القواعد الفقیہ

 الیقین لا یزول بالشک۔

ترجمہ۔ جو چیز یقین سے ثابت ہو وہ شک کی وجہ سے زائل نہیں ہوتی، یعنی محض شک کی وجہ سے یقینی امر کو ترک نہیں کیا جائے گا۔ 

یقین کہتے ہیں نسبت خبریہ کا وہ اعتقاد جو جازم  ہو، واقعہ کے مطابق ہو، اور کسی مشکک کے تشکیک سے زائل ہونے والا نہ ہو۔ 

شک لغت میں تردد کو کہتے ہیں، اصطلاح میں شک کہتے ہیں ایک چیز میں دونوں طرفوں کا برابر ہونا کہ دو چیزوں میں انسان ایسے سٹیج پر کھڑا ہو کہ دل نہ اس طرف مائل ہو اور نہ اس طرف۔ ( شرح الحموی علی الاشباہ صفحہ نمبر 183 القاعدۃ الثالثۃ) 

اور اس وجہ سے بھی یقین محض شک کی وجہ سے زائل نہیں ہوتا، کیونکہ فقہی احکام کا دارومدار ظاہر پر ہے، چنانچہ بہت سارے مسائل احکام شرعیہ میں ایسے ہیں کہ شریعت نے ان کو یقینی مان لیا ہے، اگرچہ بعض مرتبہ دیکھنے والے کی عقل ان کو شک کی وجہ سے خلاف واقعہ سمجھتی ہے، لیکن شریعت نے چونکہ ان کو یقینی تسلیم کیا ہے ظاہری بنیاد پر تو وہ دیکھنے والے کے شک سے زائل نہیں ہوتے۔ 

مثلا شرعی بینہ( دو آدمی یا ایک مرد دو عورتیں) سے ثابت ہونے والا معاملہ شریعت اس بینہ شرعیہ کو یقینی تسلیم کرتی ہے گویا شریعت خود اس وقت اس کی چشم دید گواہ ہے

جبکہ عقل کہتی ہے اس شرعی بینہ میں بھی خبر واحد کی طرح سہو و جھوٹ کا احتمال ہے، لیکن شریعت کی نظر میں یہ احتمال اتنا ضعیف ہے کہ اس شرعی بینہ کو یقین سے نہیں نکالا جا سکتا ہے۔ چنانچہ شرعاً  عقل اور دیکھنے والی نظر کا اعتبار نا قابل التفات ہوا۔ 

(شرح القواعد الفقہ۔ القاعدۃ ثالثہ۔ الیقین لا یزول بالشک)

مثال۔ ایک شخص نے وضو کیا کچھ دیر بعد اس کو شک ہوہوا کہ شاید وضو ٹوٹ گیا، تو سابقہ وضو کے یقین کی بنا پر وہ با وضو ہوگا، جب تک کہ اس کو حدث ( وضو ٹوٹ جانے ) کا یقین نہ ہو جاۓ، اس کو کہتے شک کی وجہ سے یقینی امر کو چھوڑا نہیں جاۓ گا، اس مسئلے کو علامہ حصکفی صاحب در نے یہ کہہ کر بیان کیا ہے۔ 

لو تیقن بالطہارۃ و شک بال حدث ( الدر المختار ج ۱ ص۶۸ مکتبہ نعیمیہ) 

مثال۔ امام محمدؒ نے فرمایا ایک شخص بیت الخلاء میں استراحت کے لئے بیٹھا، پھر اس سے شک ہوا کہ کچھ نکلا یا نہیں تو وہ محدث ہوگا، کیوں کہ استراحت کے لئے اس کا بیٹھنا یقینی امر ہے، جب کہ نکلنے یا نہ نکلنے میں شک  ہے، اس لئے یقینی امر ( استراحت کے لئے بیٹھنا) کو یقین کی وجہ سے ترجیح ہوگی، 

mashaAllah tailor

Tariq

manzoor

Manzoor 

الاختلاف کتاب الحج /پرھنوزادہ طؔارق حسین

کتاب الحج 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

مسئلہ۔ حج کس سنہ میں فرض ہوا ہے اس سلسلے میں مختلف اقوال ہیں 10،9،8،7،6،5 یہ سب اقوال اس میں وارد ہیں ان میں سے مشہور صرف دو ہے سنہ 6 اور 9 ھجری ،  حافظ ابن حجر کی راے 6 ھجری ہے اور اس قول کو ابن حجر نے جمہور کی طرف منسوب کیا ہے و اتموا الحج و العمرۃ للہ اس دلیل کی بنا پر کہ یہ 6 ھجری میں نازل ہوئی ہے دوسرا قول سنہ 9 ھجری یہ امام بخاری کی راے بھی ہے اور دلیل یہ ہے کہ وللہ علی الناس حج اللبیت من استطاع الیہ سبیلا ، یہ آیت 9 ھجری میں نازل ہوئی ہے ابن قیم جوزی رح پہلے قول کی دلیل کا جواب یہ دیتے ہیں کہ اس آیت میں اتمام حج کا حکم ہے اور حج فرضیت سے پہلے بھی حج کیا جاتا تھا جیسا کہ صحیح اخبار سے یہ ثابت ہے کہ حضور ﷺ نے فرضیت سے پہلے کئی حج کۓ ہیں اور دوسری آیت میں فرضیت کا ذکر ہے جس کو 9 ھجری میں انجام دیا گیا۔ 

اشعار۔ 

فرضِ حج ہونے میں ہے اقوال یوں تو بیشتر

ہاں مگر دو قول ان میں ہیں بہت مشہور تر

سالِ چھے ہجری ہیں ایسا کہتے  ہیں ابنِ حجر

سالِ نو ہجری میں ایسا ہے بخاری کا اثر

ہاں بقولِ ابنِ قیم چھے میں بس اتمام تھا

سالِ نو میں فرض پر آقا کا اقدام تھا

۔  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      ( ما جاء فی ارتکاب الجرائم فی الحرم) 

مسئلہ۔ حج زندگی میں صرف ایک مرتبہ فرض ہے البتہ اختلاف اس میں ہے کہ کیا حج کے وجوب کے لئے زادِ راہ ( پیسہ، نفقۂ اھل ، جانے کے لیے سواری) شرط ہے یا نہیں ائمہ ثلاثہ کے نزدیک زاد و راحلہ شرط ہے ورنہ وجوب نہ آے گا امام مالکؒ فرماتے ہیں زاد و راحلہ شرط نہیں ہے بس جو پیدل جا سکتا ہو اور راستے میں کما کرے پیٹ بھی بھر سکتا ہو اس پر حج واجب ہے۔ 

اشعار۔ 

حج فرض ہے زندگانی میں یقیناً  ایک بار

استطاعت جو کوئی جانے کی رکھے زینہار

شرط ہے نزد ثلاثہ راحلہ و زاد ہو

نزدِ مالک ماشیاً ہی گر کوئی امداد ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء فی حدود الحرم) 

مسئلہ۔ جو شخص حرم میں کسی جرم کا ارتکاب کرے تو باتفاق ائمہ اربعہ اس پر حرم میں حد قائم کی جاے گی اور جو شخص حدود حرم سے باہر کسی جرم کا ارتکاب کرے پھر حرم میں پناہ گزیں ہو جائے تو امام شافعیؒ و مالکؒ فرماتے ہیں اس پر بھی حرم میں حد قائم کی جا سکتی ہے اور امام ابوحنیفہؒ و امام احمدؒ فرماتے ہیں اس کا کھانا پینا بند کر دیا جاے گا یہاں تک کہ یہ حرم سے باہر نکلنے پر مجبور ہو جائے اور پھر خارج حرم اقامت حدود ہوگا۔ 

اشعار۔ 

مجرمانِ در حرم کو کیا پناہ دے گا حرم

حد کو قائم  کیجیے نزدِ ثلاثہ اور ہم

جرم کر کے آ  گیا ہے در حرم کیا ہے جزا

نزدِ مالک، شافعی  اس کو حرم میں دو سزا

نزد احمد، بو حنیفہ ہے حرم جاے پناہ

جرم کر کے آ گیا کرتے ہوے ہاے پناہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     (  ما جاء فی افراد الحج و القران و التمتع ) 

مسئلہ۔ حج افراد، حج قران، حج تمتع تینوں قسموں کا حج کیا جائے گا البتہ افضلیت میں اختلاف ہے امام ابوحنیفہؒ فرماتے ہیں پہلے قران افضل ہے پھر تمتع پھر افراد، امام شافعیؒ و امام مالکؒ فرماتے ہیں پہلے افراد پھر تمتع پھر قران افضل ہے امام احمدؒ فرماتے ہیں پہلے تمتع بدوں سوق ھدی افضل ہے پھر قران، پھر آخر میں افراد افضل ہے۔ 

اشعار۔ 

حج میں افراد و تمتع یا کرے حجِ قران

تینوں جائز ہیں فضیلت میں ہے اونچی کس کی شان

ہے قران و پھر تمتع پھر ہے افراداً  اخیر

نزدِ مالک، شافعی ہے برعکس اس کی نظیر

نزدِ احمد ہے تمتع  پر بدوں سوقِ ھدی

پھر قران و آخراً  افراد   کیجیے سیدی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

     ( ما جاء فی المیقات) 

مسئلہ۔ میقات پانچ ہیں 1 ذو الحلیفہ مدینہ والوں کے لیے 2 جحفہ اھل شام کے لیے 3 قرن اھل نجد کے لیے 4 یلملم اھل یمن کے لیے 5 ذات عرق اھل عراق کے لیے، پہلے چار میں اتفاق ہے کہ یہ حضورﷺ کے مقرر کردہ میقات ہیں البتہ پانچویں میں اختلاف ہے امام ابوحنیفہؒ و جمہور شافعیہ و احمدؒ فرماتے ہیں یہ بھی حضور ﷺ کا مقرر کردہ ہے البتہ امام شافعیؒ اور بعض علماء فرماتے ہیں یہ حضرت عمر رضی اللہ عنہ نے مقرر کیا ہے۔ 

اشعار۔ 

طے شدہ میقاتِ خمسہ پر پہن احرام کو

ذو الحلیفہ للمدینہ جحفہ اھلِ شام کو

قرن اھلِ نجد کا ہے پھر یلملم للیمن

للعراقی ذات عرق و ہے عرق میں کچھ چبھن

حنفیہ اور شافعیہ حنبلی فرمان ہے

یہ مقرر از نبی جو سید و سلطان ہے

یہ ہے تعیینِ عمر کہتے ہیں یہ شافعی

اور بھی کچھ عالموں کی راۓ ٹھہری ہے یہی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

     ( ما جاء لا یجوز لبسہ للمحرم) 

مسئلہ۔ اگر محرم کے پاس جوتا نہ ہو تو ائمہ ثلاثہ کے نزدیک ضروری ہے کہ ایسا محرم اپنے موزے ٹخنوں سے کاٹ کر پہنے اور امام احمدؒ فرماتے ہیں موزوں کو کاٹ کر پہننا مستحب ہے کیونکہ حدیث میں مطلقاً خفین پہننے کا ذکر ہے کاٹنے کا تذکرہ نہیں ہے۔ 

اشعار۔ 

ایسا محرم کیا کرے گا جس کو جوتا ہی نہیں

کاٹ کر نزدِ ثلاثہ موزہ پہنے بالیقیں

 نزدِ احمد قطعِ موزہ  مستحب ، اولیٰ ہے یہ

کیوں کہ مطلق در خبر جب حکمِ آقا ہے یہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

   ( اذا لم یجد الازار فلیلبس السراویل) 

مسئلہ۔ امام ابوحنیفہؒ و مالکؒ فرماتے ہیں جس محرم کے پاس ازار نہ ہو بلکہ سلی ہوئی شلوار ہو تو اس پر لازم ہے شلوار کو ادھیڑ کر اس کو چادر بناے اور پھر چادر کی طرح اوڑھے گا بدوں پھاڑے پہننے سے دم لازم ہوگا امام شافعیؒ و احمدؒ فرماتے ہیں بدوں پھاڑے دم لازم نہیں آے گا۔ 

اشعار۔ 

نزدِ اعظم اور مالک اک وہ محرم بے ازار

پھاڑ کر شلوار چادر کو کرے گا اختیار

بے اُدھیڑے فدیہ دینے میں ہے اس کی مخلصی

فدیہ لازم تو نہیں ہے نزدِ احمد، شافعی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

       ( ما جاء فی کراھیۃ التزویج المحرم الرخصۃ فیہ) 

مسئلہ۔ امام ابوحنیفہؒ فرماتے ہیں محرم کا حالتِ احرام میں نکاح کرنا کرانا صحیح ہے امام بخاری کی بھی یہی راے ہے ائمہ ثلاثہ فرماتے ہیں محرم کا نکاح کرنا کرانا جائز نہیں ہے۔ 

اشعار۔ 

پھر نکاحِ محرم و انکاح اس کا ہے بجا

یعنی جائز کہتے ہیں شیخِ بخاری، حنفیہ

پر نکاحِ محرم و انکاح کا بطلان ہے

  یہ ثلاثہ کا خلافِ حنفیہ رجحان ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

    ( ما جاء فی اکل الصید للمحرم) 

مسئلہ۔ محرم کا خود شکار کرنا یا کسی محرم کے لیے شکار کرنا یا محرم کے ایماء و اشارہ یا مدد و اعانت پر شکار کرنا بہ ہر صورت  یہ شکاری حرام ہے ، غیر محرم خود شکار کرے اپنی محنت اپنے خیال سے محرم کا اس میں کسی طرح کا کوئی دخل اندازی نہ ہو یہ شکاری بالاتفاق سب کے لیے حلال ہے، غیر محرم شکار کرے محرم کے لیے اپنی نیت سے لیکن محرم کی کوئی مدد و اعانت نہ ہو امام ابوحنیفہؒ فرماتے ہیں یہ شکاری بھی حلال ہے ائمہ ثلاثہ فرماتے ہیں یہ شکاری نا جائز حرام ہے۔ 

اشعار

کوئی صورت ہی نہیں جائز ہو محرم کا شکار

خود کرے یا غیر  اس کا یا مدد ہو مستعار

غیر محرم خود کرے ہو اپنی جاں اپنا خیال

 اتفاقاً یہ شکاری سب کی خاطر ہے حلال

غیر محرم خود کرے محرم کا من نا ہو مدد

نزدِ حنفیہ ہے یہ جائز سمجھۓ اھلِ خرد

یہ ہے نا جائز سبھی کے واسطے ہے یہ حرام

یہ کتابوں میں ثلاثہ کا ہے ملتا بس پیام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

   ( ما جاء فی صید البحر للمحرم  ) 

مسئلہ۔ محرم کے لیے سمندر کا شکار حلال ہے اور خشکی کا جانور حرام ہے اب اختلاف ا س میں ہے کہ جراد صید البحر ہے یا صید البر جمہور  ائمہ فرماتے ہیں جراد صید البر ہے اس کے قتل سے جزا لازم آے گی بعض سلف کا کہنا ہے یہ صید البحر ہے اس کے قتل سے جزا لازم نہ آوے گی یہی راے شاید امام ترمذیؒ کی بھی ہے اس باب سے۔ 

اشعار۔ 

صیدِ بحری محرموں کے واسطے ٹھہرے حلال

اور نا جائز ہے صید بر یہ ہے سب کا خیال

نزدِ جمہورِ ائمہ صید بر میں ہے جراد

قتل سے اس کے جزا دے سب کا ہے یہ اتحاد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

          ( ما جاء فی الضبع للمحرم ) 

مسئلہ۔ جمور ائمہ فرماتے ہیں ضبع صید ہے اس کے مارنے سے جزا لازم ہے اور ضبع ( کفتار، ہنڈار) امام احمدؒ و شافعیؒ کے نزدیک حلال ہے اور امام مالکؒ و امام اعظم کے نزدیک حرام ہے۔ 

اشعار۔ 

صید میں نزدِ ائمہ پھر وہ اک کفتار ہے

قتل سے اس کے بھی محرم دم کا  پھر حقدار ہے

نزدِ اعظم اور مالک ضبعَ ٹھہرا پھر حرام

نزد احمدؒ، شافعیؒ حلت کا آیا ہے پیام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

        ( ما جاء فی کراھیۃ رفعِ الید عند رؤیت البیت) 

مسئلہ۔ جب کعبۂ شریف زادھا اللہ  شرفا و عظمۃ پر پہلی نظر پڑے اور پہلی مرتبہ مکہ میں داخل ہوا ہو تو ائمہ ثلاثہ فرماتے ہیں ہاتھ اٹھا کر دعا کرنا مستحب ہے اور امام مالکؒ فرماتے ہیں بدوں ہاتھ اٹھاے دعا کرنا مستحب ہے۔ 

اشعار۔ 

جب نظر آۓ گا کعبہ اپنے ہاتھوں کو اٹھا

ساتھ تو نزدِ ثلاثہ بندے کر لے کچھ دعا

حضرتِ مالک ہیں کہتے رفعِ ید بالکل نہ ہو

مستحب کا ہے یہ جھگڑا تو ملولِ دل نہ ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

   ( ما جاء فی الرمل من الحجر الی الحجر) 

مسئلہ۔  جمور صحابہؓ و تابعین و ائمہ مجتہدین رحمہم اللہ فرماتے طواف میں رمل سنت ہے اور بعض صحابہ جیسے ابن عباس ؓ فرماتے ہیں رمل سنت نہیں ہے جی چاہے کرے نہ چاہے تو نہ کرے۔ 

اشعار۔ 

ہاں یہ جمہورِ صحابہ اور ائمہ نے کہا

بس رمل کیجیے کہ یہ ہے سنتِ بدر الدجیٰ

بعض اصحابِ محمد نزدِ عبد اللہ  بھی

یہ رمل سنت نہیں تخییر میں ہے بہتری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

    ( ما جاء فی استلام الحجر و الرکن الیمانی) 

مسئلہ۔ جمہور صحابہ کرام و تابعین و ائمہ رحمھم اللہ فرماتے ہیں صرف دو رکن یمانی کا استلام سنت ہے اور حضرت معاویہؓ اور بعض صحابہ کرام رضی اللہ عنہم فرماتے چاروں رکن یمانی کا استلام کرے سنت ہے

شعر۔ 

دو یمانی رکن کا سنت فقط ہے استلام

بعض کا کہنا ہے سب ارکان کا ہو اہتمام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

   ( ما جاء فی السعی بین الصفا و المروۃ) 

مسئلہ۔ امام ابوحنیفہؒ فرماتے ہیں صفا اور مروہ کے درمیان سعی کرنا واجب ہے ائمہ ثلاثہ کے نزدیک سعی بین الصفا و المروہ فرض اور ارکان میں سے ہے اور بعض کے نزدیک مستحب ہے یہی ایک روایت امام احمدؒ کی ہے ارکان ہونے پر ائمہ ثلاثہ مسلم کی یہ روایت پیش کرتے ہیں ما اتم اللہ حج من لم یطف بین الصفا و المروہ۔ 

اشعار۔ 

اور واجب ہے سعی بین الصفا ، مروہ کرو

یہ ہے نزدِ بو حنفیہ ترک ہو تو دم بھرو

پر ثلاثہ نے کہا ہے ہے سعی ارکان میں

ما اتم لفظ کیا آیا نہیں فرمان میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      ( ما جاء في الصلاۃ فی الکعبہ) 

امام ابوحنیفہؒ و امام شافعیؒ فرماتے ہیں کعبہ کے اندر  فرض،نفل پڑھنا سب جائز ہے امام مالکؒ و احمدؒ فرماتے ہیں صرف نفل پڑھنا جائز ہے

شعر۔ 

پڑھ درونِ کعبہ نزدِ شافعی، اعظم نماز

مالک و احمد ہیں کہتے ہے نفل کا بس جواز

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

     ( ما جاء فی تقصیر الصلاۃ بمنیٰ) 

مسئلہ۔ ائمہ ثلاثہ فرماتے ہیں منیٰ میں قصر شرعی سفر کی وجہ سے ہے اس لئے اھل مکہ قصر نہ کریں وہ مسافر نہیں ہیں امام مالکؒ فرماتے ہیں منیٰ میں قصر حج کی وجہ سے ہے اس لئے اھل مکہ بھی قصر کریں گے۔ 

شعر۔ 

قصر ہے نزدِ ثلاثہ پھر منی میں بالسفر

حضرت مالک ہیں کہتے حج کی باعث ہے قصر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

      ( ما جاء ان العرفات کلھا موقف) 

مسئلہ۔ عرفات میں عصر کو ظہر کے وقت ہی پڑھا جاے گا اس کو جمع تقدیم کہتے ہیں اس کے لئے امام ابوحنیفہؒ کے نزدیک جماعت شرط ہے منفرد جمع نہ کرے اور ائمہ ثلاثہ و صاحبین رحمہم اللہ فرماتے ہیں منفرد بھی جمع کر سکتا ہے۔ 

اشعار۔ 

نزدِ اعظم ہے جماعت شرط پھر عرفات میں 

جمعِ تقدیمِ عصر اور ظہر کے لمحات میں

نزدِ قاضی و محمد اور ثلاثہ نے کہا

انفراداً بھی جمع کرلے تو کیا س میں خطا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      (  ما جاء فی الجمع بین المغرب و العشاء بالمزدلفہ) 

مسئلہ۔  مزدلفہ میں عشاء آخر کے وقت مغرب بھی پڑھی جاے گی اس کو جمع تاخیر کہتے ہیں امام ابوحنیفہؒ کے نزدیک ان میں دو اذانیں اور ایک اقامت ہے امام شافعیؒ کے نزدیک ایک اذان دو اقامتیں، امام مالکؒ کے نزدیک دو اذانیں دو اقامتیں، امام احمد کے نزدیک دو اقامتیں فقط اذان نہیں کہی جاے گی۔ 

اشعار۔ 

اور عشاء، مغرب میں ہوگا جمعِ تاخیرِ صلوٰۃ

نزدِ اعظم دو اذانیں اک اقامت کا ثبات

بر عکس کہتے ہیں اس کے وہ امام شافعیؒ

دو اذانیں دو اقامت کہتے ہیں یہ مالکی

نزدِ احمد دو اقامت سے چلے گا کام بس

مزدلف میں ان نمازوں کا کرے اتمام بس

۔ ۔ ۔ ۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

         (ما جاء فی من ادرک الامام بجمع فقد ادرک الحج) 

مسئلہ۔ ائمہ ثلاثہ فرماتے ہیں وقوف عرفہ کا وقت 9 ذوالحجہ وقتِ زوال سے لے کر 10 ذو الحجہ صبح صادق تک ہے امام احمدؒ فرماتے ہیں 9 ذو الحجہ صبح صادق سے 10 ذو الحجہ صبح صادق تک ہے گو صرف ابتداء وقت میں اختلاف ہے۔ 

شعر۔ 

وقتِ عرفہ ہے طلوعِ صبح احمد کا خیال

پر ثلاثہ نے کہا ہے نو کے دن وقت الزوال

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

          ( ایضًا) 

مسئلہ۔ امام ابوحنیفہؒ کے نزدیک وقوف عرفہ واجب ہے اور ائمہ ثلاثہ کے نزدیک سنت ہے۔ 

شعر۔ 

پھر وقوفِ مزدلف واجب ہے نزدِ حنفیہ

یہ سنن میں ہے نبیؐ کے یہ ثلاثہ نے کہا

 ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      ( ما جاء فی الاشتراک فی البدنۃ و البقر) 

مسئلہ۔ ائمہ ثلاثہ کے نزدیک ایک اونٹ گاے وغیرہ میں صرف سات آدمی شریک ہو سکتے ہیں زائد نہیں بقول بعض امام مالکؒ کے نزدیک پورا گھر شریک ہو سکتا ہے چاہے زیادہ ہی کیوں نہ ہو اسحاق بن راہویہ کے نزدیک دس آدمی شریک ہو سکتے ہیں۔ 

شعر۔ 

بُدنۂ واحد میں ہوں گے سات بندے بس شریک

یہ ثلاثہ کا ہے مسلک نزدِ مالک گھر بھی ٹھیک

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

      ما جاء فی اشعار البدن ) 

مسئلہ۔ ائمہ ثلاثہ فرماتے ہیں اشعار بُدن سنت ہے صاحبین کے نزدیک حسن (اچھا) ہے امام ابوحنیفہؒ کی طرف کراہت منسوب ہے وہ اس لئے کہ شاید اس زمانے میں اشعار کرنے میں لوگ زیادتی کرتے تھے جس سے جانور مجروح ہوتا تھا اس لئے سدِ فساد عوام کے لئے قول مکروہ مروی ہے ورنہ یہ حسن ہی ہے۔ 

اشعار۔ 

پھر ثلاثہ کے یہاں سنت ہے اشعارِ بدن

 صاحبین حنفیہ نے ہے کہا یہ ہے حسن

بو حنیفہ نے کہا مکروہ ایسا اہتمام

پر ہے یہ سدِ فساد کل زمانہ اور عوام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

     ( ما جاء فی اشعار الغنم) 

مسئلہ۔ امام احمدؒ و امام شافعیؒ کے نزدیک تقلید غنم ( بکری)  مستحب ہے امام مالکؒ و امام ابوحنیفہؒ کے نزدیک تقلید غنم جائز نہیں ہے۔ 

شعر۔ 

نزدِ احمد، شافعیؒ ہوے تقلیدِ غنم

مستحب یہ نہیں ہے نزدِ مالک اور ہم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

     ( ما جاء فیمن حلق قبل ان یذبح) 

مسئلہ۔ نحر کے دن چار کام ہے پہلے رمی پھر ذبح پھر حلق پھر طوافِ زیارت، امام مالکؒ و امام ابوحنیفہؒ کے نزدیک ان میں ترتیب اسی طرح واجب ہے خلافِ ترتیب ادا کرنے سے دم لازم ہوگا  احناف کے یہاں طواف زیارت وجوب ترتیب سے خارج ہے اور اگر حج افراد ہو تو قربانی بھی وجوب ترتیب سے خارج ہے اور امام احمدؒ و شافعیؒ کے نزدیک ان میں ترتیب سنت ہے۔ 

اشعار۔ 

ہو رمی پھر ہو ذبح ، حلق و طواف، یوم النحر

واجب الترتیب نزدِ اعظم و مالک جگر

نزدِ احمد،شافعی ترتیب سنت ہے فقط

سنتِ ترتیب میں ہی ان کو رغبت ہے فقط

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

     ( ما جاء فی العمرۃ) 

مسئلہ۔ امام ابوحنیفہؒ و امام مالکؒ فرماتے ہیں عمرہ سنت ہے اور امام شافعیؒ و امام احمدؒ فرماتے ہیں عمرہ واجب ہے۔ 

شعر۔ 

عمرہ سنت ہے یہ نزدِ مالکیہ، حنفیہ

اور واجب شافعی و ابنِ حنبل نے کہا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      ( ما جاء فی الاحصار ) 

مسئلہ۔ احناف کے یہاں عازمِ حج کو کوئی بھی رکاوٹ در پیش ہو تو وہ محصر بن جاتا ہے اور ائمہ ثلاثہ فرماتے ہیں احصار صرف دشمن کی وجہ سے لازم آے گا 

شعر۔ 

 اور دشمن سے ثلاثہ کے یہاں احصار ہے

نزدِ حنفی نفقہ، دشمن یا کوئی بیمار ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء فی القارن یطوف طوفاً واحدا) 

مسئلہ۔ اس پر سب کا اتفاق ہے کہ قارن تین طواف کرتا ہے 1 طواف قدوم یہ سنت ہے 2 طواف زیارت یہ فرض ہے 3 طواف صدر یہ واجب ہے اور یہ بھی صحیح ہے کہ حضورﷺ نے تین طواف فرماے ہیں 1 ٤ ذو الحجہ کو 2 ١٠ ذو الحجہ کو 3 ١٤ ذو الحجہ کو۔ 

امامِ ابوحنیفہؒ اور آپ کے اصحاب فرماتے ہیں قارن پر دو طواف و دو سعی فرض ہیں ایک عمرہ کے لئے ایک حج کے لئے اور ائمہ ثلاثہ فرماتے ہیں قارن پر صرف ایک طواف اور ایک سعی ہے امام احمدؒ کی ایک روایت مثل احناف بھی ہے۔ 

اشعار۔ 

نزدِ حنفیہ ہے قارن کے لئے پھر دو طواف

دو سعی بھی فرض ہے پر ہے ثلاثہ کا خلاف

اک طواف و اک سعی ہے یہ ثلاثہ نے کہا

اک روایت ابنِ حنبل کی ہے مثلِ حنفیہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      ( ما جاء في المحرم یموت فی احرامہ) 

مسئلہ۔ امامِ ابوحنیفہؒ و مالکؒ فرماتے ہیں موت سے محرم کا احرام ختم ہو جاتا ہے اس لئے اس کے ساتھ عام اموات جیسا معاملہ کیا جاے گا یعنی سر کو ڈھانکا جاے گا امام احمدؒ و شافعیؒ فرماتے ہیں موت سے احرام فوت نہیں ہوتا ہے اس لئے محرم کا سر ڈھانکا نہ جاے گا۔ 

شعر۔ 

نزدِ اعظم اور مالک موت سے احرام فوت

نزدِ احمد، شافعیہ کیا کرے محرم کو موت

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

8 february 2023

چہار شنبہ    ١٦ رجب    ؁۱۴۴۴ ھ 

وقت                              05 :2

الاختلاف کتاب الصوم / پرھنوزادہ طارق حسین

                     (   کتاب الصوم  )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
                  ( ما جاء لا تتقدموا الشہر بصوم)
مسئلہ۔ جمہور ائمہ فرماتے ہیں کہ نصف شعبان کے بعد نفل کی نیت سے روزہ رکھنا جائز ہے اکثر شوافع حضرات کہتے ہیں جائز نہیں ہے کیونکہ حضرت ابو ھریرہ رضی اللہ عنہ سے مروی ہے اذا انتصف شعبان فلا تصوموا۔ امام طحاوی رح فرماتے ہیں یہ نفی ضعیف کے لئے ہے اور قوی کے لیے جواز ہے اس تطبیق کے بارے میں علامہ ابنِ حجر ؒ فرماتے ہیں ھذا جمع حسن۔ 

اشعار۔ 
پچھلے پندرہ دن نفل جائز ہے پھر شعبان میں
نزدِ جمہورِ ائمہ یہ بھی ہے فرمان میں
شافعیہ میں سے اکثر نے کہا عدمِ جواز
لا تصوموا  کی وجہ سے کرتے ہیں وہ احتراز
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

             ( من لم یعزم من اللیل) 

مسئلہ۔ امام مالکؒ فرماتے ہیں روزوں کی نیت رات سے کرنا فرض ہے چاہے رمضان ہو یا غیر رمضان، امام احمد و شافعیؒ فرماتے ہیں فرض روزوں میں رات سے نیت فرض ہے، فرض کے علاوہ روزوں کے لیے زوال سے قبل تک نیت کرنا درست ہے، امام ابوحنیفہؒ فرماتے ہیں نذر مطلق اور قضاء رمضان میں تبییت ضروری ہے رمضان، نذر معین اور نفل میں قبل الزوال تک درست ہے۔ 

اشعار۔ 

نزدِ مالک روزوں کی نیت  میں پھر تبییت ہے
نزدِ احمد، شافعی بس فرض میں تثبیت ہے
بو حنیفہ نے کہا ہے نذرِ مطلق اور قضاء
اوروں میں قبلِ زوالِ شمس تک کر لے ادا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

       ( ما جاء فی الصوم عن المیت) 

مسئلہ۔ امام احمد و شافعی رحمہما اللہ فرماتے ہیں جو شخص اس حال میں مرا کہ اس کے ذمے روزے تھے تو اس کا ولی اس کے بدلے قضاء کر لے، امام مالک و امام ابوحنیفہ رحمہما اللہ فرماتے ہیں ولی میت کی طرف سے صرف فدیہ دے سکتا ہے روزہ نہیں رکھ سکتا ہے۔ 

اشعار۔ 
مرنے والے پر تھے روزے تو ولی کر لے قضاء
حنبلی و شافعیہ نے ہے ایسا ہی کہا
مالک و اعظم نے فرمایا ولی دے گا فداء
صوم کیا کوئی کسی کے بدلے کر لے گا ادا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء ان الصوم لرؤیۃ الھلال) 

مسئلہ۔ رمضان کی صحیح تاریخ معلوم کرنے کے تین طریقے ہیں 1 رؤیت ھلال 2 گوہان شرع ( اگر مطلع صاف نہ ہو اگر صاف ہو تو پھر جمِ غفیر کی شہادت درکار ہے) 3 شعبان کے تیس دن پورے ہو جائیں۔ 

اشعار۔ 
ہے علامت ماہِ رمضاں کی چمک اٹھے ہلال
یا گواہانِ شرع رؤیت کی دیں کوئی مثال
یا کہ پورے تیس دن  ہوۓ ختم شعبان کے
پھر تو روزے رکھ لے پیارے سب کے سب رمضان کے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

           ( ایضاً) 

مسئلہ۔ روئتِ ھلال کے بارے میں نجومیوں کی شہادت کا کوئی اعتبار نہیں روافض نجومیوں کی خبر کا اعتبار کرتے ہیں۔ 

اشعار۔ 

پھر نجومی کی شہادت کا نہیں کچھ اعتبار
اور روافض کرتے ہیں ان کی شہادت اختیار
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

       ( کراھیۃ صوم یوم الشک ) 

مسئلہ۔ امام ابوحنیفہؒ فرماتے ہیں یوم الشک میں فرض کے علاوہ روزہ رکھنا جائز ہے یہی امام مالکؒ کا مسلک بھی ہے امام شافعیؒ فرماتے ہیں رمضان اور نفل مطلق جائز نہیں ہے اور امام احمدؒ کی اس سلسلے میں تین رویات ملتی ہیں 1 رمضان کی نیت سے روزہ جائز ہے 2 مثل قول شافعیؒ 3 حاکم وقت کا فیصلہ ہو۔ 

اشعار۔ 
صوم یوم الشک ہے جائز ہاں فرض کے ما سوا
مسلکِ مالک یہی ہے اور قولِ حنیفہ
نیز نفلی صوم نا جائز ہے نزدِ شافعی
تین مرویّات ملتی ہیں کتب میں حنبلی
ایک مثلِ شافعی یا فرض رمضان کا
یا ہو کوئی فیصلہ یہ وقت کے شاہان کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔ 

          ( ما جاء فی الصوم بالشہادۃ ) 

مسئلہ۔ امام ابوحنیفہ ، امام شافعی اور امام احمد رحمہم اللہ فرماتے ہیں اگر آسمان ابر آلود ہو تو رمضان کا چاند دیکھنے میں ایک عادل کی خبر بھی معتبر ہے اور امام مالکؒ فرماتے ہیں دو عادل گواہ یعنی بینۂ شرعی چاہۓ 

اشعار۔ 
رؤیتِ رمضان میں پھر ایک عادل کی خبر
بو حنیفہ ، شافعی، احمد نے جانا معتبر
نزدِ مالک گر ہو بادل سے ملوث آسماں
لازماً پھر چاہۓ  گا دو گواہاں عادلاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء فی ان الفطر یوم تفطرون) 

مسئلہ۔ جس کسی نے چاند دیکھا اور شہادت بھی دی لیکن کسی وجہ سے اس کی شہادت رد کر دی گیٔ اگر یہ شہادت ھلال رمضان کے لئے ہو تو سب متفق ہے یہ شخص تنہا روزہ رکھے گا اور اگر یہ ھلال شوال کی گواہی میں مردود ٹھہرا تو امام شافعیؒ فرماتے ہیں یہ تنہا چھپ کے افطار کرے گا پر ائمہ ثلاثہ فرماتے ہیں یہ شخص روزہ بھی رکھے گا اور خود تنہا عید بھی مناۓ ( روزہ رکھنے میں ہی احتیاط ہے) 

اشعار۔ 
چاند دیکھا پر شہادت میں نہ ٹھہرا وہ مصاب
نزدِ کل روزہ رکھے گا بس وہی تنہا جناب
ہاں ہلالِ عید میں مروی ہے نزدِ شافعی
بندۂ ناظر کو چاہیے کر لے افطارِ خفی
پر ثلاثہ نے کہا ہے روزہ رکھے گا ضرور
جشن یومِ عید کے بھی وہ مزے لے گا حضور
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

        ( ما جاء فی بیان الفجر) 

مسئلہ۔ جمہور صحابہ ، تابعین اور ائمہ مجتہدین کے نزدیک سحری کی انتہا صبح صادق ہے بعض سلف امام اعمش و معمر کے نزدیک طلوع آفتاب تک ہے۔ 

شعر۔ 
سحری میں ہے نزدِ کل پھر صبحِ صادق انتہاء
نزدِ اعمش وہ طلوعِ شمس تک لے گا مزا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔  

  ( ما جاء فی کراھیۃ الصوم فی السفر والرخصۃ فیہ) 

مسئلہ۔جمہور کے نزدیک مسافر کے لے رمضان کا روزہ جائز ہے بعض اصحاب ظواہر کہتے رمضان کا روزہ فرض ہے۔ 

شعر۔ 

ہے مسافر  کو جوازِ صوم پھر نزدِ تمام
بعض ظاہر نے کہا جائز نہیں صومِ صیام
۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔ 

 ( ما جاء فی الرخصۃ فی الافطار للحبلیٰ و المرضعۃ ) 

مسئلہ۔ حاملہ و مرضعہ کو اگر ذاتی نقصان کا اندیشہ ہو تو بالاتفاق وہ افطار کرے اور پھر ان روزوں کی قضاء کرے کفارہ اور فدیہ اس پر لازم نہیں ہے ہاں اگر بچے کے نقصان کا خوف ہو تو اس میں اختلاف ہے امام ابوحنیفہؒ فرماتے ہیں اس صورت میں بھی صرف قضاء کرے اور ائمہ ثلاثہ فرماتے ہیں قضاء کے ساتھ ساتھ فدیہ بھی دے گی۔ 

اشعار۔ 

ذاتی نقصاں میں حوامل،مرضعہ کو ہے قضاء
نزدِ کل جائز نہیں کفارہ ہو یا دیں فداء
حاملہ و مرضعہ کو ہو جو بچے کا ضرر
نزدِ کل افطار کر لیں گی بلا خوف و خطر
نزدِ حنیفہ قضاء ہے اس پہ نا کچھ اور ہے
ہے قضاء نزدِ ثلاثہ اور فداء پر زور ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

   ( ما جاء فی الصوم عن المیت ) 

مسئلہ۔ جمہور کے نزدیک میت کی طرف سے اس کا ولی روزہ نہیں رکھ سکتا ہے امام احمد سے ایک روایت یہ ہے کہ نذر کا روزہ میت کی طرف سے ولی رکھ سکتا ہے اور ظاہریہ کہتے ہیں مطلقاً ہر طرح کا روزہ رکھ سکتا ہے۔ 

اشعار۔ 
نزدِ کل میت کے بدلے صوم سے ہو احتراز
نزدِ احمد نذر روزے کا ہے ملتا   پھر جواز
ظاہریہ نے کیا ہے ظاہری یہ فیصلہ
مطلقاً جائز ہے روزہ کیا نذر اور کیا قضاء
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

       ( ما جاء فی الصائم یذرعہ القئ ) 

مسئلہ۔ روزہ دار کے قئ ہونے سے ائمہ اربعہ کے نزدیک روزہ نہیں ٹوٹتا ہے البتہ اگر صائم عمدا قئ کرے تو روزہ ٹوٹ جاے گا بعض سلف کا کہنا ہے کہ قئ مطلقاً مفطر صوم ہے اور بعض کے نزدیک مطلقاً مفسد صوم نہیں ہے۔ 

اشعار۔ 
مفسداتِ صوم نزدِ اربعہ ہے استقاء
اور قئ ہے غیر مفسد بے خبر کچھ ہے پتا
مطلقاً مفطر ہے قیٔ کہتے ہیں یہ بعضِ سلف
مطلقاً ہے غیر مفطر  کہتے ہیں یہ کچھ خلف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      ( ما جاء فی الصائم یأکل و یشرب ناسیاً) 

مسئلہ۔ جو شخص بھولے سے کھا پی لے ائمہ ثلاثہ کے نزدیک اس کا روزہ نہیں ٹوٹتا جب روزہ نہیں ٹوٹا تو قضاء بھی لازم نہیں اور امام مالکؒ فرماتے ہیں اس کا روزہ ٹوٹ جائے گا اور قضاء لازم ہے۔ 

اشعار۔ 
بھولے سے صائم اگر کھاے  تو بھولے کھاے جا
نزدِ اعظم، شافعی، احمد نہیں اس پر قضاء
حضرت مالک ہیں کہتے فرض رکھ بارِ دگر
  یعنی ہے رمضان روزے کی قضاء لازم جگر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء فی کفارۃ الفطر فی رمضان) 

مسئلہ۔ جو شخص رمضان کا روزہ عمداً توڑ دے امام ابوحنیفہؒ و امام مالکؒ فرماتے ہیں اس پر کفارہ لازم ہے چاہے زوجہ سے صحبت کر کے یا عمداً کھا پی کر روزہ توڑ دے امام احمد ؒ و امام شافعیؒ فرماتے ہیں جماع سے کفارہ لازم ہوگا کھانے پینے سے صرف قضاء لازم ہے۔ 

اشعار۔ 
بالارادہ روزۂ رمضان جو توڑے کوئی
اس پہ کفارہ ہے نزدِ بو حنیفہ، مالکی
مفطراتِ صوم سے ہے مفطرِ کامل مراد
یعنی صحبت اور کھانے، پینے سے آے فساد
حضرت احمد امام شافعی نے ہے کہا
بالجماع کفارہ ہے اور کھانے پینے سے قضاء
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔ 

        ( ایضًا) 

مسئلہ۔ ائمہ ثلاثہ فرماتے ہیں کفارہ ادا کرنے میں ترتیب واجب ہے اگر ترتیب چھوڑ دے تو دوبارہ از سر نو کفارے کی ابتداء کرنی ہوگی اور امام مالکؒ فرماتے ہیں تخییر بہتر ہے۔ 

شعر۔ 

پھر ثلاثہ نے کہا کفّارے میں ترتیب ہے
اور مالک نے کہا تخییر میں تصویب ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

         ( ایضًا) 

مسئلہ۔ ائمہ ثلاثہ فرماتے ہیں جماع کی وجہ سے کفارہ دونوں ( مرد و زن فاعل مفعول) پر لازم ہے اور امام شافعیؒ فرماتے ہیں کفارہ مرد کے لئے ہے عورت کے لئے نہیں۔ 

شعر۔ 
بالجماع کفارہ دیں گے یعنی دونوں مرد و زن
مرد کی خاطر ہی نزدِ شافعی ٹھہرا حسن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

        ( ایضاً ) 

مسئلہ۔ امام ابوحنیفہؒ و امام مالکؒ فرماتے ہیں محتاج تنگدست پر بھی کفارہ لازم ہے امام احمدؒ و شافعیؒ فرماتے ہیں محتاج پر کفارہ لازم نہیں ہے۔ 

شعر۔ 

مفتقر کفارہ دے گا نزدِ مالک اور ہم
نزدِ احمد، شافعی محتاج سے ہے کالعدم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

          ( ایضاً) 

مسئلہ۔ جمہور ائمہ کے نزدیک کفارہ نہ خود کھا سکتا ہے نہ اپنے اھل و عیال کو کھلا سکتا ہے

شعر۔ 
مالِ کفارہ نہ خود کھاے نہیں اس کا عیال
متفق ہے سب ائمہ ہے یہی ان کا خیال
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

        ( ایضاً) 

مسئلہ۔ امام ابو حنیفہ و امام شافعی رحمہما اللہ فرماتے ہیں جو صائم بھولے سے جماع کر لے اس پر قضاء و کفارہ نہیں ہے اور امام احمدؒ فرماتے دونوں ( قضاء و کفارہ) لازم ہے اور امام مالکؒ فرماتے ہیں صرف قضاء لازم ہے کفارہ نہیں۔ 

اشعار۔ 
نے قضاء ، کفارہ دے گا نزدِ اعظم، شافعی
بھولے سے کھاے گا نسیاناً جو کوئی آدمی

اور احمد نے کہا اس پر ہے دونوں کی ادا

حضرت مالک نے فرمایا کہ ہے لازم قضاء

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

        ( ایضاً ) 

مسئلہ۔ جو شخص عمدا رمضان کا روزہ توڑ دے اس پر کفارہ بالاتفاق لازم ہے البتہ کیا کفارہ کے ساتھ قضاء بھی لازم ہے یا نہیں اس سلسلے میں ائمہ ثلاثہ فرماتے ہیں اس پر قضاء بھی لازم ہے اور امام شافعیؒ فرماتے ہیں قضاء لازم نہیں ہے۔ 

شعر۔ 

پھر قضاء بھی چاہے گا یہ ثلاثہ نے کہا
شافعی سے ہے قضاء بھی اور اک عدمِ قضاء
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

    ( ما جاء فی السواک للصائم) 

مسئلہ۔ امام ابوحنیفہؒ فرماتے ہیں صائم کے لیے مسواک کرنا مستحب ہے رطب ہو یا یابس امام شافعیؒ فرماتے ہیں قبل الزوال مستحب ہے بعد الزوال مسواک کرنا مکروہ ہے رطب ہو یا یابس امام مالکؒ فرماتے ہیں رطب ( تر) مسواک مکروہ ہے خشک جائز ہے قبل الزوال ہو یا بعد الزوال امام احمدؒ کی اس میں دو روایتیں ہیں ایک مثل مالک ایک مثل شافعیؒ۔ 

اشعار۔ 
مستحب مسواک للصائم ہے حنفی کا مقال
اور ہے مکروہ نزدِ شافعی بعد الزوال
خشک ہو مسواک ایسا کہتے ہیں وہ مالکی
مثلِ مالک قولِ احمد اور مثلِ شافعی
۔۔۔۔۔۔۔۔۔۔۔۔۔۔۔۔۔۔۔۔۔ ۔۔ ۔۔۔۔۔۔۔۔۔۔۔۔۔۔۔۔۔۔ ۔۔ ۔ 

        ( ما جاء في الکحل للصائم ) 

مسئلہ۔ امام ابوحنیفہؒ و امام شافعیؒ فرماتے ہیں روزہ دار کے لیے سرمہ لگانا جائز ہے اور امام احمدؒ و امام مالکؒ فرماتے ہیں صائم کے لیے سرمہ لگانا جائز نہیں ہے۔ 

شعر۔ 
بو حنیفہ، شافعی کہتے ہیں سرمہ بھی لگا
احمد و مالک ہے صَائم کے لئے اس پر خفا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

        ( ما جاء فی تقبیل الزوجۃ للصائم) 

مسئلہ۔ امام ابوحنیفہؒ، امام شافعیؒ اور امام احمد فرماتے ہیں روزہ دار اپنی اھلیہ کا بوسہ لے تو جائز ہے جبکہ کوئی خطرہ لاحق نہ ہو بلکہ امام احمدؒ کے نزدیک مطلقا قبلہ مباح ہے چاہیے خطرے کا اندیشہ ہی کیوں نہ ہو اور امام مالکؒ فرماتے ہیں صائم کا بوسہ لینا مطلقاً مکروہ ہے۔ 

اشعار۔ 
بوسۂ زن لے بلا خوف و خطر وہ روزہ دار
بو حنیفہ، شافعی، احمد کو ہے اس سے قرار
نزدِ احمد ہے جواز بوسہ ہی قولِ شہیر
مطلقاً نا جائز ہے ایسا نزدِ مالک رہ بگیر
۔۔۔۔۔۔۔۔۔۔۔۔۔!۔۔۔۔۔۔۔۔۔۔۔۔۔۔۔۔۔۔۔۔۔۔ 

         ( ما جاء فی افطار الصائم المتطوع و ایجاب القضاء علیہ) 

مسئلہ۔ امام ابوحنیفہؒ فرماتے ہیں نفل کو شروع کرنے سے نفل لازم ہو جاتا ہے اس لیے جو نفل روزہ رکھ کر توڑ دے اس پر قضاء لازم ہے امام شافعیؒ فرماتے ہیں نفل کی قضاء لازم نہیں ہے امام احمدؒ و امام مالکؒ کی دو روایتیں ہیں ایک مثل شافعیؒ اور ایک مثل حنفیہ۔ 

اشعار۔ 
نفل کو توڑے قضاء لازم ہے نزدِ حنفیہ
شافعی کہتے ہیں لازم ہی نہیں اس کی قضاء
احمد و مالک کی ہیں اس میں روایات دو
ایک مثلِ شافعی و ایک حنفی ہو بہ ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

           ( ما جاء فی کراھیۃ صوم ایام التشریع) 

 مسئلہ۔ امام ابوحنیفہؒ فرماتے ہیں ایام تشریق میں روزہ رکھنا جائز نہیں ہے امام شافعیؒ کا جدید قول یہی ہے امام مالکؒ فرماتے ہیں ایام تشریق کا روزہ متمتع و قارن کے لیے جائز ہے جبکہ اس کو ھدی نہ ملے اور عشرہ کے تین روزے نہ رکھ سکے امام شافعیؒ کا قدیم فرمان یہی ہے اور امام احمدؒ کی اس سلسلے میں دو روایتیں ہیں جواز و عدم جواز۔ 

اشعار۔ 
روزۂ تشریق نا جائز ہے نزدِحنفیہ
شافعی کا ہے یہی اک قول یعنی نا روا
نزدِ مالک ہے روا یہ للتمتع و القران
نزدِ احمد دو روایت کا ہے اس میں پھر بیان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

              ( ما جاء فی کراھیۃ الحجامۃ للصائم الرخصۃ فیہ) 

مسئلہ۔ ائمہ ثلاثہ کے نزدیک روزہ دار کا پچھنے لگوانا روزے کو فاسد نہیں کرتا ہے اور امام احمدؒ فرماتے ہیں حجامت مفطر صوم ہے۔ 

شعر۔ 
نزدِ احمد پھر حجامت مفطراتِ صوم ہے
یہ نہیں نزدِ ثلاثہ مفسداتِ صوم ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء فی تاخیر رمضان) 

مسئلہ۔ اگر کسی عذر کی بنا پر قضاء رمضان میں تاخیر ہوگئ اور دوسرا رمضان آ پہنچا تو بالاتفاق صرف قضاء ہے اور اگر بنا کسی عذر کے ایسا کیا تو امام ابوحنیفہؒ فرماتے ہیں جب بھی قضاء ہی ہے اور ائمہ ثلاثہ فرماتے ہیں قضاء کے ساتھ فدیہ بھی ادا کرے۔ 

اشعار۔ 
عذر سے تاخیر رمضاں ہو تو  پھر بھی ہے قضاء
بے عذر بھی ہے قضاء بس یہ ہے نزدِ حنفیہ
پر ثلاثہ نے کہا ہے بے عذر ہے اک قضاء
ساتھ اس کے فی سبیل اللہ دے گا وہ فداء
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

       ( ما جاء فی الاعتکاف) 

مسئلہ۔ اعتکاف کی تین قسمیں ہیں 1 واجب جیسے نذر کا اعتکاف 2 سنتِ مؤکدہ جیسے رمضان کا اعتکاف 3 نفل جو ان دو کے علاوہ ہو، اعتکاف نذر یعنی واجب میں امام ابوحنیفہؒ و امام مالکؒ کے نزدیک روزہ واجب ہے امام شافعیؒ کا قول قدیم اور اک روایت احمدؒ کی یہی ہے اور امام شافعیؒ کا قول جدید امام احمدؒ کی مشہور روایت یہ ہے کہ اس میں روزہ واجب نہیں ہے۔ 

اشعار۔ 
تین قسموں کا کیا جائے گا لیکن اعتکاف
واجب و سنت نفل سے ہوگا جن کا اتصاف
اعتکاف نذر واجب ہے تو سنت ہے صیام
اور ان کے ما سوا ہوگا نفل کا اہتمام
اعتکاف نذر میں واجب ہے روزہ نزدِ کل
نزدِ احمد، شافعی روزہ نہیں واجب اصل
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

      ( ما جاء فی من اکل ثم خرج یرید السفر) 

مسئلہ۔ ائمہ ثلاثہ فرماتے ہیں جس کو دن میں سفر کا ارادہ ہو تو اس پر لازم ہے اس دن روزہ رکھے اور امام احمدؒ فرماتے ہیں افطار کرنا بھی جائز ہے۔ 

شعر۔ 
روزہ ہو نزدِ ثلاثہ گرچہ دن بھر ہو سفر
نزدِ احمد وہ اگر افطار کر لے چہ ضرر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

الاختلاف کتاب الزکوٰۃ / پرھنوزادہ طارق حسین

                        (     کتاب الزکوٰۃ     ) 

        ۔۔۔۔۔۔۔۔۔۔۔۔ زکاۃ الابل۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

پانچ میں ایک بکری، دس میں دو، پندرہ میں تین، بیس میں چار بکری پچیس میں بنت مخاض، 35تک ، بنت لبون 45 تک، جذعہ 75 تک، دو بنت لبون 90 تک، دو حقے 120 تک، یہاں تک متفق علیہ مسئلہ ہے 

اونٹ ہوں جب پانچ  پھر وہ ایک بکری دیوے گا 

دس میں دو وتین پندرہ، چار عِشریں ہوے گا

 اونٹ ہوں پچیس دے گا وہ مگر بنت مخاض

ہاں یہی پنتیس تک پھر بس چلے گا افتراض

 آگے پنتالیس تک وہ دیوے  اک بنت لبون

پھر پچھتر میں ہے جذعہ ذمہ میں اس  کے دیون

نوے تک ہے دو لبوں اور آگے دو حقّے مگر 

 ایک سو اور بیس تک ہی یہ چلے گا اے جگر 

سب  ائمہ متفق ہیں یہ وظیفہ ہے عیاں

اس سے آگے مختلف ہے کر رہا ہوں اب بیاں

مسئلہ۔ آگے ائمہ ثلاثہ فرماتے ہیں فریضہ متغیر ہوگا اربعینات و خمسینات کا اعتبار ہوگا اربعینات میں ایک بنت لبون اور خمسینات میں ایک حقہ ہوگا اور امام ابوحنیفہؒ فرماتے ہیں 120 سے آگے از سر نو حساب چلے گا پانچ اونٹ میں ایک بکری آگے بڑھتے بڑھتے ایک سو انچاس تک ایک سو پچاس میں تین حقے  ہمارے یہاں نہ بنت لبون کا اعتبار ہے نہ اربعینات کا بس خمسینات میں ایک حقہ اور پھر وہی استیناف۔۔۔ 

اشعار۔ 

بعد سو اور بیس کے  نزد ثلاثہ ہے نصاب

گاہ چالیس و گہ پچاس کا ہوگا حساب

اک لبوں چالیس پر اور حقہ دے پچاس میں

یاد کر لو اور لکھ لو تم کسی قرطاس میں

بو حنیفہ نے کہا ہے آگے  استیناف ہے

حقہ ہے پچاس میں پھر بات بالکل صاف ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔ 

              (         ما جاء فی البقر        ) 

مسئلہ۔ گاۓ، بیل، بھینس، بھینسا ان میں نصاب زکوٰۃ تیس سے شروع ہوتا ہے تیس میں ایک تبیعہ ( جو ایک سال پورا کر کے دوسرے سال میں داخل ہوا ہو) اور چالیس میں ایک مسنّہ (جو دو سال پورے کر کے تیسرے سال میں داخل ہوا ہو)  اس آگے زکوٰۃ کس طرح دی جاے گی اس میں اختلاف ہے امام ابوحنیفہؒ فرماتے ہیں چالیس پر جب ایک بقر بڑھ جاے تو اس کا ربع عشر مسنّہ دینا ہوگا دو میں نصف عشر مسنّہ یعنی مسنّہ کا بیسواں تین میں ثلاثۃ ارباع عشر مسنّہ یوں چلے انچاس تک پھر ہر پچاس میں ایک مسنّہ اور ربع مسنّہ اور صاحبینِ و ثلاثہ فرماتے ہیں آگے بھی پہلے کی طرح دینا ہوگا تیس میں تبیعہ اور چالیس میں مسنّہ یعنی ساٹھ میں دو تبیعے کیونکہ دو تیس ہے ستر میں ایک مسنّہ اور ایک تبیعہ  حنیفہ کا فتویٰ امام ابوحنیفہؒ کے قول پر ہے وہ زیادہ احوط ہے تا کہ کسی جانور کے حصے کی زکاۃ ذمے میں باقی نہ رہے۔ 

اشعار۔ 

پھر ہے مومن پر ضروری دے زکوٰۃ چار پا

دے تبیعہ اور مسنہ تیس اور چالیس کا

اس سے آگے نزد اعظم زائد از چالیس بقر

ایک پر دے گا مسنہ کا وہ پھر ربعِ عشر

دو میں دے  نصفِ عشر  پھر یوں ہی انچاس پر

یعنی دے گا اک مسنّہ جب بڑھے پچاس پر

نزدِ  اصحابِ  ثلاثہ      صاحبینِ    حنیفہ

تیس اور چالیس کا ہی بس کرے گا وہ ادا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

        (   ما جاء فی زکوٰۃ الذھب و الفضۃ  ) 

مسئلہ۔ جمہور اس پر متفق ہیں کہ سونے کا نصاب بیس مثقال اور چاندی کا دو سو درہم ہے اور اس سے آگے اختلاف ہے امامِ ابوحنیفہؒ فرماتے ہیں آگے تب زکوٰۃ ہے جب خمس نصاب کا مالک ہو جاے یعنی چالیس درھم کا ورنہ زکوٰۃ نہیں ہے اور امامِ مالک و شافعیؒ اور صاحبینِ فرماتے ہیں آگے ایک بھی درھم کا مالک ہو جاے تو زکوٰۃ واجب ہے۔ 

اشعار۔ 

بیس مثقالِ ذھب میں فرض کہتے ہیں زکوٰۃ

چاندی میں ہو دو سو درھم  کیجئے گا التفات

نزدِ اعظم اس سے آگے ہو اگر خمس نصاب

یعنی کہ چالیس درھم کا مقدر ہے حساب

صاحبینِ حنیفہ اور نزدِ مالک، شافعی

آگے کم ہو یا زیادہ صدقہ ٹھہرا واجبی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

                 ( ما جاء فی زکوٰۃ الخیل  ) 

مسئلہ۔ گھوڑوں کی تین قسمیں ہیں 1 تجارت کے لیے 2 خدمت کے لیے3 سائمہ، 

پہلے والے میں بالاتفاق زکوٰۃ ہے دوسرے میں بالاتفاق زکوٰۃ نہیں ہے اور تیسرے خیل سائمہ میں اختلاف ہے امام ابوحنیفہؒ فرماتے ہیں اس میں بھی زکوٰۃ ہے اور ائمہ ثلاثہ فرماتے ہیں سائمہ میں زکوٰۃ نہیں ہے۔ 

اشعار۔ 

گھوڑوں کی ہیں تین قسمیں اے مرے عالی وقار

سائمہ   اور    للتجارۃ   تیسرا     خدمت    گذار

للتجارہ میں ہے صدقہ اور در خدمت نہیں

متفق ہیں سب ائمہ اس میں تو کلفت نہیں

سائمہ میں ہے زکوٰۃِ شرع نزدِ حنفیہ

اس میں تو صدقہ نہیں ہے یہ ثلاثہ نے کہا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

     (  ولا یجمع بین متفرق و لا یفرق بین مجتمع  ) 

مسئلہ۔ اس میں ایک مسئلہ تو یہ ہے کہ ولا یجمع اور ولا یفرق ان دونوں فعلوں کا فاعل کون ہے امام مالکؒ فرماتے ہیں ان کا فاعل املاک ہے یعنی مالکِ غنم اور ائمہ ثلاثہ فرماتے ہیں ان کا فاعل ساعی و مصدّق ہے بلکہ امام ابوحنیفہؒ فرماتے ہیں ان کا فاعل ساعی و مالک دونوں ہیں۔ مثال مالک۔ دو بندوں کے پاس چالیس 80 بکریاں ہیں 40 ایک کی 40 دوسرے کی اور دونوں مالکان غنم صاحب نصاب ہے دونوں پر ایک ایک بکری فرض ہے تو امام مالکؒ فرماتے ہیں ولا یجمع بین متفرق کا مطلب ہوگا کہ دونوں مالک زکوٰۃ کے خوف سے دونوں ریوڑوں کو نہ ملائیں تا کہ ایک ہی بکری دینی پڑے کیونکہ 80 پر نصاب نہیں بدلتا بلکہ 121 پر بدلتا ہے تو دیکھۓ متفرق ہونے کی صورت میں دو بکریاں لازم تھی اور جمع بین المتفرق کی صورت میں ایک ہی بکری لازم ہوئی اسی طرح ولا یفرق بین مجتمع کا مطلب نزدِ مالک یہ ہوگا کہ ایک بندے کے پاس 40 بکریاں ہیں اس پر ایک بکری دینا لازم ہے تو اب یہ صدقے کے خوف سے 20 بکریاں کسی دوسرے کو عارضی طور پر نہ دے تا کہ 20 ہی رہ جائیں اور صدقہ سے بچ جاے ولا یفرق بین مجتمع کا نزد مالک یہی مطلب ہے اور امام ابوحنیفہ رحمہ الله فرماتے ہیں دونوں کے فاعل مالک و ساعی ہیں اس لئے دونوں کی دو دو مثالیں بنتی ہے اگر فاعل مالک مراد لیا جاۓ تو مثال وہی ہوگی امام مالکؒ کی بیان کی گئی اور اگر فاعل ساعی ہے تو ولا یجمع کا مطلب یہ ہوگا کہ دو بندوں کے پاس 40 بکریاں ہیں 20 کا مالک ایک اور 20 کا دوسرا تو عامل کو یہ حکم کہ دونوں کی بکریوں کو اکٹھا نہ کرے تا کہ 40 ہو کر نصاب زکوٰۃ کو پہنچ جائیں اور وہ ایک بکری وصول کرے اور ولا یفرق بین مجتمع کا مطلب یہ ہوگا کہ ایک بندے کے پاس 80 بکریاں ہیں اور اس پر ایک بکری دینا لازم اب ساعی کو یہ حکم ہے کہ وہ اس کی 80 بکریوں کو الگ الگ نہ کرے تا کہ دو ریوڑ 40 ۔ 40 کے ہو جائیں اور وہ ایک کے بجائے دو بکریاں وصول کرے یہی مثال امام شافعی و امام احمد رحمھما اللہ کی ہے کیونکہ وہ دونوں فعلوں کے فاعل عاملان ہی کو مانتے ہیں۔ 

پھر ایک مسئلہ خلطۃ الشیوع اور خلطۃ الجوار کا ہے ائمہ ثلاثہ ان دونوں خلطتوں کا اعتبار کرتے ہیں امام ابوحنیفہ اعتبار نہیں کرتے خلطۃ الشیوع کا مطلب ہے ملکیت میں مشترک ہوں مثلاً دو بندوں کے پاس 80 بکریاں ہوں 40 ایک کی 40 دوسرے کی تو ائمہ ثلاثہ فرماتے ہیں اس میں ایک بکری لازم ہوگی کیوں کہ 80 پر نصاب نہیں بدلتا اور یہاں دونوں کے درمیان خلطۃ الشیوع ہے امام ابوحنیفہ رحمہ الله فرماتے ہیں دو بکریاں لازم ہے کیوں دونوں 40۔ 40 بکریوں کے مالک ہے اور 40 نصاب زکوٰۃ ہے اس لئے ہر ایک اپنی ملکیت سے زکوٰۃ دے خلطۃ الشیوع کا کوئی اعتبار نہیں ملکیت کا اعتبار ہے اور خلطۃ الجوار کا مطلب ہے دونوں کی ملکیت ایک نہ ہو بلکہ چار چیزوں میں مشترک ہوں 1 راعی 2 مرعیٰ 3 حالب 4 فحل، نر اگر اس طرح کی شرکت ہو تو بھی شرکت معتبر ہے ائمہ ثلاثہ کے نزدیک اور جب شرکت معتبر ٹھہری تو 80 بکریوں میں ایک ہی بکری دیں گے امام ابوحنیفہ اس شرکت کو بھی معتبر نہیں مانتے بلکہ 2 بکریاں لازم ہوں گی اپنی اپنی ملکیت سے کیونکہ دونوں 40۔ 40 بکریوں کے مالک ہیں اگرچہ خلطۃ الجوار ہے۔ 

بکریوں کا نصاب چالیس ہے 40 پر ایک بکری ایک سو بیس تک یہی نصاب چلے گا پھر 121 پر نصاب بدل جاے گا اور 2 بکریاں لازم ہوں گی۔ 

اشعار۔ 

جمع بین المتفرق فرق بین المجتمع

نزدِ جمہورِ ائمہ دونوں ہیں بالکل منع

دونوں کا فاعل ہے مالک کہتے ہیں یہ مالکی

ساعی نزدِ بو حنیفہ، حنبلی و شافعی

پھر ثلاثہ نے کہا ہے نا شیوع و نا جوار

بو حنیفہ تو نہیں کرتے ہیں اس کا اعتبار

ایک بکری دے وہ جس کی بکریاں چالیس ہوں

دو نکالے وہ کی جس کی ایک سو اکیس ہوں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

            ( انما الصدقات للفقراء) 

مسئلہ۔ قرآن پاک میں زکوٰۃ کے آٹھ مصارف میں سے ایک کو بھی زکوٰۃ دی جا سکتی ہے یہی ائمہ ثلاثہ کا مسلک ہے اور امام شافعی رحمہ اللہ آٹھ کے آٹھ مصارف میں تھوڑا تھوڑا دینا ہوگا۔ 

شعر۔ 

آٹھ مصرف میں دیا جائے گا نزدِ شافعیؒ

ایک کو بھی دے ثلاثہ کا ہے مسلک بس یہی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء فی صدقۃ الزرع و الثمر و الحبوب ) 

مسئلہ۔ امام ابوحنیفہ رحمہ اللهِ فرماتے ہیں پیداوار جتنی ہو جیسی ہو اس میں عشر دینا ہوگا ائمہ ثلاثہ و صاحبین رحمہ الله فرماتے ہیں پانچ وسق سے کم پیدا وار میں عشر نہیں ہے۔ 

اشعار۔ 

نزدِ اعظم عشر دے گا جو بھی پیداوار ہو

کم، زیادہ در حبوب و زرع یا اثمار ہو

پانچ سے کم وسق میں یہ عشر لازم ہے کہاں

نزدِ یعقوب و محمد اور ثلاثہ کے یہاں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

     ( ما جاء فی زکوٰۃ العسل  ) 

مسئلہ۔ امام ابوحنیفہ و احمد رحمہ اللہ کے نزدیک شہد میں بھی عشر لازم ہے اور امام مالک و شافعی رحمہ اللہ کے نزدیک شہد میں عشر نہیں ہے عامل شہد میں کچھ وصول نہ کرے۔ 

شعر۔ 

نزدِ حنیفہ و احمد شہد میں بھی عشر دے

نزدِ مالک، شافعیہ تو مصدق کچھ نہ لے

۔۔۔۔۔۔۔!۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

        ( ما جاء فی زکوٰۃ علی المال المستفاد) 

مسئلہ۔ مال کا منافع اس کی کل چار قسمیں ہیں 1 ابتداءً نفع حاصل ہوا تو بالاتفاق اس پر سال کا گزرنا شرط ہے 2 مال سابق سے منافع حاصل ہوا اور یہ منافع اسی کی جنس بھی ہے اور اسی کا نتیجہ بھی جیسے کسی کے بکریاں تھیں ان کے بچے ہوے یہ منافع مالِ سابق کی جنس بھی ہے اور اسی کا نتیجہ بھی اس پر بالاتفاق سال گزرنا شرط نہیں ہے سال سابق کے ساتھ اس کی زکوٰۃ بھی دی جاے گی 3 مالِ سابق کی نہ تو جنس ہے اور نہ اس کا نتیجہ جیسے کسی کے پاس بکریاں تھیں اور اب کسی نے نقد پیسہ ھدیہ دیا یا وراثت میں ملے اس پر بالاتفاق حولانِ حول شرط ہے 4 مالِ مستفاد مالِ سابق کی جنس تو ہے لیکن اس کا نتیجہ نہیں جیسے پہلے بکریاں تھیں اور اب کسی نے اور بکریاں دئ اس میں اختلاف ہے امام ابوحنیفہؒ فرماتے ہیں اس پر حولانِ حول شرط نہیں ہے ائمہ ثلاثہ فرماتے ہیں اس پر حولانِ حول شرط ہے کیونکہ اس کا سبب مستقل الگ ہے۔ 

اشعار۔ 

مسئلہ یہ بھی اہم ہے  گر ہو مال مستفاد

خوب سن لے مسئلے کو خوب رکھ لے اس کو یاد

ابتداءاً ہاتھ جو آے ائمہ کا ہے قول

صدقہ دینے کیلئے ہے شرط پھر حولانِ حول

ما سبق کا ہو نتیجہ اور جنساً ہوبہ ہو

سال گزرے یا نہ گزرے صدقے سے ہو سرخرو

غیرِ جنسِ ما قبل جو ہاتھ آے کوئی مال

شرط ہے پہلے کہ گزرے اس پہ پورا ایک سال

ما قبل من جنسہ کا ہو سبب جب مستقل

تو ثلاثہ نے کہا ہے حول کو ہے مشتمل

بو حنیفہ نے کہا لازم ہے اس پر بھی زکوٰۃ

حول گزرے یا نہ گزرے اس کیا ہے التفات

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

           ( ما جاء فی اخذ الجزیۃ) 

مسئلہ۔ اھل کتاب ( یہودی و نصاریٰ) اور مجوسی سے بالاتفاق جزیہ لیا جاے گا چاہیے عربی ہوں یا عجمی البتہ ان کے علاوہ غیر مسلموں سے جزیہ لینے میں قدرے اختلاف ہے امام ابوحنیفہؒ فرماتے ہیں عجمی غیر مسلموں سے جزیہ لیا جائے گا اور عربی غیر مسلم یا ایمان قبول کرلیں یا قتل کیا جاے امام مالکؒ فرماتے ہیں مرتد کے علاوہ سب سے جزیہ لیا جائے گا امام احمد و شافعی رحمہما اللہ فرماتے ہیں اھل کتاب و مجوسی سے ہی جزیہ لیا جائے گا باقی یا ایمان لائیں گے یا قتل کیا جاے۔ 

اشعار۔ 

جزیہ دینگے سب مجوسی اور سب اھل کتاب

متفق ہیں اس پہ سارے آگے ہے کچھ اضطراب

بو حنیفہ نے کہا ہے جزیہ ہے بر عجمیاں

نزدِ مالک سب سے لیں گے اک سواۓ صابیاں

نزدِ احمد، شافعی اھل الکتابِ وَ المجوس

مارے جائیں گے بقیہ سب کے سب کافر نفوس

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

      ( ما جاء فی زکوٰۃ الحُلیٰ) 

مسئلہ۔ سونے، چاندی کے زیورات میں امام ابوحنیفہؒ کے نزدیک زکوٰۃ فرض ہے اور ائمہ ثلاثہ و صاحبینِ رحمھم اللہ فرماتے ہیں زیورات میں زکوٰۃ نہیں ہے

شعر۔ 

نزدِ حنیفہ فرض ہے در حُلی و زیورات

پر نہیں نزدِ ثلاثہ ان حلی میں کچھ زکات

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

      ( ما جاء فی زکوٰۃ الخضراوات) 

مسئلہ۔ خضروات ( سبزی وغیرہ) میں امام ابوحنیفہؒ کے نزدیک عشر واجب ہے اور ائمہ ثلاثہ و صاحبینِ رحمھم اللہ کے نزدیک عشر نہیں ہے

شعر۔ 

نزدِ اعظم پھر نکالے گا عشر در خضروات

نزدِ قاضی اور ثلاثہ و محمد ہے برأت

۔۔۔!۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

        ( ما جاء فی زکوٰۃ مال الیتیم) 

مسئلہ۔ مال یتیم ( نا بالغ) ، بچہ اگر مالدار ہو تو ائمہ ثلاثہ فرماتے ہیں اس پر زکوٰۃ فرض ہے اور احناف رحمہ اللہ فرماتے ہیں پچہ مکلف نہیں ہے لہذا اس پر زکوٰۃ فرض نہیں ہے۔ 

شعر۔ 

بچہ بھی نزدِ ثلاثہ صدقہ دے گا مالدار

 نزدِ حنفیّہ ہے  بچہ مال میں بے اعتبار 

۔۔۔۔۔۔۔۔۔۔۔۔۔۔۔۔!!۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔!۔۔۔۔۔۔۔۔۔۔

             ( و فی الرکاز الخمس  ) 

مسئلہ۔ امام ابوحنیفہؒ فرماتے ہیں رکاز معدن کو بھی شامل ہے لہذا معدن میں بھی خمس دینا ہوگا اور ائمہ ثلاثہ فرماتے ہیں معدن زبان سے الگ خزانہ ہے لہذا معدن میں خمس کے بجاے زکوٰۃ فرض ہے

شعر۔ 

پھر ہے معدن کو بھی شامل نزد حنفیہ رکاز

پر ثلاثہ خمس دینے سے ہیں کرتے احتراز

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

    (  ما جاء فی انتقال الصدقۃ) 

مسئلہ۔ امام ابوحنیفہؒ فرماتے ہیں ایک شہر کی زکوٰۃ دوسرے شہر منتقل کرنا جائز ہے اور امام مالک و شافعی رحمہما اللہ فرماتے ہیں جائز نہیں ہے الا یہ کہ عذر شدید ہو۔ 

شعر۔ 

 ہے روا نقلِ زکوٰۃ ِ شہر نزدِ حنفیہ

نا روا ہے مالکی و شافعیہ نے  کہا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

           ( من تحل لہ الزکوٰۃ  ) 

مسئلہ۔ مالدار کو زکوٰۃ لینا جائز نہیں ہے البتہ مالدار کون ہے اس میں اختلاف ہے امام ابوحنیفہؒ فرماتے ہیں جو مالک نصاب ہو وہ غنی ہے امام احمد ؒ فرماتے ہیں جس کے پاس پچاس درھم ہوں امام مالک و شافعی رحمہما اللہ فرماتے جو محتاج نہ ہو جس کے پاس قوت یومیہ میسر  ہو اور تندرست ، سالم الاعضاء ہو کمانے کی طاقت ہو تو وہ غنی ہے۔ 

اشعار۔ 

ہے غنی وہ نزدِ اعظم پاس ہو جس کے نصاب

نزدِ احمد ہو اگر پچاس درھم دستیاب

نزدِ مالک، شافعیہ جو نہیں محتاج ہو

وہ قوی ، سالم بھی ہو اور پاس کچھ اخراج ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

       ( ما جاء فی کراھیۃ الصدقۃ للنبی ﷺ) 

مسئلہ۔ زکوٰۃ جونکہ اوساخ الناس ہے اس لئے نبی کریم ﷺ اور آپ کی آل مطہر کے لئے صدقہ لینا جائز نہیں ہے امام ابوحنیفہؒ و امام شافعی و امام احمد رحمھم اللہ فرماتے ہیں آل نبی ﷺ کے لئے نفلی صدقہ میں گنجائش ہے لیکن صاحب فتح القدیر ابن الھمام نے لکھا ہے محرّم روایات کے عموم کی وجہ نفلی صدقہ لینا بھی حرام ہے آل نبی ﷺ کی شان، پہچان بہت بلند ہے اس لئے ادباً ھدایا ہی پیش کۓ جائیں گے۔ 

اشعار۔ 

پھر نبی و آلہٖ کے واسطے صدقہ نہیں

کیوں کہ یہ اوساخ آدم کہنے کو ہے بالیقیں

اور نبی و آل حضرت کی الگ پہچان ہے

ان کا رتبہ ہے رفیع و گرچہ وہ انسان ہے

نفلی صدقہ آل حضرت کو دیا جاے تو کیا

بو حنیفہ ، شافعی و ابن حنبل نے کہا

پر ہے اولیٰ اس میں حرمت نزدِ شیخ ابن الھمام

ھدیہ بس ان کو دیا جائے وہ ہیں عالی مقام

۔۔۔۔۔۔۔۔۔۔۔۔۔۔۔۔۔۔۔۔۔ ۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

          ( ما جاء فی الصدقۃ علی ذو القربیٰ) 

مسئلہ۔ کیا عورت اپنے شوہر کو زکوٰۃ دے سکتی ہے ۔ امام ابوحنیفہ و امام مالک و اور اک روایت میں امام احمد رحمہم اللہ فرماتے ہیں نہیں دے سکتی ہے بیوی کا نفقہ شوہر کے ذمے لازم ہے گویا یہ خود کو دے رہی ہے اس لئے منع ہے صاحبین و امام شافعی اور امام احمد رحمہم اللہ فرماتے ہیں دے سکتی حضرت زینبؓ زوج عبداللہ بن مسعودؓ سے ایسا مروی ہے۔ 

اشعار۔ 

فرض صدقہ اپنے شوہر کو نہیں دے گی میاں

نزدِ اعظم، احمد و مالک سے ہے ایسا بیاں

نزدِ یعقوب و محمد، حنبلی، شافعی

 یہ ہے جائز حضرت زینب سے ہے مروی یہی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

       ( ما جاء فی الصدقۃ عن المیت )

مسئلہ۔امام ابوحنیفہ و احمد رحمہما اللہ فرماتے ہیں عبادت بدنیہ و مالیہ دونوں کا ایصال ثواب جائز ہے امام شافعیؒ کا قول قدیم اور امام مالکؒ فرماتے ہیں کہ عبادت بدنی ہک8ہ کا ایصال ثواب جائز نہیں ہے البتہ بعض شافعیہ کا قول جدید یہ کہ اگر پڑھ کر ایصال ثواب کیا جائے تو جائز ہے۔ 

اشعار۔ 

ہاں عبادت ہاۓ بدنی یا کہ مالی کا ثواب

بو حنیفہ اور احمد نے کہا جائز جناب

پر  عبادت ہاۓ بدنی کا نہیں ایصال ہے

شافعیہ، مالکیہ کا یہی اشکال ہے

شافعیہ کا یہی ملتا ہے اب قولِ جدید

پڑھ کے قرآں کو بخشنا یہ عمل ہوگا مفید

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

                ( ما جاء فی صدقۃ الفطر ) 

مسئلہ۔ ائمہ ثلاثہ فرماتے ہیں صدقہ فطر دینا فرض ہے اور امام ابوحنیفہؒ فرماتے ہیں صدقہ فطر دینا واجب ہے پھر جمہور کہتے ہیں جو ہو یا گندم صدقہ فطر ایک صاع دیا جائے گا اور احناف کہتے ہیں جو میں ایک صاع دیا جائے گا البتہ گندم میں نصف صاع دیا جائے۔ 

اشعار۔ 

فرض ہے نزدِ ثلاثہ فطر کو  کیجیے ادا

یہ فقط واجب ہے صدقہ بو حنیفہ نے کہا

ایک صاع ہے جَو کا صدقہ نزدِ جمہورِ عظام

نصف  گندم سے نکالے نزدِ اعظم ذی مقام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

مسئلہ۔ صدقہ فطر کب ادا کیا جاے امام ابوحنیفہؒ فرماتے ہیں عید کے دن طلوعِ فجر سے واجب ہوتا ہے یہی ایک روایت امام مالکؒ و امام شافعیؒ کی بھی ہے اور امام احمدؒ فرماتے ہیں شبِ عید میں غروب آفتاب سے واجب ہوتا ہے یہی روایت امام مالکؒ و امام شافعیؒ کی ہے۔ 

اشعار۔ 

فجر سے واجب ہے صدقہ فطر کا از حنفیہ

اک روایت میں یہ مالک شافعیہ نے کہا

نزدِ احمد صدقہ دے سکتا ہے وہ از وقت شام

شافعی و مالکی کا ہے اسی پر التزام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

مسئلہ۔ وجوبِ صدقہ فطر کے لئے بالاتفاق مال نامی کا ہونا شرط نہیں ہے البتہ امام ابوحنیفہؒ فرماتے ہیں مالکِ نصاب ہوگا تو صدقہ فطر واجب ہے ورنہ نہیں ائمہ ثلاثہ فرماتے ہیں جس کے پاس قُوتِ یومیہ ہو اس پر فطر واجب ہے۔ 

شعر۔ 

نزدِ اعظم ہے وجوبِ فطر کو لازم نصاب

پر ثلاثہ نے کہا ہے قوتِ یومیہ جناب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

         ( ما جاء فی تعجیل الزکوٰۃ) 

مسئلہ۔ کیا مالک نصاب پیشگی زکوٰۃ دے سکتا ہے ائمہ ثلاثہ فرماتے ہیں پہلے بھی دے سکتا ہے اور امام مالکؒ فرماتے ہیں پہلے ہی ادا نہیں کر سکتا ہے

شعر۔ 

ہے روا نزدِ ثلاثہ دے وہ تعجیلاً زکوٰۃ

نزدِ مالک ہے اصل یہ دے وہ تأجیلاً زکوٰۃ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Prehnuzada Tariq Hussain

ترانہ بر ختم بخاری اول /پرھنوزادہ طارق حسین

MS Tailor Deobanad Silayi Prehnuzada Tariq Hussain

الاختلاف کتاب الصلاۃ 3

____ ما جاء فیمن زاد الرکعۃ الخامس فی الرکعۃ الاخیرۃ______

مسئلہ۔ امام ابوحنیفہؒ فرماتے ہیں اگر کوئی چار رکعت پر تشہد پڑھے بغیر کھڑا ہو کر پانچویں رکعت بھی پڑھے تو چاہئے کہ وہ چھٹی رکعت بھی ملاے تا کہ یہ نفل ہو جاے اور ائمہ ثلاثہ فرماتے ہیں بس سجدۂ سہو کر لے نماز درست ہو جاے گی۔ 

اشعار۔ 

پانچ رکعت پڑھ لے کوئی بے تشہد کیا ہوا

نزدِ اعظم چھے اگر پڑھ لے نفل ہوگا ادا

پر ثلاثہ نے کہا سہو کا سجدہ کرے

اس طرح ما زادہٗ کا کچھ تو جرمانہ بھرے

____ما جاء فیمن یشک فی الزیادۃ و النقصان______

مسئلہ۔ ائمہ ثلاثہ فرماتے ہیں جس کسی کو نماز میں شک ہو کہ تین رکعت پڑھی ہیں یا چار رکعت اس کو چاہے اقل پر بنا کرے اور سجدۂ سہو کر لے امام ابوحنیفہؒ فرماتے ہیں تحری کر کے غالب گمان پر عمل کرے اور جس کو غالب گمان ہوتا  ہی نہیں بلکہ تردد ہی ہے تو وہ ائمہ ثلاثہ کے قول پر عمل کرے۔ 

اشعار۔ 

کم، زیادہ میں ہو شک گر کتنی رکعت پڑھ چکا

سجدہ ہے نزدِ ثلاثہ اور اقل پر ہے بناء

بو حنیفہ نے کہا کیجے تحری بر گمان

بے گماں کو ہے ثلاثہ کا عمل ہی مہربان

_______ما جاء فی الصلاۃ علی الدابۃ________

مسئلہ۔ امامِ ابوحنیفہؒ فرماتے ہیں سواری پر جماعت قائم نہیں کی جا سکتی ہے اور ائمہ ثلاثہ و امام محمد فرماتے ہیں پڑھ سکتے ہیں کوئی کراہت نہیں ہے۔ 

شعر۔ 

نزدِ اعظم پھر سواری پر جماعت ہے نہیں

پر ثلاثہ اور محمد سے کراہت ہے نہیں

___________الصلاۃ بعد طلوع الفجر_________

مسئلہ۔ جمہور فرماتے ہیں آذان کے بعد قبل الفجر صرف دو رکعت مسنون ہے اور شوافع کے نزدیک نفل بھی پڑھ سکتے ہیں ۔ 

شعر۔ 

نزدِ جمہورِ ائمہ دو ہے بس قبل الفجر

نفل بھی پڑھ لے شوافع کا ہے یہ قول و اثر

______ما جاء فی الاضطجاع بعد رکعتی الفجر____

مسئلہ۔ ظاہریہ کہتے ہیں سنتِ فجر اور نماز فجر کے درمیان تھوڑی دیر سونا واجب ہے اور امام شافعیؒ فرماتے ہیں سنت ہے اور جمہور کے نزدیک درمیان سنت و فجر سونا سنت نہیں ہے کیوں کہ یہ حضورﷺ کی سنت ہے لیکن سنت عادیہ۔ 

اشعار۔ 

اور سونا درمیانِ سنت و فجرِ صلاۃ

شافعی کہتے ہیں سنت بعض ظاہر واجبات

یہ ہے سنت عادیہ پھر نزدِ جمہورِ عظام

اس لئے سنت نہیں کہلاے گا ایسا مقام

_______اذا اقیمت الصلاۃ فلا صلاۃ الا المکتوبۃ_____

مسئلہ۔ امام ابوحنیفہؒ و امام مالکؒ فرماتے ہیں اگر نماز فجر کے فوت ہونے کا اندیشہ نہ ہو تو دو سنتیں ضرور پڑھ لے اور امام شافعیؒ و امامِ احمدؒ فرماتے ہیں جماعت کھڑی ہونے کے بعد کوئی نماز نہیں چاہیے فجر کی سنتیں ہی کیوں نہ ہو حنفیہ و مالکیہ کی تائیدات میں ایسے بہت واقعات صحابہ کرام ؓ سے مروی ہیں کہ وہ جماعت کھڑی ہونے کے بعد سنت فجر پڑھتے تھے جیسے حضرت عبداللہ بن عمر کے بارے امام طحاوی نے نقل کیا ہے۔ 

اشعار۔ 

فجر کی سنت پڑھے گا گر جماعت ہو کھڑی

گر نہ ہو فوتِ جماعت نزدِ اعظم، مالکی

نزدِ احمد، شافعی بعد الاقامۃ لا صلاۃ

پر صحابہ سے ہیں مروی اس طرح کے واقعات

______ما جاء فیمن یصلی سنۃ الفجر بعد الفجر____

مسئلہ۔ جو شخص فجر سے پہلے دوگانہ سنت ادا نہ کر سکا تو امام شافعیؒ و امام احمدؒ فرماتے ہیں بعد الفجر ادا کر لے امام ابوحنیفہؒ و امام مالکؒ فرماتے بعد الفجر سنت نہیں پڑھے گا بلکہ طلوع شمس کے بعد دو نفل ادا کر لے

اشعار۔ 

فجر کی سنت پڑھے بعد الفجر چھوٹے کبھی

نزدِ احمد، شافعی قبلِ طلوعِ شمس بھی

کر سکے نا جو فجر کی سنتیں پہلے ادا

نزدِ اعظم مالکی بعدِ طلوع ہے پھر روا

__________ما جاء فی الاربع قبل الظہر_________

مسئلہ۔ ظہر نماز سے پہلے امام ابوحنیفہؒ و امام مالکؒ کے نزدیک چار رکعت سنت ہے اور امام شافعیؒ و امام احمدؒ کے نزدیک دو رکعت مسنون ہے

شعر۔ 

چار سنت نزدِ اعظم، مالکی قبل الظہر

نزدِ احمد، شافعی ملتی ہے دو کی بھی خبر

_________ما جاء ان صلاۃ اللیل مثنیٰ مثنیٰ_____

مسئلہ۔ جمہور کہتے ہیں رات کو نفل دو دو رکعت پڑھنا افضل ہے امام ابوحنیفہؒ فرماتے ہیں رات کو بھی چار رکعت ایک سلام کے ساتھ پڑھے گا اور صاحبین ؒ کے نزدیک بھی رات کو دو دو کر کے پڑھے گا حنفیہ کا فتویٰ اسی قول پر ہے۔ 

اشعار۔ 

نزدِ جمہورِ ائمہ رات کو ہے دو و دو

بو حنیفہ نے کہا ہے اربعاَ لیلاً پڑھو

صاحبَین حنفیہ بھی کہتے ہیں مثنیٰ پڑھو

ہم اسی مسلک پہ دیتے آج ہے فتویٰ پڑھو

__________ما جاء فی الصلاۃ عند الزوال_________

مسئلہ۔ زوال کے وقت چار رکعت مسنون ہے امام شافعیؒ و امام احمدؒ کے نزدیک اور امام ابوحنیفہؒ و امام احمدؒ کی ایک روایت یہ ہے کہ زوال کے وقت کوئ نماز نہ پڑھے 

شعر۔ 

چار پڑھ لو نزدِ احمد، شافعی عند الزوال

بو حنیفہ اور احمد کو ہے اس میں کچھ مقال

___________کتاب العیدین___________

مسئلہ۔ جس پر جمعہ واجب ہے اس پر نماز عید بھی واجب ہے البتہ حکم صلوٰۃ مختلف فیہ ہے ائمہ ثلاثہ فرماتے ہیں نماز عید سنت ہے اور امام ابوحنیفہؒ فرماتے ہیں عید کی نماز واجب ہے

شعر۔ 

اور نمازِ عید ہے جس پر ہے جمعَہ واجباً

نزدِ حنفیہ مگر نزدِ ثلاثہ سنتاً

___________اذا اجتمع العید و الجمعۃ___________

مسئلہ۔ اگر جمعہ و عید کی نماز ایک دن میں جمع ہو جائیں تو امام احمدؒ فرماتے ہیں عید کی نماز پڑھ لو جمعہ کی نماز ساقط ہو جاے گی جمعہ کو نہیں پڑھنا ہے ائمہ ثلاثہ فرماتے ہیں دونوں الگ الگ نمازیں ہیں ایک کے پڑھ لینے سے بھلا دوسری نماز کیسے ساقط ہو جاے گی دونوں نمازوں کو اپنے اپنے وقت پر ادا کرے گا۔ 

اشعار۔ 

اجتماعِ عید و جمعہ ایک دن میں ہوگیا

نزدِ احمد عید پڑھ لو جمعہ پھر ساقط ہوا

ہاں صلاۃِ جمعہ بھی پڑھ لے ثلاثہ نے کہا

اک فرض سے فرض ثانی یوں نہیں ساقط ہوا

______ما جاء فی عدد التکبیر فی العیدین_______

مسئلہ۔ نماز عید میں امام مالکؒ و امام احمدؒ کے نزدیک تکبیر تحریمہ کے علاوہ گیارہ تکبیریں زوائد ہیں پہلی رکعت میں چھے اور دوسری میں پانچ اور امام شافعیؒ کے نزدیک تکبیر تحریمہ کے سوا بارہ تکبیریں زوائد ہیں پہلی رکعت میں سات اور دوسری رکعت میں پانچ اور امام ابوحنیفہؒ فرماتے ہیں نماز عید میں تکبیر تحریمہ کے سوا چھے تکبیریں زوائد ہیں پہلی رکعت میں تین دوسری میں تین۔ 

اشعار۔ 

نزدِ مالک اور احمد گیارہ تکبیریں ہیں کل

شافعی کہتے ہیں زائد بارہ تکبیریں ہیں کل

بو حنفیہ نے کہا کل تو چھے تکبیر ہیں

تین پہلے دوسری میں تین یہ تحریر ہیں

پہلے چھے ہیں نزدِ احمد، مالکی پھر پانچ ہیں

سات پہلے کہتے ہیں یہ شافعی پھر پانچ ہیں

تین تکبیریں ہیں پہلے بو حنیفہ نے کہا

دوسری میں تین ہیں یہ کل اصل کے ما سوا

_____ما جاء فی محل التکبیر فی العیدین_______

مسئلہ۔ نماز عید میں زوائد تکبیروں کا محل کیا ہے امام ابوحنیفہؒ فرماتے ہیں پہلی رکعت میں قبل القرأت اور دوسری رکعت میں بعد القرأت کہی جائیں گی اور ائمہ ثلاثہ فرماتے ہیں دونوں رکعتوں میں قبل القرأت کہی جائیں گی۔ 

اشعار۔ 

پہلی میں قبل القراءت دوسری میں بعدہٗ

نزدِ حنفیہ عمل ہے اس طرح سے ہو بہ ہو

دونوں رکعت میں زوائد ہیں قراءت سے قبل

نزدِ اصحاب ثلاثہ ہے یہی حکمِ اصل

____ما جاء فی رفع الیدین عند التکبیر فی العیدین__

مسئلہ۔ نماز عید میں تکبیر تحریمہ اور زوائد میں یعنی ہر تکبیر پر رفع الیدین بھی ہوگا یہ ائمہ اربعہ کا مسلک ہے امام مالکؒ سے اک روایت یہ ہے کہ صرف تکبیر تحریمہ میں ہی ہاتھ اٹھاے گا زوائد میں نہیں۔ 

شعر۔ 

پھر اٹھاۓ ہاتھ دونوں یہ ثلاثہ نے کہا

اک روایت نزدِ مالک بس اصل میں ہی اٹھا

_______لا صلاۃ قبل العیدین ولا بعدھا__________

مسئلہ۔ امام شافعیؒ کے نزدیک عید کے دن نماز عید سے پہلے بھی اور بعد میں بھی نوافل پڑھ سکتا ہے البتہ امام کے لئے مکروہ ہے جمہور ائمہ عید کے دن نوافل پڑھنے کو روا نہیں سمجھتے ہیں البتہ امام صاحب گھر میں پڑھنے کی اجازت دیتے ہیں۔ 

شعر۔ 

عید کے دن نفل پڑھ لے پر ہے مکروہ للامام

یہ ہے نزدِ شافعی ،جمہور نے روکا تمام

_________ما جاء فی صلاۃ الاستسقاء__________

مسئلہ۔ تمام ائمہ متفق ہیں کہ نماز عید سنت ہے امام ابوحنیفہؒ کی طرف جو عدم سنت کی نسبت کی جاتی ہے وہ غلط ہے امام صاحب بھی سنت کے قائل ہیں۔ 

شعر۔ 

اور استسقاء ہے سنت اربعہ نے ہے کہا

عدم سنت نزدِ اعظم ایسا کہنا ہے خطا

__________ما جاء فی کیفیۃ الاستسقاء_______

مسئلہ۔ امامِ ابوحنیفہؒ و امام مالکؒ فرماتے ہیں نماز استسقاء عام نمازوں کی طرح ہے اور امامِ شافعیؒ و امام احمدؒ فرماتے ہیں اس میں زوائد تکبیریں بھی ہیں۔ 

شعر۔ 

اور استسقاء ہے نزدِ اعظم و مالک نماز

نزدِ احمد، شافعی تکبیرات کا بھی ہے جواز

____ما جاء فی تحویل الرداء فی الاستسقاء______

۔مسئلہ۔ پھر امام ابوحنیفہؒ فرماتے ہیں تحویل رداء ( چادر کا پلٹنا) صرف امام کے لے ہے اور ائمہ ثلاثہ فرماتے ہیں مقتدی بھی پلٹیں گے۔ 

شعر۔ 

اور تحویلِ رداء ہے نزدِ اعظم للامام

مقتدی نزدِ ثلاثہ بھی کریں گے التزام

_______ما جاء فی صلاۃ الکسوف و الخسوف______

مسئلہ۔ کسوف ( سورج گرہن) میں جماعت بالاتفاق سنت ہے اور خسوف ( چاند گرہن) میں صرف امامِ احمدؒ و امام شافعیؒ کے نزدیک جماعت سنت ہے۔ 

شعر۔ 

اور ہے سنت جماعت نزدِ کل پھر در کسوف

نیز سنت نزدِ احمد، شافعی ہے در خسوف

__________طریقۃ صلاۃ الکسوف_______

مسئلہ۔ سورج گرہن ہو جاے تو امام ابوحنیفہؒ فرماتے ہیں عام نمازوں کی طرح نماز پڑھ لو اور ائمہ ثلاثہ فرماتے ہیں صلاۃ کسوف میں چار رکوع ہوں گے۔ 

شعر۔ 

دو رکوع ہے گرہَنِ سورج میں نزدِ حنفیہ

ہاں رکوع ہے چار اس میں یہ ثلاثہ نے کہا

___________کیف القراۃ فی الکسوف________

مسئلہ۔ صاحبین ؒ اور امام احمدؒ فرماتے ہیں صلاۃ کسوف میں جہرا قرأت ہوگی اور ائمہ ثلاثہ فرماتے ہیں سرا قرأت ہوگی اور صلاۃ خسوف میں بالاتفاق جہر ہوگا

شعر۔ 

نزدِ یعقوب و محمد اور احمد ہے جہر

در کسوفِ شمس کہتے ہیں ثلاثہ مخفی تر

______________ما جاء فی سجود القرآن_________

مسئلہ۔ امامِ ابوحنیفہؒ فرماتے ہیں تلاوت کے سجدے واجب ہیں اور ائمہ ثلاثہ کہتے ہیں سنت ہیں کیوں حضرت عمر رضی اللہ عنہ سے ثابت ہے کہ ایک جمعہ آپ نے سجدہ کی آیت تلاوت فرمائی اور سجدہ نہیں کیا۔ 

شعر۔ 

نزدِ اعظم ٹھہرا واجب ہیں تلاوت کے سجود

اور ثلاثہ نے کہا سنت، عمر سے ہے ورود

________الاختلاف فی عدد السجدۃ التلاوۃ______

مسئلہ۔امام مالکؒ فرماتے ہیں قرآن میں کل گیارہ سجدے ہیں امام ابوحنیفہؒ و امام شافعیؒ فرماتے ہیں قرآن میں کل چودہ سجدے ہیں البتہ فرق یہ کہ امامِ شافعیؒ فرماتے ہیں سورۃ الحج میں دو سجدے ہیں اور سورۂ صاد میں سجدہ ہے ہی نہیں امام ابوحنیفہؒ فرماتے ہیں سورۂ حج میں ایک ہی ہے اور سورۂ صاد میں ایک اور امام احمدؒ فرماتے ہیں قرآن میں کل پندرہ سجدے ہیں حج میں دو اور صاد میں  ایک سمیت۔ 

اشعار۔ 

گیارہ سجدے نزدِ مالک ہیں فقط قرآن میں

نزدِ احمد پندرہ سجدے یہ بھی ہے فرمان میں

نزدِ اعظم، شافعی ہے چودہ سجدوں کا ثبوت

حج میں نزدِ شافعی دو صاد میں ٹھہرا سکوت

______ما جاء فی السجدۃ علی الثوب__________

مسئلہ۔ امام شافعیؒ فرماتے ہیں بدن کے ساتھ متصل کپڑے پر شدت برودت و حرارت کی وجہ سے سجدہ کرنا مکروہ ہے جمہور کہتے ہیں متصل کپڑے پر عذراً سجدہ کرنا جائز ہے

شعر۔ 

متصل کپڑے پہ سجدہ نزدِ جمہورِ عظام

ہے روا پر شافعی کہتے ہیں مکروہ ایسا کام

_______ما جاء فی الاغتسال عند ما یسلم الرجل___

مسئلہ۔ امام احمدؒ و امام مالکؒ فرماتے ہیں جو کوئی اسلام قبول کرے اس پر غسل واجب ہے امام ابوحنیفہؒ و امام شافعیؒ فرماتے ہیں نو مسلم پر غسل مستحب ہے ہاں اگر قبل از اسلام موجبات غسل میں سے کوئی چیز پائی گئی تب واجب ہی ہوگا۔ 

اشعار۔ 

اور نو مسلم کرے گا غسل ہے از واجبات

احمد و مالک کا اس جانب ہے ثابت التفات

شافعی و بو حنیفہ نے کہا ہے مستحب

گر غسل ہو پہلے واجب تو حکم ہے قد وجب

الاختلاف کتاب الصلاۃ 2

____ما یقول الرجل اذا رفع رأسہ من الرکوع______

مسئلہ۔ امام شافعیؒ فرماتے ہیں رکوع سے اٹھتے وقت تسمیع و تحمید ( سمع اللہ لمن حمدہ اور ربنا و لک الحمد) امام و مقتدی دونوں کا وظیفہ ہے امام ابوحنیفہؒ و امام مالکؒ فرماتے ہیں امام تسمیع کہے گا اور مقتدی تحمید یعنی دونوں میں تقسیم ہے اور امام احمدؒ و صاحبین فرماتے ہیں امام تسمیع و تحمید دونوں کہے گا اور مقتدی صرف تحمید کہے امام طحاویؒ فرماتے ہیں حنفیہ کا مفتی بہ قول یہی ہے۔ 

اشعار۔ 

حمد و تسمیعِ رفع ہے للامام و مقتدی
بس یہی تو حکم دیتے ہیں امام شافعی
بولیں تسمیع بس ائمہ مقتدی تحمید کو
نزدِ اعظم اور مالک ہے عمل تحدید کو
نزدِ یعقوب و محمد اور احمد للامام
دونوں کا پابند ٹھہرا مقتدی حمداً تمام
_________ما جاء فی وضع الیدین قبل الرکبتین_______

مسئلہ۔ امام مالکؒ فرماتے ہیں سجدے میں جاتے وقت پہلے دونوں ہاتھ زمین پر رکھے جائیں گے پھر دونوں گھنٹے اور جمہور کہتے ہیں پہلے گھنٹے رکھے جائیں گے پھر دونوں ہاتھ۔ 

شعر۔ 
نزدِ مالک پہلے رکھو سجدے میں  دونوں یدین
نزدِ جمہور ائمہ پہلے رکھو رکبتین
_______ما جاء یقول بین السجدتین______

مسئلہ۔ امام شافعیؒ و امام احمدؒ کے نزدیک دونوں سجدوں کے درمیان یعنی جلسے میں ذکر مسنون ہے اور امام مالکؒ و امام ابوحنیفہؒ کے نزدیک جلسے میں ذکر مسنون نہیں البتہ امام اعظم کے نزدیک اگر کوئی پڑھ تو کوئی حرج نہیں۔ 

اشعار۔ 
درمیانِ دونوں سجدے نزدِ احمد، شافعی
ذکرِ اِغفر اور اِرحم ٹھہرا ہے مسنون بھی
نزدِ اعظم اور احمد ذکر تو سنت نہیں
نزدِ اعظم گر کوئی پڑھ لے تو پھر کلفت نہیں
________ما جاء فی جلسۃ الاستراحۃ________

مسئلہ۔ امام شافعیؒ فرماتے ہیں پہلی رکعت اور تیسری رکعت کے بعد جلسۂ استراحت سنت ہے اور ائمہ ثلاثہ نے فرمایا جلسۂ استراحت سنت نہیں ہے بلکہ سیدھے کھڑا ہو جاے۔ 

شعر۔ 

شافعی کہتے ہیں سنت استراحت کا قعود
اور ثلاثہ نے کہا سیدھے کھڑا ہو از سجود
__________سجدۃ السہو__________

مسئلہ۔ سجدہ سہو امام شافعیؒ کے نزدیک قبل السلام کیا جاے گا اور امام ابوحنیفہؒ کے نزدیک بعد السلام کیا جاے گا امام مالکؒ فرماتے ہیں اگر نماز میں کسی نقصان کی وجہ سے سجدہ سہو لازم ہوا ہے تو قبل السلام کیا جاے گا القاف بالقاف اور اگر کسی زیادتی کی وجہ سے لازم ہوا ہے تو بعد السلام سجدہ کیا جاوے الدال بالدال اور امام احمدؒ فرماتے ہیں احادیث کو دیکھا جاوے گا حضورﷺ سے جس حالت میں جو کیفیت مروی ہے ویسا ہی کیا جاے ہاں جہاں کوئی روایت نہیں ملتی وہاں شافعیہ کی طرح قبل السلام کیا جاے گا۔ 

اشعار۔ 

سہو کا سجدہ ہے نزدِ شافعی قبل السلام
نزدِ اعظم بعدہٗ سجدے کا ہوگا اہتمام
اور مالک نے کہا ہے قاف و قاف و دال دال
نزدِ احمد مثلِ خبرِ مصطفیٰ رکھیو خیال
اور احمد نے کہا جس جا خبر مروی نہیں
شافعی کا قول لیجے گر مثل نبوی نہیں
_____ما جاء فی کراھیۃ الاقعا بین سجدتین________

مسئلہ۔اقعاء کے معنی ہے دونوں پاؤں کو پنجوں کے بل کھڑا کرنا اور ایڑیوں پر بیٹھنا یہ ائمہ ثلاثہ کے نزدیک مکروہ ہے امامِ شافعیؒ کے نزدیک دونوں سجدوں کے درمیان اقعاء و افتراش دونوں مسنون ہے۔ 

شعر۔ 
پھر کراہت ہے ثلاثہ نے کہا اقعاء کرے
شافعی کہتے ہیں سنت جو کوئی ایسا کرے
_________کیف الجلوس فی التشھد________

مسئلہ۔ امام مالکؒ فرماتے ہیں تشہد میں بحالت تورک ( دائیں پاؤں کو کھڑا اور بائیں پاؤں کو بچھا کر سرین پر بیٹھا جاوے) بیٹھنا سنت ہے اور امام ابوحنیفہؒ فرماتے ہیں افتراشاً ( دائیں پاؤں کھڑا اور بائیں پاؤں کو بچھا کر اس پر بیٹھا جاے) ہوگا امام شافعیؒ و احمدؒ فرماتے ہیں جلسۂ یسیر (جیسے پہلا قعدہ) مثل حنفیہ ہوگا اور جلسۂ کبیر ( دوسرا قعدہ) مثل مالکیہ کیا جائے ہاں اگر دو رکعت والی نماز ہو جس میں ایک ہی قعدہ ہوتا ہے اس میں امام شافعیؒ فرماتے ہیں مثل مالکیہ بیٹھا جاے اور امام احمدؒ فرماتے ہیں اس میں مثل حنفیہ ہی بیٹھا جاوے۔ 

اشعار۔ 
ہو تشہد میں تورّک مالکیہ نے کہا
اور مطلق افتراشاً کہتے ہیں یہ حنفیہ
پہلا قعدہ مثلِ حنفی ثانی مثلِ مالکی
یہ ہے قولِ ابنِ حنبل اور شیخِ شافعی
مثلِ اعظم قولِ احمد قعدۂ دوگانہ کر
مثل مالک ہوگا قعدہ شافعی کا ہے امر
_______ما جاء فی التشھد________

مسئلہ۔ جمہور ائمہ فرماتے ہیں تشہد پڑھنا واجب ہے امام مالکؒ کی ایک روایت یہ کہ تشہد پڑھنا سنت ہے

شعر۔ 
اک روایت مالکی میں ہے تشہد از سنن
اور واجب سے ہیں جمہورِ ائمہ مطمئن
______ما جاء فی عدد التسلیم فی الصلوٰۃ________

مسئلہ۔ ائمہ ثلاثہ فرماتے ہیں امام و مقتدی دونوں کو دو سلامیں کہنی ہیں ایک دائیں جانب کو ایک بائیں جانب کو امام مالکؒ فرماتے ہیں امام کو ایک ہی سلام کہنی ہے سر اٹھا کر سامنے کی طرف اور مقتدی کو تین سلامیں کہنی ہے ایک آگے کی جانب دو دائیں بائیں۔ 

اشعار۔ 
نزدِ اصحابِ ثلاثہ ہر کسی پر دو سلام
نزدِ مالک مقتدی کو تین و واحد للامام

_____ما جاء فی الصلاۃ علی النبی فی القعدۃ الاخیرۃ_____

مسئلہ۔ قعدۂ اخیرہ میں درودشریف پڑھنا ائمۂ ثلاثہ کے نزدیک سنت ہے اور امامِ شافعیؒ فرماتے ہیں درود پڑھنا فرض ہے۔ 

شعر۔ 
قعدۂ ثانی میں سنت ہے نبی پر پھر درود
شافعیہ کے یہاں ہے فرض یہ وقتِ قعود

___________قطع الصلوٰۃ__________

مسئلہ۔ امامِ احمدؒ کے نزدیک کالے کتے کا نمازی کے سامنے سے گزرنا فساد نماز کا باعث ہے اور روایت امامِ احمدؒ سے یہ بھی ہے کہ گدھے اور عورت کے گزرنے سے بھی نماز فاسد ہوگی ائمۂ ثلاثہ کے نزدیک گدھا، عورت تو کجا کتے کے گزرنے نے سے بھی نماز میں کوئی فرق نہیں پڑتا ہے۔ 

اشعار۔ 
ہو اگر پیشِ مصلّی کلبِ اسود کا مرور
نزدِ احمد پھر نمازوں کا اعادہ ہے ضرور
اک روایت نزدِ احمد اس میں داخل ہے حمار
اور غضب اس پر کہ عورت کا بھی اس میں ہے شمار
پر ثلاثہ نے کہا ہے کلب اسود کیا ہوا
کوئی بھی گزرے گزرنا سب کا سب باطل ہوا
___________صلوٰۃ القائم خلف القاعد__________

مسئلہ۔ امامِ مالکؒ فرماتے ہیں قاعد امام کی اقتدی مطلقا نا جائز ہے امامِ احمدؒ فرماتے ہیں قاعد امام کی اقتداء بیٹھ کر ہی جائز ہے اور امام ابوحنیفہؒ و شافعیؒ فرماتے ہیں امام اگر معذور اور قاعد ہو تو مقتدی کھڑے ہوکر اس کے پیچھے نماز پڑھیں گے

اشعار۔ 
حضرتِ مالک ہیں کہتے ہو اگر قاعد امام
یہ بہر صورت غلط ہے اقتداء ہے نا تمام
نزدِ احمد قاعداً کی ہے قعوداً اقتداء
قولِ اعظم، شافعی ہے مقتدی ہوگا کھڑا
____________الکلام فی الصلاۃ___________

مسئلہ۔ امام شافعیؒ فرماتے ہیں اگر نا واقفیت یا بھولے سے نماز میں کلام کیا تو نماز ہو جاے گی امام مالکؒ فرماتے ہیں اگر اصلاحِ صلاۃ کے لے بات کرے تو نماز میں کوئی اثر نہیں پڑے گا یہی ایک روایت امام ابوحنیفہؒ کی ہے امام احمدؒ فرماتے ہیں اگر نمازی کو معلوم ہو کہ اس کی نماز ابھی مکمل نہیں ہوئی ہے اور بات کرے تو نماز فاسد ہوگی ہاں اگر یہ خیال تھا کہ نماز مکمل ہوچکی ہے اس لئے ہم کلام ہوا پھر معلوم ہوا کہ نماز ابھی مکمل نہیں ہوئی ہے تو اس صورت میں نماز فاسد نہیں ہوگی امام احمدؒ کی اس مسئلہ میں تین روایات اور ہے تینوں اماموں کے ساتھ اور امامِ ابوحنیفہؒ فرماتے ہیں کلام جس حال میں ہو جیسا ہو، کم ہو یا زیادہ بہر صورت مفسد صلاۃ ہے۔ 

اشعار۔ 
عدمِ علم و بھول کر ہو گر نمازوں میں کلام
شافعی کہتے ہیں اس میں غیر مفسد ہے پیام
نزدِ مالک ہو اگر مقصود اصلاحِ صلوٰۃ
غیر مفسد ہے یہ اعظم کی یہی ہے ایک بات
حضرتِ احمد کی اس میں چار مرویات ہے
تین میں احمد ثلاثہ کے ہی ہم جذبات ہے
اک روایت ہے اگر وہ جانتا تھا ناتمام
پھر تو فاسد ہے یقیناً گر کرے گا کچھ کلام
بو حنیفہ نے کہا ہے بات کرنا در صلوٰۃ
کم، زیادہ، ہرطرح ہے یہ عمل از مفسدات
___________القنوت فی الوتر____________

مسئلہ۔ امام مالکؒ فرماتے ہیں قنوت وتر صرف پورے رمضان مشروع ہے امام شافعیؒ فرماتے ہیں رمضان کے صرف آخری پندرہ دن مشروع ہے یہی ایک روایت امام مالکؒ و احمدؒ کی ہے اور امامِ ابوحنیفہؒ و امام احمدؒ کا راجح قول یہ ہے کہ قنوت وتر پورے سال مشروع ہے۔ 

اشعار۔ 
نزدِ مالک ہے قنوتِ وتر پھر پورے صیام
مسلکِ مالک میں ملتا ہے یہی راجح پیام
ہے قنوتِ وتر پچھلے پندرہ دن رمضان میں
مالکی و شافعی و حنبلی فرمان میں
بو حنیفہ اور احمد کا یہ واضح حال ہے
یعنی کہتے ہیں قنوتِ وتر پورے سال ہے
____________القنوت فی الفجر__________

مسئلہ۔ امام مالکؒ و امام شافعیؒ کے نزدیک قنوت فجر پورے سال مشروع ہے اور امامِ ابوحنیفہؒ و احمدؒ فرماتے ہیں قنوت فجر ایسے ایام میں مشروع ہے جب مسلمان پر کو آفت یا ابتلاء ہو

اشعار۔ 
پھر قنوتِ فجر پڑھنا ہے سبھی کو بالدوام
مالکیہ، شافعیہ، نے کیا ہے التزام
ہاں قنوتِ فجر چاہے بس کٹھن ایام میں
بو حنیفہ اور احمد کے صحیح اعلام میں
___________صلوٰۃ الوتر_________

مسئلہ۔ امام ابوحنیفہؒ کے نزدیک وتر کا حکم واجب ہے اور ائمہ ثلاثہ و صاحبین کے نزدیک سنت اشد التاکید ہے۔ 

شعر۔ 
وتر واجب ہے بحکمِ بو حنیفہ زینہار
کہتے ہیں سنت ثلاثہ، صاحبینؒ، ذی وقار
_______________رکعاتِ وتر_____________

مسئلہ۔ تعدادِ رکعاتِ وتر کیا ہے امام شافعیؒ و امام احمدؒ فرماتے ہیں ایک سے گیارہ رکعات وتر کی ہیں اور امامِ ابوحنیفہؒ و امام مالکؒ فرماتے ہیں وتر تین رکعات ہیں۔ 

اشعار

تین رکعت وتر میں ہے نزدِ اعظم، مالکی
ایک سے ہے گیارہ تک یہ نزدِ احمد، شافعی
____ما جاء فی القنوت قبل الرکوع و بعد الرکوع____

مسئلہ۔ قنوت کس رکعت میں اور کہاں پڑھی جاے گی امام ابوحنیفہؒ و امام مالکؒ فرماتے ہیں قنوت تیسری رکعت میں قبل الرکوع پڑھی جاے گی اور امام شافعیؒ و امام احمدؒ فرماتے ہیں تیسری رکعت میں بعد الرکوع پڑھی جاے گی اور امام احمدؒ سے ایک روایت یہ کہ وتر پڑھنے والے کو اختیار ہے چاہے قبل الرکوع پڑھے یا بعد الرکوع۔ 

اشعار۔ 

ہو قنوتِ وتر پہلے پھر رکوع کر لے جناب
نزد اعظم اور مالک ہے یہی بہتر صواب
پہلے خم ہو پھر پڑھے گا نزدِ احمد، شافعی
اک روایت حنبلی ملتی ہے پھر تخییر کی
____________ای قنوت افضل_________

مسئلہ۔ امام ابوحنیفہؒ و امامِ مالکؒ فرماتے ہیں وتر میں اللّھمّ انا نستعیک والی دعا پڑھی جاے گی اور امامِ احمدؒ و شافعیؒ فرماتے ہیں اللّھمّ اھدنا فیمن ھدیت والی دعا پڑھی جاے گی۔ 

اشعار۔ 
اور اللّھمّ انا نستعینُکْ ہے شمار
اس دعا کا اعظم و مالک ہیں کرتے اعتبار
ہے مگر فیمن ھدیتا نزدِ احمد، شافعی
اس دعا سے حنبلی و شافعی کو ہے خوشی
_________ما جاء فی الوتر علی الراحلۃ_________

مسئلہ۔ ائمہ ثلاثہ نے فرمایا ہے کہ سواری پر بھی عذراً وتر پڑھی جا سکتی ہے کیونکہ ابن عمرؓ سے ایسا کرنا مروی ہے امام ابوحنیفہؒ فرماتے ہیں سواری پر وتر پڑھنا جائز نہیں ہے۔ 

شعر۔ 
نزدِ حنفیہ نہیں جائز سواری پر وتر
ہے روا نزدِ ثلاثہ مروی از ابنِ عمر
_____________الوتر بسلام واحد____________

مسئلہ۔ ائمہ ثلاثہ فرماتے ہیں وتر دو سلاموں کے ساتھ پڑھی جاے گی اور امام ابوحنیفہؒ فرماتے ہیں تین رکعات وتر ایک سلام کے ساتھ پڑھی جاے گی 

شعر۔ 
ہے بہ فرمانِ ثلاثہ وتر میں پھر دو سلام
نزدِ اعظم ایک ہے آخر میں ہے اس کا مقام
_________ما جاء فی الجمعۃ  فی القریٰ_______

مسئلہ۔ امام احمدؒ و شافعیؒ فرماتے ہیں جس جگہ چالیس عاقل بالغ افراد جمع ہو جائیں وہاں جمعہ کی نماز قائم کیا جاے گی امامِ مالکؒ فرماتے ہیں جو گاؤں شہر سے تین کلو میٹر سے کم فاصلے پر واقع ہو اس گاؤں میں جمعہ نماز قائم کی جاے گی امام ابوحنیفہؒ فرماتے ہیں اقامتِ جمعہ کے لئے قریۂ کبریٰ یا شہر ہونا چاہیے۔ 

اشعار۔ 
جس جگہ چالیس عاقل سے ہو کم مرداں جمع
نزدِ احمد، شافعی ہے ایسی جا جُمعَہ منع
نزدِ مالک  بادیہ جو تیں کلو میٹر سے کم
شہر سے ہو فاصلہ تو جمعہ کا ہوگا عزم
قریۂ کبریٰ ہو نزدِ بو حنیفہ یا شہر
تب جمعہ قائم کرو ورنہ وہی پڑھ لو ظہر
_____________وقتِ الجمعہ___________

مسئلہ۔ امام احمدؒ فرماتے ہیں جمعہ کا وقت قبل الزوال ہے اور ائمہ ثلاثہ فرماتے ہیں جس طرح ظہر کا وقت بعد الزوال ہے اسی طرح جمعہ کا وقت بھی بعد الزوال ہے۔ 

شعر۔ 
قولِ احمد وقتِ جمْعہ ہے روا قبل الزوال
مثلِ وقت ظہر ٹھہرا ہے ثلاثہ کا خیال
__________الصلاة عند الخطبہ__________

مسئلہ۔ امام احمدؒ و شافعیؒ فرماتے ہیں جو شخص خطبے کے وقت مسجد آے وہ پہلے دوگانہ تحیۃ المسجد پڑھ لے امام مالکؒ و امامِ ابوحنیفہؒ فرماتے ہیں جو خطبے کے وقت آے اس پر کوئی نفل نہیں تا آں کہ امام نماز سے فارغ ہو جائے۔ 

اشعار۔ 
آنے والا وقتِ خطبہ پڑھ لے دوگانہ فقط
نزدِ احمد شافعی بس یہ حکم جانا فقط
وقتِ خطبہ آنے والے پر نہیں کوئی نماز
بو حنیفہ اور مالک کا ہے یہ قولِ گداز
_______ما جاء فی الجلوس بین الخطبتین_______

مسئلہ۔ دونوں خطبوں کے درمیان تھوڑی دیر بیٹھنا امام شافعیؒ و احمدؒ کے نزدیک فرض ہے امام مالکؒ و ابوحنیفہؒ فرماتے ہیں بیٹھنا سنت ہے

اشعار۔ 
درمیانِ دونوں خطبے بیٹھنا ٹھرا فرض
شافعی و ابنِ حنبل کو ہے بس اس سے غرض
بو حنیفہ اور مالک نے کہا سنت قعود
ایسے جلسے میں پڑھو کوئی دعا، ذکر و درود
____ما جاء فی کراھیۃ الکلام والامام یخطب______

مسئلہ۔ امام شافعیؒ فرماتے ہیں دورانِ خطبہ بات کرنا جائز ہے اور جمہور کے نزدیک میانِ خطبہ کلام کرنا نا جائز ہے۔ 

شعر۔ 
شافعی کہتے ہیں جائز خطبہ پڑھتے ہو کلام
اور کہتے ہیں یہ نا جائز وہ جمہورِ عظام
____ما جاء فی الکلام بعد نزول الامام من المنبر____

مسئلہ۔ ائمہ ثلاثہ و صاحبینؒ فرماتے ہیں جب امام خطبے سے فارغ ہو جائے تو نماز سے پہلے کلام کی اجازت ہے امام ابوحنیفہؒ فرماتے ہیں بعد الخطبہ قبل فراغ الصلاۃ بھی کلام کی اجازت نہیں ہے۔ 

اشعار۔ 
بعد خطبہ بھی نہیں ہے بات کرنے کا جواز
نزدِ اعظم  ہو نہ جب تک یہ مکمل کل نماز
نزدِ یعقوب و محمد اور ثلاثہ نے کہا
بعدِ خطبہ بھی ہے جائز بات کر لے گا تو کیا
______ما جاء فی الصلاۃ قبل الجمعة و بعدھا______

مسئلہ۔ جمہور ائمہ فرماتے ہیں جمعہ سے پہلے چار سنتیں مسنون ہے امام شافعیؒ فرماتے ہیں جمعہ سے قبل دو سنتیں مسنون ہے اور جمعہ کے بعد امام ابوحنیفہؒ و امام مالکؒ فرماتے ہیں چار سنتیں پڑھے گا اور امام احمدؒ و شافعیؒ فرماتے ہیں جمعہ کے بعد بھی دو ہی پڑھے البتہ صاحبین ؒ فرماتے ہیں بعد الجمعہ چھے سنتیں مسنون ہے احناف کا فتویٰ اسی پر ہے۔ 

اشعار۔ 
نزدِ جمہورِ ائمہ پہلے بھی سنت ہے چار
شافعی کہتے ہیں جمعہ سے قبل ہے دو شمار
چار پڑھ لے بعدِ جمعہ نزدِ اعظم، مالکی
دو ہی پڑھ لے بعدِ جمعہ نزدِ احمد، شافعی
پر ہے فتویٰ صاحبین حنفیہ کے قول پر
چھے سنن ہے بعدِ جمعہ ہے یہ اچھا خوب تر
____________القصر عزیمۃ ام رخصۃ___________

مسئلہ۔ امام ابوحنیفہؒ فرماتے ہیں سفر میں قصر ہی ضروری ہے امام شافعیؒ فرماتے ہیں سفر میں اتمام و قصر دونوں کا اختیار ہے دونوں میں سے جو چاہے کرے امام احمدؒ و مالکؒ فرماتے ہیں اتمام ضروری ہے 

اشعار۔ 
بو حنیفہ نے کہا ہے قصر چاہے در سفر
شافعی کہتے ہیں دونوں یعنی اتمام و قصر
احمد و مالک کا ہے مسلک کہ ہے اتمام بس
ہے عزیمت ہی مقدر ہر گھڑی ہر گام بس
_____________الاختلاف فی مدۃ السفر__________

مسئلہ۔ سفر میں کتنے دن کی نیت کرنے سے مقیم کہلاے گا امام ابوحنیفہؒ فرماتے ہیں جو پندرہ دن یا اس سے زیادہ ٹھہرنے کی نیت کرے وہ مقیم ہوگا اب اتمام کرے گا اور ائمہ ثلاثہ فرماتے ہیں جو چار دن کی نیت کرے وہ مقیم ہوگا اس سے کم مسافر۔ 

شعر۔ 
پندرہ دن نیت کرے تو نزدِ اعظم ہے مقیم
اور ثلاثہ نے کہا ہے چار دن ہے مستقیم
_______صلوٰۃ المفترض خلف المتنفل___________

مسئلہ۔ ائمہ ثلاثہ فرماتے ہیں فرض پڑھنے والا نفل پڑھنے والے کی اقتداء نہیں کر سکتا ہے اور امام شافعیؒ فرماتے ہیں مفترض متنفل کی اقتداء کر سکتا ہے

شعر۔ 

مقتدی ہو مفترض اور نفل والا مقتدیٰ
شافعی کہتے ہیں جائز اور ثلاثہ نے خطا
____________من ادرک رکعۃ__________

مسئلہ۔ امام ابوحنیفہؒ فرماتے ہیں جو شخص جمعہ کے دن قبل السلام امام کو پا لے وہ جمعہ کا پانے والا کہلاے گا چناں چہ اب وہ جمعہ ہی پڑھے اور ائمہ ثلاثہ فرماتے ہیں جو شخص پہلی رکعت کا رکوع پا لے تو جمعہ پڑھے اور جو رکوع کے بعد آے وہ جمعہ نہ پڑھے بلکہ ظہر پڑھے گا 

اشعار۔ 
نزدِ اعظم یومِ جمعہ شخص جو پا لے امام
جمعہ کو پاۓ گا شرکت گر کرے قبل السلام
اور ثلاثہ نے کہا پہلی رکعت پاے تو تب
ورنہ پڑھ لے گا ظہر یہ حکم ہے کتنا عجب
________الصلاة عند طلوع و الغروب___________

مسئلہ۔ امام ابوحنیفہؒ و محمد ؒ فرماتے ہیں اگر فجر پڑھتے ہوے آفتاب طلوع ہوجاے تو نماز نہیں ہوگی طلوع آفتاب کے بعد اپنی نماز کی قضاء کر لے ائمہ ثلاثہ فرماتے ہیں نماز فجر کو بوقت طلوع آفتاب بھی مکمل کرے البتہ عصر کی نماز پڑھتے ہوے آفتاب غروب ہو جاے تو تمام ائمہ متفق ہے کی اپنی نماز اسی حالت میں پوری کرے کیونکہ عصر کو ناقص وقت میں شروع کیا ہے اب ناقص ہی ختم بھی کر سکتا ہے۔ 

اشعار۔ 

اور پوری عصر  پڑھ لے گر ہوا آنِ غروب
متفق ہیں اربعہ ہے ناقصاً شانِ غروب
ہاں طلوعِ شمس ہو تو فجر سے رہنا ہے باز
نزدِ اعظم اور محمد بعد میں پڑھ لے نماز
فجر کو کر لے مکمل ہو طلوع گر آفتاب
اس عمل میں ہیں ثلاثہ کس قدر بے آب و تاب
_____ما جاء فی تشدید الرحال الی المساجد______

مسئلہ۔ حدیث میں ہے لا تشد الرحال الا الی ثلاثۃ مساجد مسجد الحرام و مسجد الاقصی و مسجدی ھذا۔ اس حدیث کے پیش نظر قاضی عیاض و ابن تیمیہ فرماتے ہے  روضۂ اطہر کی جانب سفر کا قصد کرنا صحیح نہیں ہے بلکہ مسجد نبوی کا قصد کرے اور پھر وہاں روضہ کی زیارت بھی کر لے جمہور کہتے ہیں روضۂ اطہر کی جانب قصد کرنا نہ یہ کہ صحیح ہے بلکہ باعث ثواب بھی ہے۔ 

اشعار۔ 
کہتے ہیں قاضی عیاض و ابن تیمیہ جناب
روضۂ اطہر کی جانب قصد کرنا ہے خراب
کیا نہیں مطلوب مومن کو محمد کی شفا
جو نہ دیکھے جالیوں کو پھر ہے وہ اھلِ جفا
______ما جاء فیمن صلی لغیر القبلۃ ثم علم_______

مسئلہ۔ جمہور کہتے ہیں جو عدم علمِ قبلہ کے وقت تحری کے بعد غیر سمت قبلہ نماز پڑھے اس پر اعادہ نہیں بلکہ وہ نماز صحیح ہے امام شافعیؒ فرماتے ہیں اس نماز کا دوبارہ اعادہ کرنا ہوگا 

شعر۔ 
ہے اعادہ اس پہ نزدِ شافعی بارِ دگر
غیر سمتِ قبلہ جو پڑھ لے کہ ہو وہ بے خبر
_______ما جاء فی الصلاۃ فوق بیت اللہ_________

مسئلہ۔ کعبے کے اوپر نماز پڑھنا امام شافعیؒ و ابوحنیفہؒ کے نزدیک کراہت کے ساتھ جائز ہے اور امام احمدؒ فرماتے ہیں صرف نفل جائز ہے اور امام مالکؒ فرماتے ہیں نہ فرض جائز ہے نہ نفل۔ 

اشعار۔ 
فوقِ بیت اللہَ پڑھ لے گر کوئی دانا نماز
نزدِ اعظم، شافعی ٹھہرا کراہت سے جواز
نزدِ مالک مطلقاً جائز نہیں ایسا عمل
نزدِ احمد بھی ہے ممنوع پر ادا ہوگا نفل
_________ما جاء فی الصلاۃ و معاون الابل________

مسئلہ۔ امام احمدؒ فرماتے ہیں اونٹ کے باڑے میں نماز پڑھنا جائز نہیں ہے اور جمہور کہتے جائز ہے احتیاطاً روکا گیا ہے

شعر۔ 
اونٹ کے باڑے میں ممنوع نزدِ احمد ہے صلوٰۃ
نزدِ جمہورِ ائمہ احتیاطاً کی ہے بات
______رد السلام بالاشارۃ فی الصلاۃ____________

مسئلہ۔ اشارے سے نماز میں سلام کا جواب دینا امام ابوحنیفہؒ کے نزدیک مکروہ ہے اور ائمہ ثلاثہ کے نزدیک جائز ہے جبکہ امامِ شافعیؒ فرماتے ہیں ایسا مستحب ہے۔ 

اشعار۔ 
اور نمازوں میں نہیں جائز حقیقت میں کلام
نزدِ اعظم ہے کراہت ہو اشارہ در سلام
اور ثلاثہ نے کہا جائز ہے اس میں کیا عجب
شافعی تو یہ بھی کہتے ہیں عمل یہ مستحب

الاختلاف کتاب الصلاۃ 1

___________کلماتِ اذان__________

مسئلہ۔ تربیع کہتے ہیں ابتداۓ آذان میں اللہ اکبر چار مرتبہ کہنا اور ترجیع کہتے ہیں شہادتین میں سے ہر ایک کو چار مرتبہ کہنا دو مرتبہ نیچی آواز میں دو مرتبہ اونچی آواز میں امام شافعیؒ فرماتے ہیں آذان میں تربیع بھی ہوگی اور ترجیع بھی اس طرح آذان کے کلمات انیس ہوے اور امام مالکؒ فرماتے ہیں کہ آذان میں ترجیع تو ہوگی لیکن تربیع نہیں ہوگی بلکہ اللہ اکبر کو دو مرتبہ کہا جاے گا تو انیس میں دو کلمے کم کر کے سترہ کلمات رہ جاتے ہیں اور امام ابوحنیفہؒ و امام احمدؒ کے نزدیک آذان میں تربیع ہوگی ترجیع نہیں ہوگی لہذا آذان کے کلمات کل پندرہ ہوے۔ 

اشعار

شافعی ترجیعِ آذاں کو ہیں افضل مانتے
پندرہ سے انیس کلموں کو ہیں بہتر جانتے
اور ترجیعِ اذاں کے مالکی قائل ہوے
دو کو کم تربیع میں کیجے سترہ ہی حاصل ہوے
اعظم و احمد نے فرمایا کہ بس آذان میں
پندرہ کلمے ہیں فقط اور یہ بھی ہے فرمان میں
___________کلماتِ اقامت__________

مسئلہ۔ امامِ شافعیؒ اور امام احمدؒ فرماتے اقامت کے کلمے کل گیارہ ہے کیوں کہ ان کے نزدیک شروع والی تکبیرِ صرف دو مرتبہ اور شہادتین و حیعلتین ایک ایک مرتبہ ہیں اور امام مالکؒ فرماتے ہیں دس کلمے کیونکہ ان کے نزدیک قد قامت الصلاۃ بھی ایک مرتبہ ہے اور امام اعظم ابوحنیفہؒ کے نزدیک کل سترہ کلمات ہیں پندرہ وہی آذان والے اور دو مرتبہ مزید قد قامت الصلاۃ کہنا ہوگا۔ 

اشعار
اورْ اقامت میں ہے کلموں کا فقط گیارہ شمار
نزدِ احمد، شافعی ہے بس اسی کا اعتبار
قولِ مالک میں ہیں دس اور قولِ اعظم ایک و سات
دو کو قد قامت کے جملے سے اضافے کی ہے بات
___________کتاب الصلوۃ____________

مسئلہ۔ امام شافعیؒ و امام احمدؒ کے نزدیک فجر غلس (تاریکی) میں پڑھنا افضل ہے اور امام ابوحنیفہؒ و مالکؒ کے نزدیک اسفار (خوب روشنی) میں پڑھنا افضل ہے۔ 

شعر۔ 
قولِ احمد، شافعی میں بس غلس مختار ہے
قولِ مالک، بو حنیفہ فجر میں اسفار ہے
________وقت صلوٰۃ الظہر و العصر_________

مسئلہ۔ ظہر کا ابتدائی وقت بالاتفاق زوال کے بعد ہے البتہ انتہاء وقت میں اختلاف ہے ائمہ ثلاثہ و صاحبین و  امام زفرؒ کے نزدیک ظہر کا انتہاء وقت سایہ اصلی کے علاوہ ایک مثل تک باقی رہتا ہے امام ابوحنیفہؒ کی اس سلسلے میں چار روایتیں ملتی ہیں جن میں مفتی بہ قول یہ ہے کہ ظہر کا انتہاء وقت دو مثل تک ہے ایک رویت جمہور کے مطابق، ایک روایت یہ کہ مثل اول سے مثل ثانی تک وقت مہمل ہے ایک روایت یہ بھی ہے کہ یہ وقت ظہر و عصر کا مشترک ہے جیسا کہ علامہ انور شاہ کشمیری ؒ فرماتے ہیں کہ یہ وقت مسافرین و معذورین کے لے ہے۔ 

اشعار۔ 
اور ہے وقت ظہر نزدِ ثلاثہ اک مثل
بو حنیفہ نے کہا ہے دو مثل تک ہے اصل
مثل جمہورِ ائمہ بھی ہے اعظم نے کہا
مشترک بھی اور مہمل، مثل سے تا دوگنا

۔۔۔۔۔۔۔۔۔۔۔۔۔۔۔۔۔ وقت العصر_______________

عصر کے ابتدائی وقت میں وہی اختلاف ہے جو ظہر کے انتہائی وقت میں مذکور ہے یعنی ائمہ ثلاثہ صاحبین و امام زفرؒ کے نزدیک مثل اول کے بعد عصر کا وقت شروع ہو جاتا ہے، جب کہ امام ابوحنیفہؒ کے نزدیک مثل ثانی کے بعد عصر کا وقت شروع ہو جاتا ہے، اور عصر کا انتہائی وقت بالاتفاق سورج غروب ہوتے ہی ختم ہوجاتا ہے۔ 

__________وقت المغرب_____________

مغرب کا ابتدائی وقت بالاتفاق سورج غروب ہوتے ہی شروع ہوجاتا ہے، اور انتہائی وقت میں اختلاف ہے،ائمہ ثلاثہؒ فرماتے مغرب کا انتہائی وقت شفق احمر کے ختم ہوتے ہی ختم ہوجاتے، جبکہ امام ابوحنیفہؒ فرماتے شفق ابیض کے غائب ہوتے ہی وقت مغرب ختم ہوتا ہے۔ 

____________وقت العشاء_____________

ابتدائی وقت عشاء علی اختلاف المغرب شفق احمر یا ابیض کے ختم ہوتے ہی شروع ہو جاتا، اور انتہائی وقت تہائی رات تک رہتا ہے۔۔۔۔ 

__________الاوقات المنھیۃ___________

مسئلہ۔ اوقات منہیہ یعنی وہ اوقات جن میں نماز پڑھنے سے منع کیا گیا ہے ایسے اوقات کل پانچ ہیں 1 طلوع آفتاب 2 غروب آفتاب 3 استواء شمس 4 بعد الفجر 5 بعد العصر، امامِ ابوحنیفہؒ کے نزدیک پہلے تین اوقات میں ہر طرح کی نماز پڑھنا ممنوع ہے البتہ آخری دو اوقات میں ذوات الاسباب و غیر ذوات الاسباب نفلیں پڑھنا ممنوع ہے فرائض و قضاء جائز ہے اور ائمہ ثلاثہ کے نزدیک ان اوقات میں کوئی فرق نہیں سب برابر ہے البتہ ائمہ ثلاثہ میں اس بات پر اختلاف ہے کہ کون سی نماز جائز ہے اور کون سی نا جائز چنانچہ امامِ مالک و امام احمدؒ کے نزدیک صرف قضاء جائز ہے جبکہ امامِ احمدؒ کے نزدیک طواف کی دوگانہ بھی جائز ہے اور امام شافعیؒ فرماتے ہیں کہ فرائض، قضاء اور ذوات الاسباب نفلیں جائز ہیں اور غیر ذوات الاسباب نفلیں نا جائز ہیں۔ 

اشعار
اور پھر اوقاتِ خمسہ میں بھی پڑھ لے گا نماز
ذو سبب نفلیں بھی نزدِ شافعی ہوے  مُجاز
احمد و مالک ہیں کہتے پڑھ لے خمسہ کی قضاء
نزدِ احمد کر لے دوگانہ طوافوں کی ادا
نزدِ اعظم وقت خمسہ میں نہیں کوئی نماز
ہیں احادیثیں محرّم ہے کہاں اس کا جواز
________تحریمھا التکبیر و تحلیلھا التسلیم_____

مسئلہ۔ ائمہ ثلاثہ و امام ابو یوسف ؒ فرماتے ہیں تکبیر تحریمہ کے وقت جملۂ اللہ اکبر کہنا فرض ہے تھوڑا سا فرق ہے وہ یہ کہ امام شافعیؒ فرماتے ہیں اللہ الاکبر بھی کہہ سکتا ہے اور امام ابو یوسف ؒ فرماتے ہیں اللہ الاکبر، اللہ کبیر اور اللہ الکبیر بھی کہہ سکتا ہے اور طرفین ؒ فرماتے ہیں کلمۂ اللہ اکبر واجب ہے اور ہر ایسا کلمہ جو مشعر تعظیم ہو فرض ہے اور لفظ سلام میں بھی یہی اختلاف ہے ائمہ ثلاثہ و امام ابویوسفؒ ایک طرف لفظ سلام کو فرض کہتے ہیں اور طرفین ؒ واجب کہتے ہیں۔ 

اشعار۔ 

ابتداء میں فرض  پھر کلمۂ تکبیر ہے

نزدِ یعقوب و ثلاثہ بس یہی تعبیر ہے
بو حنیفہ اور محمد سے ہیں اس کا بس وجوب
فرض ہے تعظیم  اس کو یاد کیجے خوب خوب
بس یہی تکرار واقع ہے اخیراً در سلام
یعنی کہ تسلیم کے الفاظ میں ہے یہ کلام

________ما یقول عند افتتاح الصلوٰۃ_______

مسئلہ۔ تکبیرِ تحریمہ کے بعد قبل الفاتحہ امام مالکؒ کے نزدیک کوئی ذکر جائز نہیں امام شافعیؒ فرماتے ہیں توجیہ ( انّی وجھت ) پڑھنا سنت ہے امام ابوحنیفہؒ فرماتے ہیں ثناء پڑھنا سنت ہے اور امامِ احمدؒ کے نزدیک ثناء و توجیہ میں سے جو چاہے پڑھے۔ 

اشعار۔ 
بعد تکبیر تحریمہ نہیں کوئی ذکر
مسلکِ مالک یہی ہے مالکی کر لیں فکر
جب کہے تکبیرِ تحریمہ  ذکر بھی ہے روا
یہ ثلاثہ نے کہا اس کو کرے پہلے ادا
پڑھ لے قبل الفاتحہ توجیہ نزدِ شافعی
نزدِ اعظم ہے ثنا اور نزدِ احمد سب سہی
____افتتاح القرأۃ بالحمد للہ رب العالمین_____

مسئلہ۔ کیا بسم اللہ قرآن کا جزء ہے امام ابوحنیفہؒ کے نزدیک بسم اللہ قرآن پاک کا جزء ہے امام شافعیؒ فرماتے ہیں بسم اللہ سورۂ فاتحہ کا جزء ہے امام احمدؒ امام ابوحنیفہؒ کے ساتھ ہے اور امام مالک کے نزدیک بسم اللہ قرآن کا جزء نہیں ہے بلکہ یہ اذکار کے قبیل سے جو سورتوں کے درمیان فصل کرنے کے لے نازل کیا گیا ہے۔ 

اشعار۔ 
شافعی کہتے ہیں بسم اللہ ہے جزوِ فاتحہ
اور ہے یہ جزوِ قرآں بو حنیفہ نے کہا
قولِ اعظم ہی کا احمد کو بھی پھر اقرار ہے
قولِ مالک بسم اللہ مثلِ دعا اذکارہے

__________التسمیۃ فی الصلوۃ__________

مسئلہ۔ فاتحہ سے پہلے بسم اللہ پڑھنا امام ابوحنیفہؒ و امام احمدؒ کے نزدیک سرا جائز ہے امامِ شافعیؒ سے سرا و جہرا دونوں روایتیں مذکور ہے امامِ مالکؒ فرماتے قبل الفاتحہ بسم اللہ پڑھنا بدعت ہے

اشعار۔ 

فاتحہ سے قبل بسم الله َ پڑھنا ہے روا
نزدِ اعظم اور احمد پر ہو یہ سراً ادا
مسلکِ مالک ہے بسم اللہَ بدعت در نماز
شافعی سے جہرو سر دونوں کا ملتا ہے جواز
__________لا صلوٰۃ الا بفاتحۃ الکتاب_________

مسئلہ۔ ائمہ ثلاثہ کے نزدیک نماز میں سورۂ فاتحہ پڑھنا فرض ہے اور امامِ ابوحنیفہؒ کے نزدیک واجب ہے

شعر۔ 
پھر ثلاثہ نے کہا ہے فرض ہے ام الکتاب
بوحنیفہ نے کہا واجب ہی بہتر ہے جناب
___________فاتحہ خلف الامام__________

مسئلہ۔ امام شافعیؒ فرماتے ہیں فاتحہ خلف الامام فرض ہے امام ابوحنیفہؒ فرماتے ہیں امام کے پیچھے فاتحہ پڑھنا مکروہ تحریمی ہے انصات و استماع لازم ہے امام مالکؒ و امام احمدؒ اور امام محمدؒ کے نزدیک سری نماز میں مقتدی بھی پڑھے اور جہر میں ممنوع ہے

اشعار۔ 
شافعیہ نے کہا ہے فاتحہ خلف الامام
نزدِ اعظم ہے کراہت سننے کا ہو التزام
احمد و مالک، محمد نے کہا سرّی میں ہے
فاتحہ ماموم پر اور یہ منع جہری میں ہے
____________ما جاء فی التامین__________

مسئلہ۔ ائمہ ثلاثہ فرماتے ہیں آمین کہنا امام و مقتدی دونوں کا وظیفہ ہے امام مالکؒ فرماتے ہیں یہ صرف مقتدی کہے گا۔ 

شعر۔ 

مسلکِ مالک ہے آمیں بس کہے گا مقتدی
اور ثلاثہ نے کہا ہے مقتدیٰ، ماموم بھی
___________آمین بالجہر و السر__________

مسئلہ۔ امامِ شافعیؒ و امام احمدؒ کے نزدیک آمین میں جہر افضل ہے امام مالکؒ و امام ابوحنیفہؒ فرماتے ہیں آمین میں سر افضل ہے۔ 

شعر۔ 
چھوٹے دو نے کہہ دیا ہے زور سے آمیں کہو
دو بڑوں نے کہہ دیا آہستہ بولو چپ رہو
_______ما جاء فی السکینۃ فی الصلاة_________

مسئلہ۔ امام ابوحنیفہؒ و مالکؒ فرماتے ہیں نماز میں دو سکتے ہیں ایک قبل الفاتحہ جس میں حنفی لوگ ثناء پڑھتے ہیں اور دوسرا سکتہ بعد الفاتحہ قبل السورۃ جس میں تامین کہی جاے گی اور امام شافعیؒ و احمدؒ کے نزدیک ان دو سکتوں کے علاوہ ایک تیسرا سکتہ بھی روا ہے وہ ہے بعد القرأت قبل الرکوع۔ 

شعر۔ 
سکتۂ ثالث نہیں ہے نزدِ مالک اور ہم
شافعی، احمد ہیں کہتے سکتہ کر کے ہوگا خم
____ما جاء فی السوال و التعوذ علی آئۃ رحمۃ و عذاب___

مسئلہ۔ امام احمدؒ و شافعیؒ فرماتے ہیں آیات رحمت پر دعا مانگنا اور آیات عذاب پر خدا سے پناہ مانگنا سنت ہے اور امامِ مالکؒ و امام ابوحنیفہؒ کے نزدیک نفل میں ایسا جائز ہے فرائض میں نہیں۔ 

اشعار۔ 
پھر تعوذ اور دعا بر آیاتِ رحمت اور عذاب
یہ تو سنت نزدِ احمد، شافعی ٹھہرا جناب
نفل میں چاہے تعوذ اور دعا آیات پر
متفق ہے حنفیہ اور مالکی اس بات پر
___________رفع الیدین__________

امام شافعیؒ و امام احمدؒ کے نزدیک تکبیرِ تحریمہ کے سوا بھی رفع الیدین افضل ہے اور امام مالکؒ و امام ابوحنیفہؒ کے نزدیک ترک رفع الیدین افضل ہے۔ 

شعر۔ 
شافعی و ابن حنبل رفع کے قائل ہوے
حنفیہ اور مالکیہ ترک کو مائل ہوے
__________تعدیلِ ارکان__________

مسئلہ۔ ائمہ ثلاثہ نے فرمایا نماز میں تعدیل ارکان فرض ہے اور طرفین کے نزدیک واجب ہے۔ 

شعر۔ 
فرض ہے تعدیلِ ارکاں یہ ثلاثہ کی ہے بات
بو حنیفہ اور محمد نے کہا از واجبات
____________وضع الیدین___________

مسئلہ۔ ائمہ ثلاثہ نے فرمایا فرائض ہوں یا نوافل ہاتھ بانھنا سنت ہے اور امام مالکؒ فرماتے ہیں فرائض میں ہاتھ باندھنا ٹیک لگانے کے مترادف ہے اس لئے جائز نہیں ہے اور نوافل میں جائز ہے۔ 

شعر۔ 
نزدِ مالک در فرائض ہاتھ باندھے گا نہیں
اور ثلاثہ نے کہا ہے یہ ہے سنت بالیقیں
__________ایضاً________

مسئلہ۔ امام شافعیؒ فرماتے ہیں کہ نماز میں ہاتھ سینے پر باندھے جائیں گے اور اور امام ابوحنیفہؒ فرماتے ہیں ناف کے نیچے ہاتھ باندھے جائیں گے۔ 

شعر۔ 
شافعی کہتے ہیں رکّھے ہاتھ پھر سینے کے پاس
اور اعظم نے کہا ہے تحتَ السرۃ ہو مساس
_________السجدۃ علی الجبھۃ و الانف________

مسئلہ۔ امام احمدؒ کے نزدیک سجدہ میں ناک و پیشانی دونوں کو جھکانا ضروری ہے ایک پر اکتفاء جائز نہیں ہے امام مالکؒ، شافعیؒ اور صاحبین فرماتے ہیں پیشانی پر اکتفاء کر لے یہ تو جائز ہے لیکن ناک پر اکتفاء جائز نہیں اور امام ابوحنیفہؒ کے نزدیک دونوں میں ایک پر بھی اکتفاء کر لے سجدہ ادا ہو جاے گا۔ 

اشعار۔ 
اور سجدہ کر لے بندے ناک و پیشانی جھکا
ایک پر جائز نہیں ہے نزدِ احمد اکتفاء
شافعی و مالکی و صاحبَین، ذی وقار
قائلِ سجدہ ہے جبہہ پر بھی ہو گر اقتصار
ناک پر بھی سجدہ ہوگا حنفیہ قائل ہوۓ
بعدہٗ وہ جانبِ جمہور بھی مائل ہوے ٔ
__________جمع بین الصلاتین_________

مسئلہ۔ دو نمازیں ایک وقت میں پڑھنا۔ 

احناف کے یہاں جمع صوری جائز ہے ( مثلاً ظہر کو اپنے آخری وقت میں پڑھنا اور عصر کو اپنے ابتدائی وقت میں ادا کرنا) اور جمع حقیقی نہ تقدیماً جائز ہے نہ تاخیراً، اور ائمۂ ثلاثہ کے نزدیک عذر کی بناء پر جمع حقیقی جائز ہے البتہ اعذار کیا ہے اور کتنے ہیں اس میں اختلاف ہے امام احمدؒ فرماتے عذر تین ہے مطر، مرض اور سفر امام شافعیؒ و امام مالکؒ فرماتے ہیں اعذار دو ہیں سفر و مطر، 

اشعار۔ 

دو نمازیں آنِ واحد میں نہیں بالکل روا
ہاں مگر صوری چلے گا یہ تو اعظم نے کہا
پھر ثلاثہ نے کہا پڑھ لے اگر ہو عذرِ لنگ
نزدِ احمد بارش و مرض و سفر  سے جو ہو تنگ
عذر ٹھہرا نزدِ مالک شافعی سفر و مطر
جمعِ تقدیم و تأخر اور حقیقی بھی تو کر
_________المشرک یدخل المسجد__________

مسئلہ۔ امام ابوحنیفہؒ فرماتے ہیں غیر مسلم مسجد میں آنا چاہے تو جاۓ حرج نہیں آسکتا ہے اور امام مالک فرماتے جائز نہیں ہے امام شافعیؒ فرماتے ہیں مسجد حرام کے سوا داخل ہونا جائز ہے امام احمد فرماتے ہیں امام صاحب اجازت دے تو داخل ہو سکتا ہے۔ 

اشعار۔ 
غیر مسلم مسجدوں میں داخلہ چاہے تو کیا
نزدِ اعظم ہے اجازت نزدِ مالک ہے خطا
شافعی کہتے ہیں جائز ہاں مگر جب ہو حرم
قولِ احمد ہے یہی جب ہو اجازت بھی بہم
__________من اذن فہو یقیم__________

مسئلہ۔ ائمہ ثلاثہ فرماتے مؤذن کے کوئی دوسرا آدمی اقامت کہنا چاہے تو کہہ سکتا ہے امام شافعیؒ فرماتے ہیں مؤذن ہی اقامت کہے گا دوسرا نہیں۔ 

شعر۔ 

اک مؤذن دے اقامت کہتے ہیں یہ شافعی
مستحب نزدِ ثلاثہ یہ نہیں ہے واجبی
_____الاذان و الاقامۃ فی السفر___________

مسئلہ۔ سفر میں حنابلہ و شوافع کے یہاں آذان و اقامت ہر دو سنت ہے یہی ایک روایت امام ابوحنیفہؒ کی ہے اور امام ابوحنیفہؒ و مالک فرماتے ہیں بس اقامت سنت ہے 
در سفر پھر ہے اقامت اور اذاں سنت سدا
حضرتِ احمد، شوافع نے یہی تو ہے کہا
بس اقامت چاہۓ گا نزدِ مالک اور ہم
اک روایت نزدِ اعظم ہے کہ دونوں ہو بہم
_________ما یقول اذا اذن المؤذن _________

مسئلہ۔ آذان کے دو جواب ہے اجابت بالقدم اور اجابت بالقول، اجابت بالقدم تو بالاتفاق واجب ہے اجابت بالقول میں اختلاف ہے امام احمدؒ و ظاہریہ کے نزدیک واجب ہے اور جمہور کے نزدیک سنت ہے

اشعار۔ 
اور واجب ہے اجابت بالقدم آذان کا
ہے فرق قولاً اجابت میں ذرا رجحان کا
قول سے بھی ٹھہرا واجب نزدِ احمد ظاہری
نزدِ جمہورِ ائمہ مستحب مفتیٰ بہٖ
___ما جاء فی کراھیۃ ان یأخذ المؤذن علی الاذان اجراً____

مسئلہ۔ اجرت علی الطاعات مالکیہ و شافعیہ کے نزدیک جائز ہے حنفیہ و حنابلہ کے نزدیک بقولِ قدیم جائز نہیں لیکن اب ضرورت کے پیش نظر ائمہ و مؤذنین اور تعلیم علی القرآن پر اجرت لینا جائز ہے۔ 

اشعار۔ 
گر ملے اجرت علی الطاعت تو  کیجئے گا قبول
شافعی و مالکی کرتے ہیں ایسے بھی حصول
حنبلی و حنفیہ کہتے تھے پہلے ہے حرام
اب ضرورت سے ہے جائز للمؤذن و الامام
________الجماعۃ فی مسجد قد صلی فیہ مرۃ_______

مسئلہ۔ جمہور کے نزدیک ایک مسجد میں جماعت کا تکرار جائز نہیں ہے اور امام احمدؒ و ظاہریہ نے اس کی اجازت مرحمت فرمائی ہے۔ 

اشعار۔ 
ایک مسجد میں جماعت کا نہ ہو تکرار بھی
یہ ثلاثہ کا ہے مسلک اور ہے مختار بھی
ظاہریہ اور احمد نے کہا کر لے ادا
بس کہ جمہور ائمہ کے مخالف ہے کہا
_______ما جاء فی صلاۃ المسبوق________

 مسئلہ۔ امام احمدؒ و شافعیؒ فرماتے ہیں مسبوق نے جو نماز پائ وہ اس کی اول نماز ہے اس لئے امام کے سلام پھیرتے ہی کھڑا ہو کر ما بقیہ کا اتمام کر لے حنفیہ میں شیخین فرماتے ہیں مسبوق جو نماز امام کے ساتھ پاے وہ آخری ہے ما فات کی بعدِ سلامِ امام قضاء کرلے اور امام مالک و محمد فرماتے ہیں مسبوق نے جو نماز امام کے ساتھ پائ وہ آخری ہے جو رکعتیں چھوٹ گئیں ہیں وہ قرأت کے اعتبار سے اول رکعتیں ہیں اور ارکان کے اعتبار سے آخری اور اسی پر احناف کا فتویٰ ہے کیوں کہ اس میں احتیاط ہے اور قاعدہ ہے الاحتیاط فی حقوق اللہ جائز و فی حقوق العباد لا یجوز۔ 

اشعار۔ 
نزدِ احمد، شافعی مسبوق پر اتمام ہے
اعظم و یعقوب کہتے ہیں قضاء کا کام ہے
نزدِ مالک اور محمد ہے قضاء اتمام بھی
ہے قراءت سے وہ اول فعل سے ہے آخری