے جو ہوں گے وارثان

مسئلہ چھوٹے عدد سے تب بنے اے مہربان

جیسے چھوڑے ماں و دو بہنیں و چچا محترم

بس سدس سے مسئلہ بنتا ہے اب اے ذی حشم

نوعِ اول کا ہو نصف و نوعِ ثانی بعض و کل

مسئلہ چھے سے بنے گا باتیں ہیں یہ معتدل

نوعِ اوّل کا ہو ربعُ و نوعِ ثانی بعض و کل

اس طرح بارہ کو ہے یہ مسئلہ پھر مشتمل

نوعِ اوّل کا ثمن ہو نوعِ ثانی بعض و کل

مسئلہ چوبیس سے بنتا ہے یہ بس مستقل

نوعِ اوّل کے ہوں دو چند ثانی کا ہو کچھ خلل

نوعِ اوّل میں ہو چھوٹا مسئلے کا ہے وہ حل

ہوں فقط عصبہ جو وارث ہے سروں کا اعتبار

یاد کر لے پیارے طالب اور پڑھئے بار بار

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عول کہتے ہیں لغت میں غلبہ، بھاری، پڑھ گیا

اصطلاحاً وارثوں پر کچھ عدد اب بڑھ گیا

دو و تین و چار و آٹھ و بارہ، چھے چوبیس پھر

یہ ہیں مجموعی مخارج بات ہے یہ مشتہر

ان میں اول چار کا آتا نہیں بالکل ہے عول

بارہ، چھے چوبیس کا آتا ہے واضح ہے یہ قول

عول چھے کا دس تلک ہے طاق بھی اور جفت بھی

بارہ کا ہے سترہ تک اور شرط ہے پھر طاق کی

عول ستائیس ہے چوبیس کا نزدِ کثیر

نزدِ عبد اللہ ہے اکتیسِ عدد تک رہ بگیر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دو عدد ہوے مساوی ہے تماثل کی خبر

کم گھٹا دے گر بڑے کو ہے تداخل کی خبر

یا بڑا چھوٹے عدد پر ہوے تقسیماً صحیح

یا عدد چھوٹا بڑے پر ہوے تضعیفاً صحیح

یا یہی چھوٹا عدد ہو جز بڑے کا معتدل

ہیں تداخل کی یہ تعبیرات ساری مستقل

ایک دوجے کو نہ کاٹے، تیسرا کاٹے کوئی

یہ توافق کی ہے نسبت بس اسی سے ہو بری

ان۔ میں کوئی بھی نہ ہو تو ہے تبائن روبکار

جیسے نو اور دس میں ہے ایسا ہے تبائن آشکار

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

جب توافق اور تبائن جاننے کا ہو دھیان

دو عدد میں ہو بقدرِکم کمی 

دو عدد میں ہو ہر اک جانب بقدرِ کم کمی

ہو توافق اور تبائن جاننے کی دھن لگی

دو عدد میں دو طرف کیجے بقدرِ کم کمی

متفق ہو ایک پر یہ ہے تبائن کی مثال

متفق دو یعنی عدد پر ہو توافق ہے مقال

ہے توافق ناطقہ یا پھر توافق منطقہ

دس تک توافق بالثلث جیسا ہے لکھنا پھر روا

دس سے آگے لفظِ جزء کا ہو اضافہ کیف و کم

لکھ توافق پھر بجزء من ثلاث ہے یہ اصم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

باب التصحییح

خوب کیجے یاد تصحیحِ مسائل کا بیاں

خوب سمجھو یاد آئے گا جبھی در امتحاں

معنئ لغوی ہے تصحیح کا صحیح کرنا حضور

اصطلاحاً کسرِ واقع وارثوں سے ہوۓ دور

ہیں یوں تصحیحِ مسائل کے لئے سبعہ اصول

مشق کیجے خوب تا کہ ہو سہل ان کا حصول

تین کا ہوۓ تعلق پھر سروں سے اور سہام

چار کا ہے پھر سروں سے اور سروں سے ہی پیام

بے کسر ممکن ہو تقسیمِ سہامِ ہر فریق

ضرب دینے کی کوئی حاجت نہیں ہے اے رفیق

کسر واقع اک جماعت میں ہو اب کیا ہے پیام

اور توافق نسبتاً ہو در رؤوس و در سہام

ضرب اصلِ مسئلہ میں دیجے وفقِ کل فریق

عائلہ میں عول ہو گر نکلے تصحیحِ انیق

ہر جماعت کے حصص اب جاننا مطلوب ہو

اصلِ حصہ کو ضرب دو اس میں جو مضروب ہو

اک جماعت میں ہو کسر و تیسرا ہے قاعدہ

ہو سروں میں اور حصص میں جب تبائن واقعہ

دو، سروں کو ضرب اس میں جو ہے اصلِ مسئلہ

عول میں بھی اس طرح تصحیح سے نکلے فائدہ

ضرب دو تعدادِ سر اور جو ملا اصلِ سہم

یوں بدونِ کسر سب کو اب وراثت ہو بہم

دو صور میں اس طرح ہوگا تداخل کا بیاں

ایک حکماً ہو تماثل ایک توافق سے عیاں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جب قواعد ہوں سروں اور پھر سروں میں کارگر

ہو سروں ان کے حصص کی نسبتوں سے با خبر

ہو تداخل دخلِ سر اور ہو توافق وفق سر

ہو تبائن کل سر قرطاس پر محفوظ کر

پھر تماثل اور فرقوں میں ہو کسرِ متحد

ضرب اصلِ مسئلہ میں دیجے کوئی بھی عدد

مسئلہ کی اس طرح تصحیح نکل کر آئے اب

چھے بنات و تین جدہ، تین چچّا چھوڑے جب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ہو تداخل کسر ہوۓ جب فریقوں میں بپا

مسئلہ میں ضرب دو ان میں عدد جو ہو بڑا

ضرب کے حاصل سے تصحیح یوں نکل آئے گی اب

چار زوجہ، تین جدہ، بارہ چچّا چھوڑے جب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

لسر واقع ہو فریقوں میں توافق ہو عیاں

دیکھ نسبت کون سی ہے سہم و سر کے درمیاں

پھر ضرب دو کل عدد میں وفقِ ثانی اولاً

ثالث و حاصل شدہ میں دیکھ نسبت ثانیاً

ہو توافق، وفقِ ثالث میں ضرب دو اے جواں

ہو تباین،پورے ثالث میں ضرب دو ہے بیاں

چوتھے پہ کر پیش یعنی دے دو حاصل میں ضرب 

پر وہی معمولِ اول وفق یا کل میں ضرب

ضرب دو اب آخراً جو مبلغِ مضروب ہو

یعنی اصلِ مسئلہ میں تصحیحَ گر مطلوب ہو

ضرب دو مضروب میں سہمِ فریقانِ تمام

اس طرح بے کسر پائے ہر فرق اپنا سہام

چار زوجہ اٹھرہ بنت و پندرہ جدہ چھے ہوں عم

چار، تین و دو و صفر تصحیح سے نکلے پیچ و خم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ہو تباین اور فریقوں میں کسر بھی آئے تو

نے تداخل نے توافق ان میں کوئی پاۓ تو

اک عدد کو دوسرے کے کل عدد میں دو ضرب

تیسرے کو دوسرے حاصل عدد میں دو ضرب

چوتھے میں بھی یوں عمل ہو نکلے مضروبِ اخیر

اصل میں مضروب کو اب ضرب دینا ہے پذیر

یوں ہو تصحیح جیسے ہوں گے وارثانِ ما ممات

زوجہ دو جدات چھے اور بنت دس اعمام سات

دو، سو دس مضروب ہوگا بعدِ مذکورہ عمل

پچّاس اور چالیس تصحیح سے نکل آئے گا حل

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ہر جماعت کے حصص اب جاننا مطلوب ہو

اصلِ حصہ کو ضرب دو اس میں جو مضروب ہو

۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

چاہے جو ہر فرد کا اب سہم بھی معلوم ہو

اس کے ہیں دو چند طریقے اب یہاں مرقوم ہو

اولاً ہر اک جماعت پاۓ جو اصلِ سہام

ہوۓ تقسیمِ حصص کا ان سروں پر التزام

ضرب دو مضروب میں اب حاصلِ قسمت سدا

ضرب کے حاصل سے کیجے فرد کا حصہ ادا

یا کرو مضروب یہ تقسیم کل پر اے جگر

ضرب دو اصلِ سہم میں حاصلِ قسمت اگر

اس طرح ہر ہر نفر کا سہم نکلے بالیقیں

یہ طریقہ دوسرا ہے اور شرحِ دل نشیں

یوں ہے نسبت کا طریقہ بھی جو کچھ آسان ہے

میں نہیں کہتا مصنف کا یہی فرمان ہے

نسبتِ سہمِ اصل اور سر سے ہو تو جانکار

مثلِ نسبت سہم دو مضروب سے عالی وقار

یا جو تصحیح سے ملے ہر اک جماعت کو سہام

ان سروں پر کیجے قسمت کا ذرا اب اہتمام

حاصلِ قسمت سے سہمِ فرد کا ہوگا حصول

طالبِ علم و عمل یہ یاد کر سارے اصول

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وارثوں میں ترکہ کی تقسیم جو مطلوب ہو

نسبتِ تصحیح و ترکہ سے تو واقف خوب ہو

ہو تباین کی جونسبت ایسے میں ہے یہ پیام

دو حصص کو ضرب ترکہ کے عدد میں با تمام

ضرب کے حاصل کو تصحیح میں کروں تقسیم جب

یوں بقدرِ حاصلِ قسمت وراثت پائیں سب

ہو اگر تصحیح و ترکہ میں توافق نسبتاً

ضرب وفقِ ترکہ میں دو پھر حصص کو اوّلاً

وفقِ تصحیح میں کرو تقسیم ضربِ ما حصل

حاصلِ قسمت سے ترکہ وارثوں میں ہو نقل

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

اک جماعت کا یہ حصہ ترکہ سے مقصود ہو

نسبتِ تصحیح و ترکہ جان جو موجود ہو

ہو توافق سہم کو دو ضرب ترکہ میں جناب

ہو توافق وفقِ ترکہ میں سہم کو ضرب دو

ماحصل تقسیم کیجے وفقِ تصحیح میں جو ہو

حاصلِ قسمت ہے حصہ اس جماعت کے لئے

ترکہ میں سے یہ بیاں ہے بس وراثت کے لئے

ترکہ و تصحیح میں ہوۓ گر تباین کا قیام

ضربِ کل تقسیمِ کل سے پھر نکل آئیں سہام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

قرض خواہ ہوں اور وارث کس کو کتنا دیجئے

ترکہ ہو پورا تو سب کو اپنا حصہ دیجئے

قرض چکتا پہلے ہوۓ پھر وراثت کیف و کم

یعنی ہو حسبِ حصص ترکہ یہ شرعاً پھر بہم

ہاں اگر ترکہ ہو کم اور قرضِ میت ہو کثیر

تو بقدرِ قرض ترکہ دو انہیں اے با ضمیر

یعنی وارث کے بدل ہے معتبر اب قرض خواہ

 قرض کی مقدار لے گی سہمِ وارث کی جگہ

قرض خواہوں کا یہ پورا قرض جوڑا جاۓ گا

قرض خواہوں کی ملائی جائے گی پوری رقم

مسئلہ کا ہے وہی حل یاد کر اے محترم

جیسے خالد ماجد و حارث ہوں تینوں قرض دار

بارہ خالد سولہ ماجد بیس حارث کے شمار

رقم اڑتالیس ہے یہ اور ہے کل مسئلہ

جیسے ترکہ کچھ نہیں چھتیس روپیہ کے سوا

نسبتِ چھتیس و اڑتالیس ، بارہ جان لے

وفقِ اڑتالیس چار و تین چھتیس مان لے

ضرب وفقِ ترکہ میں دو قرضِ خالد بر محل

وفقِ اڑتالیس میں تقسیم پھر ہو ما حصل

حاصلِ قسمت یہ نو ہے ترکہ خالد کا شمار

دیْن ماجد اور حارث کا اسی پر ہے مدار

قرضِ کل اور ترکہ میں ہو گر تباین آشکار

 کل وراثت میں ضرب دو اب یہ دینِ قرض دار

ماحصل تقسیم ہوگا قرضِ کل پر اے جناب

جیسے سترہ ترکہ، اڑتالیس قرضِ کل حساب

کسر ترکہ میں ہو واقع کیسے ہو عقدہ کشا

کسر کے مخرج میں ترکہ ضرب دینا ہے بجا

ما حصل میں کسر جوڑو پھر عمل ہو یہ ذرا

کسر کے مخرج میں اب دو ضرب اصلِ مسئلہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

اب تخارج کا بیاں ہے اس میں کیا منہاج ہو

لے کے کوئی شئ کسی وارث کا جب اخراج ہو

کل وراثت وارثوں میں اولاً تقسیم ہو

پھر حصص سب وارثوں کو دے کے ہی تعظیم ہو

بعد اس کے جو بھی وارث صلح کرنا چاہے گا

اس کے حصے کو وراثت سے گھٹایا جاے گا

ترکہ بھی تم وارثوں بانٹنا چاہو اگر

ما بقی اور ترکہ کی نسبت سے ہو تو با خبر

پھر اصولِ ما سبق سے اے برادر کام لے

یعنی پھر تقسیمِ ترکہ کے اصل پر کام لے

جیسے شوہر، ماں و چچا چھوڑ کر ہو انتقال

نصف شوہر، ماں ثلث اور عصبہ چچا ہے مقال

مسئلہ چھے سے بنا، ہے زوج کے ذمہ مہر

صلح کی اس نے گھٹا ہے اس کا حصہ اب مگر

تین باقی، ترکہ نو میں ہے تداخل اب عیاں

دخلِ نو میں سہمِ ماں کو ضرب دو اے مہرباں

ضرب دو پھر تین میں تم سہمِ عم بھی ، ما حصل

چچا کا حصہ پورا پورا تین آے گا نکل

یا اگر چھوڑی ہو بیوی، چار بیٹے ہی تمام

ایک، بیوی کو ملے اور سات بیٹوں کے سہام

چار اور پھر سات میں ہے جب تباین روبکار

ضربِ چار و آٹھ سے بتیس ہوگا آشکار

حاصلِ تصحیح سے بیگم کو ملیں اب سہم چار

اورَ اٹھائیس بیٹوں کے لئے ہیں سازگار

صلح اک بیٹے نے کی اور ارث سے وہ گھٹ گیا

ما بقیہ بتیس سے پچیس تصحیح ڈٹ گیا

اب اگر ترکہ ہو اک سو بیس فرضاً مان لے

نسبتِ پچیس و اک سو بیس پہلے جان لے

یوں توافق بالخمس پانچ ہے پچیس کا

وفقِ ترکہ پھر نکلتا ہے یہاں چوبیس کا

ضرب وفقِ ترکہ میں دو سہمِ وارث مہرباں

پانچ میں تقسیم کیجے ضرب کا حاصل یہاں

وارثوں کو اپنا حصہ حاصلِ قسمت سے دو

پورا پورا حق ادا ہو اور بڑی الفت سے دو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

باب الرد

رد ہے ضد پھر عول کی یہ جس میں بڑھ جائیں سہام

عول کہتے ہیں کہ کم وہ جس میں پڑھ جائیں سہام

دو قسم ہے وارثوں کی من یردْ ہے اک قسم

دوسری من لا یردْ ہے بیوی، شوہر محترم

من یردْ، من لا یردْ ہیں ورثوں کی دو قسم

یاد رکھو رد کے ویسے تو مسائل چار ہیں

من یردْ اک جنس ہو، من لا یردْ کوئی نہیں

من یردْ کی جنس دو، من لا یردْ کوئی نہیں

من یردْ اک صنف ہو، من لا یردْ بھی ساتھ ہو

من یردْ کی صنف دو، من لا یردْ بھی ساتھ ہو

سہمِ زائد کا ہو رد پھر نزدِ جمہورِ عظام

دے دو بیت المال میں ہے ابنِ ثابت کا پیام

ابن ثابت کی طرح کہتے ہیں مالک، شافعی

اب کے بیت المال گم ہے رد ہے قولِ آخری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

جنس اک ہو من یردْ کی ہے سروں کا اعتبار

بیٹیاں دو جیسے ہوۓ مسئلہ دو سے سنوار

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

من یردْ ہی ہے فقط لیکن ہیں جنسانِ کثیر

ردّ یہ لکھ مسئلہ کو جوڑ سہمانِ کثیر

دو سدس ہوں دو سے ہوگا مسئلہ یہ ردّیہ

جیسے اک دادی و اک اخیافی بہن چھوڑے چلا

اک ثلث اور اک سدس ہو تین سے لکھ مسئلہ

جیسے ماں، اخیافی بھائی بہن سے ہو وہ جدا

نصف اک اور اک سدس ہو مسئلہ کا حل ہے چار

جیسے ماں اور ایک بیٹی بس ہوئیں ہوں سوگوار

دو تہائی اور سدس ہوں پانچ سے ہیں رد شمار

جیسے ماں اور بیٹیاں دو چھوڑے پیچھے یادگار

پانچ سے ہو رد کہ نصف و دو سدس ہوں حصّہ جات

جیسے بیٹی، پوتی ، ماں سے ہو کوئی بندہ و فات

نصف واحد، اک ثلث ہو پانچ سے ہی رد کرو

جیسے ماں اور اک بہن چھوڑے تو ایسا دم بھرو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

من یردْ کی جنس اک ہو لا یردْ کے ہم رکاب

لا یردْ کے کم سے کم مخرج سے جوڑو پھر حساب

لا یردْ کو سہم دے کر رقم جو باقی بچے

من یردْ کے کل سروں سے دیکھ کیا نسبت سجے

ہوتماثل، ما بقی کو بس صحیح تقسیم کر

ہو تماثل ما بقی کو ان میں یکساں بانٹ دے

جسے چھوڑے زوج صاحب، تین بچیاں بانٹ دے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ہو توافق ایسی صورت وفقِ سر کو لیجئے

اصلِ مخرج لا یردْ میں ضرب اس کو دیجئے

ضرب کے حاصل سے تصحیح از سرِ نو خوب ہو

چاہئے قسمت کہ شرعاً جو یہاں مطلوب ہو

لا یردْ کے سہم کو دو ضرب وفقِ سر میں تام

ما بقی کے وفق میں دو من یردْ کے کل سہام

اس طرح ہر ہر جماعت حصہ پاے بے خطر

جیسے شوہر، بیٹیاں چھے چھوڑ کر جاے اگر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

ہو تباین، کل عددہاۓ سروں کو لیجئے

لا یردْ کے اصل میں اب ضرب ان کو دیجئے

ضرب کے حاصل سے تصحیح ہوے اب بارِ دگر

جیسے جاۓ زوج اور وہ پانچ بچیاں چھوڑے کر

من یردْ کے کل میں دیجے ضرب سہمِ لا یردْ

ما بقی میں ضرب دیجے من یردْ کا کل عدد

ہر جماعت کے حصص اب ہوں گے حاصل بالتمام

پانچ شوہر، تین ہر ہر بیٹی کا ہے اب پیام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

قسمِ رابع ردّیہ کی رقم در قرطاس ہو

لا یردْ ہو من یردْ کی ساتھ کچھ اجناس ہو

لا یردْ کو کم سے کم مخرج سے حصہ ہو بہم

من یردْ پر ما بقیہ ہو برابر منقسم

لا یردْ کا مخرجِ کم گو ہے اصلِ مسئلہ

جیسے بیوی، چار جدہ، چھے خفیفہ ہوں ذرا

لا یردْ کے مخرجِ کم چار سے اس کو سنوار

ایک بیوی کو ملے گا تین ہوں گے برقرار

من یردْ کا مسئلہ پھر چھے سے بنایا جائے گا

دو خفیفہ بہنوں کو دادی سدس کو پاۓ گا

سہم کل یہ تین بنتے ہیں لہذا ردّیہ

باقی بھی ہیں تین لے لو تین سے ہی مسئلہ

من یردْ کے کل عدد میں کسر واقع ہو اگر

حسبِ تصحیحِ مسائل کسرِ واقع دور کر

جان نسبت سہم اور ان کے سروں کے درمیاں

پھر عدد اور کل عدد میں کیا ہے نسبت اے جواں

ما حصل بارہ اقلِ لا یردْ میں ضرب دو

ضرب کے حاصل یہ اڑتالیس سے تصحیح کرو

ہر جماعت کے حصص مضروب بارہ سے نکال

بارہ بیوی، بارہ جدہ، بہنوں کے چوبیس سنبھال

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔۔۔۔۔۔۔۔۔۔۔۔۔۔۔۔۔۔۔۔ 

ما بقیہ، من یردْ میں ہو تباین برقرار

من یردْ کا مسئلہ گو ردّیہ ہو آشکار

من یردْ کے ردّیہ کو ضرب دو در لا یردْ 

ضرب کے حاصل سے تصحیح میں لئی جاۓ مدد

چار بیوی، بیٹیاں نو، چھے سبھی جدات ہوں

مشتمل یہ تین قسموں پر سبھی حالات ہوں

آٹھ یعنی لا یردْ کے کم سے جوڑو مسئلہ

سات باقی ایک ساری بیویوں کو ہے بجا

من یردْ کا مسئلہ چھے سے بنا عالی مقام

بیٹیوں کو چار ساری دادیوں کا اک سہام

اس لئے یہ ردّیہ ہو پانچ سے ہی مسئلہ

سات میں اور پانچ میں ہے جب تباین پھر بپا

لا یردْ کے آٹھ سے یہ پانچ پاۓ ضرب ہے

ہاں مگر چالیس حاصل ایسے آۓ ضرب ہے

مسئلہ کی ہے یہ تصحیح مخرجِ ہر دو فریق

خوب سمجھو، یاد کر لو مسئلہ ہے یہ دقیق

پانچ میں پھر ضرب دیجے لا یردْ کا سہمِ کل

ضرب سہمِ من یردْ کو سات میں دو مستقل

سہم و کل سر میں ہے پھر کسرِ تباین آشکار

اس لئے تصحیح چاہے اب یہاں اے زینہار

مبلغِ کل چودہ سو چالیس حاصل آئے گا

ضرب جب چھتیس مضروبِ عدد میں پائے گا

اک سو بارہ بیٹی ہر بیگم کو پنتالیس بس

آخراً ہر دادی جاں کو دیجے دو و چالیس بس

بیوی پنتالیس ہر اک بیٹی اک سو بارہ لے

آخراً دادی بیالیس ہر اک پارا لے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مقاسمۃ الجد

اے طالبانِ علومِ بنوی مقاسمہ کا بیان دیکھو 

ملے گا کیا دادا ، بھائی، بہنوں کو چھوڑے گر وارثان دیکھو

یہ مسئلہ مختلف رہا ہے نبی کے اصحاب کے یہاں بھی

 کوئی روایت نہیں ہے مرفوع ہے مختلف فیہ جبھی بیاں بھی

نبی کے اصحاب کے یہاں بھی یہ مسئلہ مختلف رہا ہے

کوئی روایت نہیں ہے مرفوع اسی لیے حکم بھی جدا ہے

جو دادا ہو تو ابوبکر اور ابوحنیفہ کا ہے یہ فرماں

حقیقی علاتی اور اخیافی سب کی خاطر ہے حقِ حرماں

 حقیقی، پدری و مادری سب کے واسطے آے حقِ حرماں

ہے قولِ ثانی حقیقی علاتی اور سبھی کو ملے وراثت

ہے مختلف فیہ کہ دیں کسے کیا ہے کیفیت کیا ہے کیا حقیقت

سدس سے کم تو نہیں ملے گا کہ مثل بھائی یہ دادا جاں ہے

یہی ہے فرمانِ حیدری بس کہ حکم ان سے یہی عیاں ہے

ہے ابنِ ثابت، ثلاثہ، یعقوب، اور محمد کا قول پیارے

کہ دادا کے ساتھ ہوں گے وارث یہ ساری بہنیں و بھائی سارے

کہ سہ طریقوں سے دو وراثت ہیں بھائی، جد وارثین سارے

مقاسمہ کی ہیں صورتیں دو یہی تو ٹھہرا ہے قولِ محکم

کہ بھائی،بہنیں و دادا ہو بس یا ذو الفرض بھی ہو کوئی ہمدم

ہاں پہلی صورت میں ثلْثِ کل یا مقاسمہ جو بھی ہوۓ بہتر

یوں ثانیاً ما بقیْ ثُلُث یا مقاسمہ، کلْ سُدُسْ میں برتر

ثُُلثْ بقیہ کہ دادا، دادی و بھائی دو، اک بہن کو چھوڑے

مقاسمہ جبکہ بھائی، شوہر اور دادا یہ سہ بدن کو چھوڑے

ہے کل سدس جیسے دادا، دادی و بیٹی اور اس کے دو برادر

اے جانِ من یہ امور سہ ہیں کہ خوب کرلو انہیں تم ازبر

یوں ثانی صورت میں سدْسِ کل یا مقاسمہ، ثلْثِ باقی برتر

 حقیقی بھائیوں کے ساتھ علّی ملیں گے تخریجِ مسئلہ میں

سنوار کر مسئلہ یہ علّی نکالے جائیں گے انتہاء میں

سنوار کر مسئلہ یہ علّی یوں ہوں گے محروم انتہاء میں

مگر یہ پدری بنے گے وارثت حقیقی ہوے جو اک بہن بس

حقیقی بہنا جو نصف لے پھر اگر بچا پدری لے بہن بس

مگر یہ علّی بنے گے وارث حقیقی جب اک بہن ہو پیارے

حقیقی بہنا جو نصف پالے بچا جو علّی وہ لیں گے سارے

ہوں جیسے دادا، سگی بہن اک، دو عِلیہ وارثینِ میت 

دو علیہ کو ملے گا دسواں کہ بیس سے ہوگا پھر برابر

ہو دادا، علاتی دو، سگی اک، ہے حصہ علاتیوں کا دسواں

برابری بیس سے ہے ممکن،کہ ایک علی کو آئے حرماں

جو چھوڑے دادا و بیٹی، شوہر اور ماں، بہن پدری یا سگی ہو

جو دادا، شوہر اور بیٹی، ماں یوں حقیقی بہنا یا پدری چھوڑے

سدس ہے دادا کی خاطر افضل، ہے عول تیرا، بہن ہے 

سدس ہے دادا و عول تیرہ، بہن یہ محروم سے بری ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

مسئلہ اکدریہ

سگی و پدری بہن نہیں فرض والی جب ہوئے دادا وارث

ہے مسلکِ زید بس یونہی پر کہ اکدریہ میں مانا وارث

لے نصف شوہر، ثلث ہے ماں کا، لے جد سدس، نصف لے بہن پھر۔گی بہنا

ہو حظ جد حظ اخت سے ضم مقاسمہ جد کو ہے حسن پھر

اصل ہے چھے، اور عول نو سے، مگر ہے دو سات سے برابر

زنِ بنی اکدریہ کا حل یا مذہبِ زید ہے مکدر

بہن کی جا ہو اگر دو بہنیں یا ایک بھائی جانشینی

نہ عول ہوگا نہ اکدریہ یہی تو ہے حکم بس یقینی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

باب المناسخہ

ہے علم میراث میں سمجھنا مناسخہ کا سبق ضروری

ہے طالبِ مجتہد پہ آساں مگر ضرورت ہے جی حضوری

مناسخہ کہتے ہیں لغت میں کہ زائلِ شئ اور کچھ مٹانا

یا قبلِ تقسیمِ ترکہ وارث کا مر کے مورث سدا بنانا

بدونِ تقسیم ترکہ وارث کا مر کے مورث سدا ہو جانا

امور چند کا لحاظ کرنا ہے قبلِ حلِ مناسخہ بس

تمام وارث کے نام و ولدیتِ صریح کا ہو تذکرہ بس

صراحتاً نامِ وارث و وارثیں کی ولدیتِ صفا بس

امورِ چند کا لحاظ رکھ کر مناسخہ اے حضور لکھنا

کہ نامِ وارث پھر ان کی ولدیتِ صفا کو ضرورلکھنا

یونہی تواریخِ وارثیں ما ممات کا ذکر تم نہ بھولو

حیات کل وارثینِ وارث بوقت مرگش کرم نہ بھولو

سہام پاے جو چند جہت سے لکھو وہ فی الید میں بائیں جانب

ہر اک بطن کی اصولِ ما مر سے ہو تخریج پہلے صاحب

سہام وارث کو گھیرا جائے کہ جو بھی اک لقمۂ اجل ہو

 امور ھذا ذہن میں رکھ کر مناسخہ پر جبھی عمل ہو

کہ ہوئے تصحیحِ بطنِ اوّل سبھی کو ان کے سہام دیجے

جو پھر مرے گھیرا جاے وارث حصص کو فی الید میں رقم کیجے

یوں مسئلہ دوسرا بناؤ تو بعدِ تصحیحِ بطنِ ثانی 

کہ نسبتِ مبلغ اور فی الید کی معرفت میں ہے کامرانی

 جو ان میں ہو نسبتِ تماثل کسی عمل کی نہیں ضرورت

مگر جو ہو نسبتِ توافق تو پھر ہے دیگر عمل کی حاجت

کہ ضرب، تصحیح کے وفق سے دو مسئلہ پہلا والا ہر دم

تو ضرب کے حاصل سے تصحیح کیجئے بے خوف و بے غم

یہی ہے مضروب وفقِ تصحیحَ زندہ پہلے سہام کل کا

ہے وفقِ فی الید کہ دوسرا یعنی زندہ نچلے سہام کل کا

ہاں مبلغِ کل کو ضرب پہلے میں دو جو ہو نسبتِ تباین

اگر تباین ہو مبلغِ کل کو ضرب دو پہلے کل میں آخر

سہام اول کو مبلغِ کل میں ضرب دینا ہے اے محرر

سہام بطنِ اخیر یعنی جو نیچے ہوں ضرب دیجئے گا، دو اے پیارے

اسی کہ بطنِ اخیر والے تمام فی الید میں کیجئے گا، حصے سارے

باب ذوی الارحام

باب ذوی الارحام

اب یہاں سے بات آئے گی ذوی الارحام کی

ان کی تقسیمِ وراثت اور کل اقسام کی

بچہ دانی، لغوی معنی ہے رحم کا جانِ من

اصطلاحاً فرض والا اور نہ ہو عصبہ جو تن

نزدِ جمہورِ ائمہ پھر ذوی الارحام کو

دو وراثت فرض و عصبہ گر نہ ہوں اقدام کو

ہے بقولِ زید بیت المال اب آخر مقام

مالکیہ، شافعیہ کا بھی ہے ایسا پیام

ہیں ذوی الارحام کی پھر چار قسمیں یاد رکھ

جیسے عصبہ میں بنفسی دل کو اپنے شاد رکھ 

اولاً میت کی سو منسوب ہوں جو رشتہ دار

کل نواسے اور اولادِ حفیدہ ہیں شمار

ثانیاً میت کی نسبت سوئے جن حضرات ہو

فاسدہ اجداد جیسے فاسدہ جدات ہو

سوم جو منسوب ہوں از والدینِ ما ممات

جیسے بھائی اور بہنوں کی ہوں اولادیں حیات

ہے چہارم جدِ میت، جدہ سے منسوب ہوں

پھوپھیاں، ماموں و خالائیں سبھی مطلوب ہوں

صنف ثانی ہے مقدم جوزجانی کے یہاں

پھر ہے اول اور ثالث پھر چہارم جاوداں

شیخ یعقوب و حسن ابنِ سماعہ نے کہا

مثل عصبہ بس وہی ترتیب اس جا ہے بجا

پہلا اول نزدِ یعقوب و محمد بعدہٗ

مرتبہ ثالث کا ہے پھر ثانی، رابع ہو بہو

فصل الصنف الاول

فرد اک ہو صنف اول میں وہ لیے گا مالِ کل

اک سے زائد ہوں تو پھر ہیں ضابطے چند مستقل

اقربِ میت فالاقرب ہوئے پہلا ضابطہ

دخترِ پوتی ہو محروم و نواسی کو عطا

صنف اول اک طرح کے اک سے زائد ہوں اگر

وارث شرعی کی اولادوں کو ہوگی اب قدر

ہوں قرابت اور قوّت ( درجے)میں برابر ذی رحم

اصلِ میت میں ذکورۃ اور انوثۃ ہے اہم

ہوں مذکر اور مؤنث متفق گر در اصول

سب کے ہاں ابدانِ فرعی سے ہو ترکہ کا نزول

ہوں مذکر اور مؤنث مختلف گر در اصول

نزدِ قاضی اور حسن ہے ضابطہ بالا قبول

اک نواسے کی ہو دختر اک نواسی کا پسر

دو ثلث لے گا پسر اور اک ثلث دختر جگر

پر محمد نے کہا ہوں اصل جس جا مختلف

ان کے حصوں سے فروع ہوں گے اخیراً متصف

اک نواسے کی ہو دختر اک نواسی کا پسر

دو ثلث لے گا پسر اور اک ثلث دختر مگر

لے نواسہ با نواسی پہلے حظ انثیین

پھر وہی دختر، پسر نزدِ محمد عین غین

قولِ قاضی غیر جازم پر بہت آسان ہے

اور محمد کا یہاں مفتی بہ فرمان ہے

ہو بطون ذی رحم جب اک سے زائد اور کثیر

ہو اصولِ بالا جس جا مختلف اے با ضمیر

پہلے اس جا وارثوں کو ہو وراثت یہ بہم

پھر ہو گروپ بندی مذکر اور مؤنث کی رقم

سابقہ حصے، فروع کو دے بس اعزاز ہو

جس بطن میں بس مؤنث ہوں نظر انداز ہو

آگے جس جا ہو مذکر اور مؤنث کا خلاف

ہوگی گرو پ بندی وہی آگے بھی قسمت صاف صاف

کسر واقع ہو کسی جا لیجے تصح کے اصول

باقی اس کی مشق کیجے تا کہ ہو سہل الحصول

ہو فروعی وارثیں میں جب تعدد روبکار

ضابطہ ہے پانچواں یہ یاد کر اے زینہار

نزدِ قاضی ضابطہ بالا سے ہو تقسیم ارث

پر محمد کے یہاں اس جا ہو پھر ترمیم ارث

ہو اصولِ وارثیں میں اب صفت کا اعتبار

نیز فرعی وارثوں کا ہو تعدد بھی شمار

 دو نواسے، ایک پوتی، ہر نواسی کی ہو گر

اک نواسے کی نواسی دو ہوں ان کے ہم سفر۔ ہم عصر

نزدِ قاضی ترکہ کی تقسیم اسباعاً کرو

حسبِ ابدانِ فروعی سے ہی دو اور دم بھرو

اصل میں تعداد فرعی کا کریں گے اعتبار

یعنی اسباعاً ملے نزدِ محمد ذی وقار

فصل

دو جہت سے ہو قرابت گر ذوی الارحام کی

نزد قاضی ہے فروع میں بس قرابت کام کی

معتبر نزدِ محمد ہے قرابت فی الاصول

اصل کی تعداد یعنی ہو فرع سے بس وصول

ہو نواسی کی دو بیٹی اور نواسہ ہو پدر

ساتھ دیگر اک نواسی کا بھی لڑکا ہو مگر

قسمتِ ترکہ ہو نزدِ قاضی اثلاثاً ادھر

دو ثلث گویا بناتِ اربعہ اک لے پسر

ہوں گے اٹھائیس حصے جو بھی ہوگا مال کل

ہے یہی قولِ محمد بعدہٗ ہو منتقل

دخترانِ دو کو دو بائیس حصے اور بس

سولہ ابّا سے اور ماں سے چھے ملیں گے اور بس

اور چھے حصے ملیں گے ابن کو تنہا یہاں

ایسا ہے من جانبِ ام بس محمد کا بیاں

فصل فی الصنف الثانی

صنفِ ثانی کا یہاں سے آ رہا ہے اب بیاں

فاسدہ اجداد اور جدات ہوں جب وارثاں

ضابطہ اولیٰ

صنف ثانی ہوں فقط اول کا کوئی بھی نہیں

اقربِ میت کا ہوگا ضابطہ بس بالیقیں

جیسے نانا ہوگا وارث پر نہ دادا کا پدر

کیوں کہ نانا، پدرِ جد سے ہے یہاں نزدیک تر

ضابطہ ثانیہ

ہوں قرابت میں برابر تو ہے قوت معتبر

کہ ابو سہل و ابو فضل و علی کی ہے خبر

واسطے وارث کے وارث ہو کسی مرحوم کا

بس وہی لے، اور دیگر کو ہے حق محروم کا

پدرِ نانا سے ہے اولیٰ پدرِ نانی محترم

کیوں کہ نانی ٹھہری وارث اور نانا ذی رحم

نزدِ بستی، جوزجانی پہلے ہو تقسیم کل

ہو مذکر اور مؤنث اصل میں جس جا مُخِل

یعنی کوئی بھی نہ ہو محروم ان میں وارثان

پہلے نانا، نانی میں تقسیم پھر لیں والدان

پدرِ نانا کو ملیں دو، سہمِ نانا تھا وہی

پدرِ نانی کو ملے اک، سہمِ نانی تھا یہی

ضابطہ ثالثہ

اک قرابت اور درجہ متحد اصل الصفت

کل کی نسبت ہو بہ وارث یا کہ سب سے معذرت

ایسے میں تقسیم ِترکہ چاہئے ابدان سے 

جدِ دادی دو و جدہ ایک لے گی شان سے

ضابطہ رابعہ

درجے میں ہوں سب برابر اصل میں ہو اختلاف

مختلف جا پہلے ترکہ کی ہو قسمت صاف صاف

پہلے گزری پدرِ نانی، پدرِ نانا میں یہ بات

اے برادر خوب سمجھو، خوب چاہے التفات

ضابطہ خامسہ

ایک درجہ ہو قرابت مختلف ہو در اصول

ایسے میں میت کا ترکہ ہوئے اثلاثا وصول

دو ثلث میت کا ترکہ لیں گے اب کے رشتہ دار

اک ثلث ماں کے قرابت دار کر لیں اختیار

نوٹ

صنف ثانی میں اصولِ بطن ہی ہے معتبر

متفق ہیں سب ائمہ ہے یہی ان کی خبر

الصنف الثالث

ضابطہ اولیٰ

مثل ثانی صنف ثالث میں ہے پہلا ضابطہ

یعنی دو اقرب سے اقرب جن کا ہوئے رابطہ

یعنی جیسے ہو بھتیجی اور بھتیجی کا پسر

تو بھتیجی ہوگی وارث ہو پسر صرف نظر

ضابطہ ثانیہ

ایک درجہ، ہوں مگر ابنائے عصبہ، ذی رحم 

ابن عصبہ لیے وراثت ذی رحم ہو کالعدم

ہو بھتیجی کا پسر بنتِ بھتیجہ ہوئے سنگ

بنتِ بھتیجہ لے وراثت اور پسر سے ہوگی تنگ

ضابطہ ثالثہ

پسر بھانجی مادری، بنتِ بھتیجی مادری

دونوں اخیافی کو ترکہ دینے میں ہے بہتری

نزدِ قاضی فرع سے اور تین سے ہو مسئلہ

ایک دختر دو پسر لے للذَّکر سے ہو ادا

پر محمد کے یہاں ہے اصل کا جب اعتبار

اصل میں اخیافی بھانجی اور بھتیجی ہے شمار

مادری بھائی بہن ہے ہوبہو قسمت میں سب

اس لئے دو سے بنے گا مسئلہ اے با ادب

ایک اخیافی برادر ایک لے اس کی بہن

پھر انہیں حصوں کو لیں گے ان کے کل فرعی بدن

ضابطہ رابعہ

متفق درجہ ہو، کل ابنائے عصبہ یا نہیں

بعضے اولاد فرائض بعضے عصبہ بالیقیں

اب یہاں اقویٰ پہ قاضی کرتے ہیں پھر اکتفاء

یعنی اخ عینی ہے اولیٰ پدری سے اور ما سوا

اصل کی چاہے جہت اور فرع کی تعدادِ ہاں

اولاً بھائی، بہن کو دو محمد کے یہاں

مادری ابناءِ فرعی میں یہی تقسیم ہو

ضابطہ یعنی محمد کا یہی تسلیم ہو

عینی،پدری، مادری اخ ہر اک کی بیٹی ایک ہو

ان کی تینوں بہنوں سے اک بیٹا، بیٹی نیک ہو

نزدِ قاضی فرع میں ہو للذَّکر سےمنتقل

عینی بچوں کو ملے محروم باقی مستقل

ابن کو دو، بنت دونوں کو ملیں گےسہم دو

یعنی عینی بھائی اور بہنوں کی بس اولاد کو

چار ہوگا مسئلہ کل دو انہیں اولاد کو

پر محمد کے یہاں ہو تین سے کل مسئلہ

فرعِ اخیافی بہن، بھائی کو ہوئے اک عطا

ما بقیہ دو ثلث یعنی کہ دو کا ہے حساب

فرعِ عینی بھائی، بہنوں کے لئے دو دستیاب

نصف سے تقسیم ہوئے فرعِ عینی میں ادھر

اخت کو فرعی عدد سے دو فرض کیجیے مگر

اس لئے عینی بہن بھائیوں کو اک اک جب ملا

عینی بہنا کے فرع میں کسر بھی ہے واقعہ

مسئلے میں ضرب دیجے گا یہاں سر کا عدد

ما حصل نو سے ہی تصحیح میں لئ جائے مدد

اور تصحیحِ اصل نو سے لئ جائے مدد

ضرب دیجے تین میں کل سہم اے عالی وقار

ما سوا علیّ کے کل حصوں میں آے گا سدھار

ضابطہ پانچواں

ذی رحم عصبہ کا بیٹا، ثانی ہو بس ذحم

ذی رحم عصبہ کا بیٹا بس ہو وارث دم بدم

عینی، پدری، مادری بھائیوں کی ہوں گر پوتیاں

عینی کی وراث ہو بس محروم دیگر پوتیاں

فصل فی الصنف الرابع

صنف رابع کا ہے اولیٰ ضابطہ، گر ایک ہو

کل کا کل وہ مال لے گا مدعا، گر ایک ہو

ضابطہ ثانیہ

ہو ذوی الارحام دو چند ہو قرابت متحد

 اقرب میت ہی لے گا کل وراثت منفرد

عینی پھوپھی کر دے ترکہ مادری عم پر حرام

عینی خالہ کو ہے پدری مادری پر اک مقام

ضابطہ ثالثہ

ہوں مذکر اور مؤنث پر قربت متفق

مثلِ حظِّ انثیَیْنِ للذَّکر ہیں مستحق

اک مذکر دو مؤنث کے مثل ہے مستحق

دو مؤنث کےحصص کا ہے مذکر مستحق

جیسے عم اور عمۃ اخیافی کو چھوڑا وارثان

چچا لے گا حصص اور ایک لے گی پھوپھی جان

ضابطہ رابعہ

ہو قرابت مختلف گر اولاً پھر دھیان رکھ

تین حصے ہوں گے ترکہ کے اسی کا مان رکھ

دو حصص کو لیں پہلے بابا جاں کے رشتہ دار

اور ماں کے کل قرابت دار پر ہو اک نثار

تحت ثانی ضابطہ پھر لے حصص اقرب تمام

اور ابعد کے لیے ہوگا یہاں حرماں پیام

عینی، پدری، مادری خالائیں تین و پھوپھیاں

پھوپھیاں دو اور ہمہ خالہ کو اک ہے یہ عیاں

عینی پھوپھی دو کا دو پھر لے بقیہ کچھ نہیں

عینی خالا اک کا اک لے وے بقیہ کچھ نہیں

خنثیٰ مشکل

ہے خَنَثْ سے کہتے خنثیٰ، ہوں نرم اعضاء جہاں

عورتوں کی چال خنثیٰ میں جو ہوتی ہے عیاں

مرد ہے خنثیٰ کہ آئے داڑھی یا انزال ہو

حمل یا سینہ ابھر آئے زنانہ حال ہو

ہے مصنف کا اشارہ خنثیٰ سے مشکل یہاں

مرد و زن کے مخفی اعضاء جس کے اندر ہوں نہاں

مرد و عورت کا جہاں پر فیصلہ دشوار ہو

حالتیں ہیں پانچ خنثیٰ یعنی مشکل ہو جو ذات

صورتیں دو مختلف ہیں، متفق فی الباقیات

بھائی ہو میت کا مشکل تو ہے حرماں کی خبر 

زندہ ہو گر ابنِ میت، پوتا، یا اس کا پدر

پوتا مشکل، بیٹے سے محرومیت منسوب ہے

حاجب حرماں کے ہوتے یہ بھی پھر محجوب ہے

ہے فقط مشکل ہی وارث، حاجب حرمان بھی

ابن کے جیسے وہ لے گا ترکہ کل سامان بھی

بھائی اخیافی ہو مشکل صورتوں میں ہے یہ سخن

ہے برابر مثل اخیافی برادر اور بہن

خنثیٰ مشکل کو مذکّر یا مؤنث مان کر

اک میں وارث تو نہیں ہے،دوسری میں ہے اگر

خنثیٰ مشکل کو مذکّر یا مؤنث کے تئیں

ارث اک میں کم ملے اور اک میں زیادہ بہتریں

پہلی تینوں صورتوں میں تو نہیں ہے اختلاف

آخری دو صورتوں میں ہے ائمہ میں خلاف

ہاں مگر بعضِ صحابہ اور اعظم نے کہا

مرد و زن ٹھہرا کے پہلے مسئلے تو دو بنا

دونوں میں دیکھو کہ جس جا مل رہا ہو کم سے کم

بس اسی سے خنثیٰ مشکل کو ملے اے محترم

جیسے میت چھوڑے بیٹا، بیٹی، مشکل وارثان

خنثیٰ کو بیٹی کا حصہ ہے یہاں پر مہربان

قولِ شعبی خصم سے بچتے ہوئے ہو منتقل

آدھا آدھا دونوں حصوں کا دیا جائے گا کل

قولِ شعبی کی یوں ویسے تو بڑی تدقیق ہے

صاحبینِ حنفیہ کی اس میں یوں تطبیق ہے

نزدِ قاضی ایک بیٹا آدھ بیٹی ڈیڑھ مل کر کل ہوا

ڈیڑھ کا پھر نصف یعنی پون خنثیٰ کو دیا

کل ملا کے ربع اور پھر دو یہ بنتا ہے تمام

ضرب دیجے کسرِ مخرج چار کو در کل سہام

ما حصل آے گا نو مضروب  ٹھہرا چار بس

چار میں اب کل حصص کو ہے یہاں درکار بس

ہے نتیجہ بیٹی دو،خنثیٰ تین و ابن چار

اس طرح سے سب کو حصہ مل رہا ہے بے غبار

بیٹا دو لے بیٹی اک لے تین بنتے ہیں سہام

اس کا آدھا ڈیڑھ کجیے گا یہاں خنثیٰ کے نام

کل ملا کے حصے ساڑھے چار بنتے ہیں یہاں

ضرب دیجے کسرِ مخرج دو، اصل میں اے جواں

ہاں نتیجہ ہے وہی جو گزری ہے پہلی مثال

بیٹا چار و بیٹی دو اور تین خنثیٰ کو بحال

پر محمد کے یہاں ہوں مسئلے دونوں رقم

مسئلے دونوں میں دیکھو، کیا ہے نسبت محترم

ہو تباین ضرب کل کو کل میں دیجے گا وہاں

ہو توافق ضرب کل میں دیجئے وفقِ رواں

ضرب دیجےسہمِ کل اک دوجے کے مضروب میں

تیسرا بھی مسئلہ لکھو ذرا مکتوب میں

پہلے دونوں مسئلوں کے جوڑئے سہمانِ کل

پھر انہیں کو تیسرے میں کیجئے گا منتقل

اس طرح چالیس سے تصحیح پائے مسئلہ

ضرب اک کو دوجے میں دینے ہوگا یہ ادا

چار کا مضروب پانچ و پانچ کا مضروب چار

مسئلہ دونوں کے حصے جمع کیجیے زینہار

بارہ بیٹا، بیٹی نو، خنثیٰ کا تیرہ ہیں سہام

مشق کر کے سمجھئے اشعار اے عالی مقام

فصل فی الحمل

حمل وارث ہوگا مورث کا ہو یا اور ذات کا

جیسے بیٹا اور نہ ہو گر پوتا ہو ما فات کا 

ہو زیادہ سے زیادہ حمل کی خاطر جدا

کم سے کم موجودہ زندہ وارثوں کو ہو عطا

حضرتِ اعظم ہیں کہتے ہے برابر حمل یہ

چار ابناء یا بنات چار کے ہے مثل یہ

مثلِ سہ نزد محمد لیث کی بھی ہے مراد

مثلِ دو نزدِ محمد،قاضی و ابنِ زیاد

قول ہے مفتیٰ بہ قاضی کا قولِ اخیر

ایک بیٹا، ایک بیٹی میں جو زائد ہو بگیر

قاضی کے اس قول پھر چاہئے ضامن ضرور

بعدِ پیدائش کرے حق سے کمی بیشی جو دور

چھے مہینے کم سے کم اکثر میں ہے پر قیل و قال

حمل کی مدت بقولِ حنفیہ دو ٹھہری سال

تین لیث و نزدِ مالک، شافعی ہیں چار عام

ہیں سنینِ سبعہ نزدِ زہری صاحب پھر پیام

چند شرائط پر حمل ترکہ سے ہوگا مستفید

وقتِ مورث جاں بحق ہو حمل کی کامل امید

مرنے والے کا ہو اپنا جو حمل ہے بر قرار

اکثرِ مدت کے اندر ہو ولادت آشکار

حاملہ کو ختمِ عدت کا نہ ہو اقرار جب

ایسے میں یہ آنے والا حمل وارث ہوگا اب

شرط ہے گر حمل ہوئے غیر مورث کی عطا

پھر اقلْ مدت کے اندر ہو ولادت با صفا

اور جنم کے وقت زندہ ہو یا پھر وقتِ ظہور

سینہ یا پھر ناف تک زندہ نکل آئے ضرور

کس طرح سے حمل کا حل کیجئے گا مسئلہ

جیسے خنثیٰ کی بحث میں شعبی کا تھا مدعا

قولِ شعبی پر محمد نے جو کی تخریج تھی

بس وہی تو چاہئے گا اس جگہ تخریج بھی

یعنی ہو نر، مادہ سے دو مسئلے پہلے رقم

مسئلے دونوں میں دیکھو، کیا ہے نسبت محترم

ہو تباین ضرب کل کو کل میں دیجے گا وہاں

ہو توافق ضرب کل میں دیجئے وفقِ رواں

ضرب دیجےسہمِ کل اک دوجے کے مضروب میں

تیسرا بھی مسئلہ لکھو ذرا مکتوب میں

 پھر جو دونوں مسئلوں میں واضح ہوتے ہوں سہام

ان میں کمتر کیجئے گا موجود کل وارث کے نام

جو حصص باقی بچیں اکثر، اقل کے درمیاں

وہ حصص موقوف رکھ جب تک حمل ہو جائے عیاں

سارے موقوفہ حصص بچے پہ ہیں کیا منطبق

بچہ پیدا ہو تو دیکھو کس کا ہے وہ مستحق

گر وہ کل کا مستحق ہو دیجئے اس کو تمام

ورنہ باقی وارثوں دینے کا ہے پھر پیام

جیسے ہو ماں باپ بیٹی اور بیوی حاملہ

اک مذکر حمل لیجے اک مؤنث سے بنا

ہو مذکر مسئلہ چوبیس سے تو کر بیان

تین بیوی، آٹھ ام، اب، تیرہ حمل و بیٹی جان

ہو مؤنث عول ستائیس ہوگا اب ادھر

تین بیوی، آٹھ ام، اب، سولہ حمل و بیٹی پر

نسبتِ چوبیس و ستائیس جو پہچان لی

ہے توافق بالثلث نسبت جو ہم نے جان لی

ہے توافق بالثلث چوبیس و ستائیس میں

وفق ستائیس نو اور آٹھ لو چوبیس میں

ضرب دیں اک وفق کو ثانی کے کل اے جواں

دو سو سولہ آخراً تصحیحِ کل ہوگی عیاں

وفقِ ہر دو میں خلافاً دیجئے گا کل سہام

مسئلے دونوں میں ہر وارث کو حصے دو تمام

حملِ مؤنث میں ہے دیکھو وارثوں کے حصے کم

اس لئے فی الفور ان دو حصص یہ محترم

بنت کاحملِ مذکر میں ہو لیکن اعتبار

چار بیٹوں کے برابر حمل کو کیجے شمار

نو حصص یہ کل ملا کرحمل و بیٹی کو ملا

آٹھ باقی رکھ کے ان ایک بیٹی کو دیا

حمل و بیٹی کے یہ کل ہیں ایک سو سترہ حصص

نو پہ ہو تقسیم، لے پھر بیٹی جاں تیرہ حصص

اک سے زائد بیٹیوں کی ہو ولادت اب اگر

کل حصص موقوفہ ان کو دینے کی ہے پھر خبر

ایک بیٹا یا کہ زائد کی جو پیدائش ہو اب

زوجہ، ام، اب کے حصص موقوفہ لوٹا ان کو سب

ایک سو اور چار سے بیٹی کے تیرہ بھی ملا

للذکر سے بیٹی، بیٹوں کو دوبارہ ہو عطا

حمل گر مردہ ہو پیدا پھر یہ موقوفہ سہام

بیوی ام اب کو ملے، ہے نصف بیٹی کا پیام

ایک سو اور آٹھ حصہ بیٹی کا ہے اب کے بار

کیوں نصفِ دو سو سولہ ہے یہی نمبر شمار

ما سوا اس کے جو بیٹی نے ہے نو حاصل کیا

باپ عصبہ ہے اسی کو دو جو کچھ زائد لیا

فصل فی المرتد

مذہبِ اسلام جو چھوڑے وہ مرتد العیاذ

موتِ مرتد،قتل یا حربی شہر کا ہو نفاذ

اس کا کل متروکہ ترکہ سہ طرح تقسیم ہو

کس کو کیا ملتا ہے دیکھو کس طرح ترسیم ہو

حالتِ مسلم میں اس نے جو کمایا ہوگا مال

ہے مسلماں وارثوں کے واسطے شرعا حلال

حالتِ مرتد میں جس بھی مال کا ہو اکتساب

قولِ اعظم ہے وہ بیت المال میں رکھو جناب

قبلِ مرتد بعدہ جس مال کا ہوئےحصول

نزدِ قاضی اور محمد وارثیں کر لیں وصول

قبلِ مرتد، بعدہ پر شافعی کا ہے پیام

رکھئے بیت المال میں مرتد کا یہ مالِ تمام

جو بھی دار الحرب میں وہ بعدِ ردت پائے گا

وہ تو بیت المال میں فئ اتفاقاً جائے گا

زن کے مسلم وارثیں گر زن ہو مرتد الامان

قبل ردت بعدہ ہر مال کے ہیں مالکان

ہاں اگر مرتدہ ہو زن کیجئے کیا الامان

قبل ردت بعدہ ہر مال کے ہیں مالکان

ہاں مگر دار الحرب سے مرتدہ کا جائے لحوق

ختم ہوگا اس سے حق ارث اور سارے حقوق

کوئی مرتد اور مرتدہ تو وارث ہی نہیں

یعنی مسلم اور مرتد کا تو ہرگز بھی نہیں

ہاں مگر مرتد ہو پورا ہی علاقہ الحذر

ہوں گے وارث ایک درجے کے وہ قریہ الحذر

فصل فی الاسیر

مثل کل مسلم وراثت میں ہے پھر حکمِ اسیر

وارث و مورث بنے گا یاد رکھ اے با ضمیر

اور نہ بیوی ہوگی بائن ہاں مگر ہو عمر قید

قید ہو دار الحرب میں کوئی مسلم تا حیات

وارث و مورث بنے دارین ہے یوں بے ثبات

ہو اگر مرتد تو مرتد کے سبھی احکام لو

اور خبر سے بے خبر مفقود کے اقسام لو

فصل فی الغرقیٰ و الحرقیٰ و الہدمیٰ

ناگہانی حادثے میں مر گئے دو چند ذات

لا علم ہوں کون پہلے، بعدہٗ کس کی ممات

ان کو مردہ سمجھا جائے گا بوقت ایک ہی

ایک درجے کے وہ وارث تو نہ ہوں گے آپسی

ہاں مگر ان کے علاوہ ہوں جو زندہ وارثان

وہ تو ان کے ہوں گے وارث ہے یہی حق البیان

بوبکر، فاروق، زید و حنفیہ اور شافعی

نقل ہے مفتیٰ بہٖ اور قول ان سے ہے یہی

ہاں بقولِ مرتضی اور ابن مسعودِ عظام

ناگہانی مرنے والے سب کی خاطر ہے پیام

یعنی ہوں گے پہلے وہ وارث سبھی باہم دگر

بعدہٗ یہ ترکہ لیں موجودہ ورثاء ہی مگر

وارثان زندہ لیں یہ ترکہ آخر میں مگر

تمت بالخیر

الحمد اللہ علی کل حال

پرھنوزادہ طارق حسین

متدرب تدریب قضاء مرکزی دار القضاء امارت شرعیہ پھلواری شریف، پٹنہ، بہار

٥/ محرم الحرام/١٤٤٦ھ

12/جولائی /2024ء

بروز جمعہ۔۔۔۔ بوقت 12:25 pm